Ձեր վստահելի աղբյուրը

Ուղիղ  մեկ տարի առաջ՝ դեկտեմբերի 11-ին Panorama.am-ը  գրել էր Հայկի երազանքի  մասին։ Ութամյա Հայկի ամենամեծ ցանկությունը ինքնուրույն քայլել է։ 29 վիրահատությունները նրան մոտեցրել են դրան, ևս մեկը ու ըստ բժիշկների, Հայկին ոչինչ չի խանգարի ինքնուրույն քայլել։

Մեկանգամյա անզգայացմամբ  ևս չոր վիրահատություն  սպասվում է հունվարին Գերմանիայում։ Դրա ընթացքում պետք է հեռացվեն ոտքերի մեջ դրված  երկաթները, որոնք տեղադրվել են վեց ամիս առաջ վիրահատության ժամանակ։

Ընտանիքը հույս ունի՝ բարի մարդիկ այս անգամ էլ իրենց կողքին կկանգնեն, ու անհրաժեշտ 3600 եվրոն կհավաքվի։

Մայրը՝ Պայծառ Ներսիսյանը Panorama.am-ի հետ զրույցում նշում է, որ արդեն կատարված վիրահատությունների, բժիշկների նշանակած պարապմունքների արդյունքում Հայկն ամեն օր նոր հաջողություններ է գրանցում։ Արդեն կարողանում է առանց օրթեզների ու քայլակի տան մեջ մի քանի քայլ անել։

Հայկը հաճախում է ոչ ներառական դպրոց, սովորում է Երևանի թիվ 154 դպրոցի երկրորդ դասարանում, լավ է սովորում։ Առավոտյան բարձր դասարանների աշակերտները գալիս են, Հայկին օգնում, աստիճաններից իջեցնում, դպրոց ուղեկցում, հետո օգնում են տուն վերադառնալ։ Տնօրենն ու ուսուցիչներն էլ նկատել են, որ Հայկի դպրոցում հայտնվելուց հետո մթնոլորտը փոխվել է։ Երեխաներն ավելի զիջող, օգնելու պատրաստ են դարձել։

«Հայկին անընդհատ պետք են մկանները զարգացնող պարապմունքներ։ Գումար չլինելու պատճառով մենք մեկ ու մեջ ենք պարապում։ Բժիշկներն էլ զարմացած են Հայկի առաջընթացից։ Բժիշկներն ասում են, Հայկը տասը տարեկանում արդեն կկարողանա ազատորեն քայլել։ Երկու տարի մնաց, 29 վիրահատություն է տարել»,-հաշվում է Պայծառը։

Գերմանացի բժիշկներն էլ ընդառաջում են իրենց արդեն մտերիմ դարձած հայ երեխային։ Համաձայնել են, որ Հայկը ռենտգեն հետազոտություն անցնի Երևանում, արդյունքներն ինտերնետով ուղարկվեն իրենց, դրանց հիման վրա էլ վիրահատության օր կնշանակեն։

Մայրը բացատրում է, որ ոտքերում դրված երկաթները պետք է հանվեն բժիշկների կողմից նշված վեց ամիս հետո, ուշացնելու դեպքում  դրանք երեխայի արդեն ուղղված ոտքերը կթեքեն հակառակ ուղղությամբ, ինչն ուղղելու համար առավել բարդ վիրահատության անհրաժեշտություն կառաջանա։

«Պետք է հասցնենք, որ ժամանակին երկաթները հեռացնենք։ Այս անգամ էլ ոչ մի վախ չունի, անգամ ինձ է հանդարտացնում, ասում է՝ մամ ջան, մի նեղվի, կանցնի։ Ասում եմ, Հայկ ջան, էս ինչքան ուժեղ ես դու, մատս մի հատ կտրվում է, սկսում եմ նվնվալ, դու իմ երեխան ես, բայց ինձանից շատ ուժեղ ես»,-պատմում է Պայծառը։

Այս տարի էլ Հակը Ձմեռ պապիկին նամակ է գրել, ցանկություն է հայտնել իսկական կիթառ ունենալ։ Պայծառն այդ մասին գրառում է արել ֆեյսբուքյան իր էջում։

«Չեք պատկերացնի, թե ինչքան արձագանք ստացանք։ Նույնիսկ վիճում էին մարդիկ գրառման ներքո, ասում էին՝ ի՞նչ կլինի, ասեք նա չբերի, մենք ամենալավ կիթառը կբերենք»,-ծիծաղով հիշում է մայրը։

Հայկը կիթառով նվագել շատ է սիրում, մտադիր է սովորել, մասնագետն էլ ստուգել է լսողությունը, ձեռքի շարժումները, հաստատել, որ կիթառահար կարող է դառնալ։

«Չիկոն մի հաղորդում ուներ ջազի մասին։ Հայկը նրա հավատարիմ ունկնդիրն էր։ Հետո իմացավ, որ Չիկոն մահացել է, շատ տխրեց»,-ասում է մայրը։

Հիշեցնենք, որ երեխան ծնվել է 5.5 ամսականում, 600 գրամ քաշով՝ անհաս, զարգացած չէր կոնքազդրը, երկկողմանի հոդախախտ ուներ, նաև մանկական ուղեղային կաթված:  Մայրը չլսեց բժիշկների հորդորները, չհրաժարվեց նրանից:

Նրանց մեծ երազանքի իրականացմանն օգնելու համար կարող եք զանգահարել Պայծառ Ներսիսյանին՝ 093 58 66 21 հեռախոսահամարով։ Հայկի մոր՝ Պայծառ Ներսիսյանի անունով ՎՏԲ բանկում հաշվեհամար է բացվել։ Աջակցել ցանկացողները կարող են փոխանցում կատարել հետևյալ հաշվեհամարներին.

հայկական դրամով՝ 16046032978404 
դոլարով՝ 16046032978405
եվրոյով՝ 16046032978406
ռուբլիով՝ 16046032978407 հաշվեհամարներին:

ArCa քարտի համարն է 6769 3071 0003 1522։