Երիտասարդ միայնակ մայրն ամանորը կնշի մանկատնից վերադարձած իր երեխաների հետ
38-ամյա Անահիտ Սեդրակյանը միայնակ մայր է։ Այս տարին դիմավորելու է չորս երեխաների՝ 11-ամյա Արթուրի և Սվետլանայի (նրանք երկվորյակ են), 8-ամյա Քրիստինայի, 6-ամյա Անգելինայի հետ։ Մեկ տարի «ՍՕՍ Մանկական Գյուղեր»-ում մնալուց հետո նա երեխաներին տուն է վերադարձրել։ Երեխաներից Սվետլանան, որ մանկական ուղեղային կաթվածով է ծնվել, Քրիստինայի հետ թիվ 6 գիշերօթիկ դպրոց են հաճախում։
Տոնին պատրաստվելու, երեխաներին խաղալիքներ գնելու փոխարեն կինն այս օրերին քաղաքապետարանից առողջապահության նախարարություն է գնում։ Ասում է՝ անհապաղ վիրահատության կարիք ունի։ Պետպատվերի շրջանակում վիրահատվելու խնդրանքով դիմել է քաղաքապետարան, դեռ արձագանք չի եղել։ Չնայած ընտանեկան նպաստ ստանալու, տուն ստանալու մասին խնդրանք- դիմումներին հետևած մերժումներից հետո հույս չունի, որ դրական արձագանք կլինի։
«Ես նամակ գրեցի, ներկայացրեցի մեր վիճակը, գրեցի՝ տուն չունենք, մենակ ես եմ աշխատում, չորս անչափահաս երեխա ունեմ, խնդրեցի՝ ինձ անապահովության նպաստ տրամադրեն։ Քաղաքապետարանից պատասխան եկավ, վարձով պետք է ապրեք, որ նպաստ ստանաք»,-Panorama.am-ին պատմեց Ա. Սեդրակյանը։
Ամուսինը հեռացել է, հեռախոսազանգերով անընդհատ երեխաների մասին հիշեցնող կնոջը պատասխանել է՝ «յան տուր ինձանից», ապա փոխել է հեռախոսահամարը։
Տուն չունենալը, աշխատավարձով երեխաների կարիքները հոգալ չկարողանալը, ընտանեկան նպաստ չստանալը, ՄՈՒԿ-ով երեխային խնամելու դժվարություններն են Անահիտին ստիպել երեխաներին մանկատուն հանձնել։ Այնտեղ երկար մնալու համար մայրը պետք է նոտարով հրաժարվեր երեխաներից, բայց չարեց։ Այս տարվա հոկտեմբերի 4-ին նրանց տուն վերադարձրեց։ Ապրում է բարեկամներից մեկի տանը, Նոր Նորք վարչական շրջանում վթարային շենքում։
«Հիմա բարեկամս ասում է՝ վարձով տուն ճարեք, մենք վերադառնում ենք Հայաստան։ Ես շատ ցածր վարձով տուն եմ հիմա փնտրում»,-ասում է նա։
Անահիտն աշխատում է «Սուրբ Գրիգոր Լուսավորիչ» ԲԿ-ում՝ որպես հավաքարար։ Այս ընթացքում նրան գումարով, հագուստով, անհրաժեշտ իրերով օգնել են թե տնօրինությունը, թե գործընկերները։ 81 հազար դրամ աշխատավարձի կեսն էլ ԴԱՀԿ-ն է պահում։
Ասում է՝ ամուսնու հետ ապրելու ընթացքում ապառիկ պայմաններով սառնարան են վերցրել, հետո պարզվել է, որ ամուսինը չի վճարել, չորս տարի անց ԴԱՀԿ-ից գրություն է գալիս, որ ինքը բանկին 1 մլն 300 հազար դրամ է պարտք։ Ինն ամիս առաջ Անահիտը դիմել է փաստաբանին, որ դատարան հայց ներկայացնի։ Մինչ օր այս հարցով էլ առաջընթաց չկա։
«Հայ Արմատ» բարեգործական կազմակերպությունը վերջերս ընտանիքին վառելիք է տրամադրել, նաև սնունդ։ Դա իհարկե, թեթևացրել է դժվարությունների, հիվանդությունների դեմ ամեն օր մաքառող միայնակ կնոջ հոգսը, սակայն խնդիրներ դեռ կան։ Այս պահին Սվետլանան օրթոպեդիկ երկարաճիտ կոշիկների կարիք ունի։
«Մյուս երեխաներին իմ գործընկերներն իրենց երեխաների օգտագործածները տվել են, հագնում են, բայց Սվետլանային հատուկ կոշիկներ են պետք, նա խնդիրներ ունի, չեմ կարողանում առնել։ 11 տարեկան է, 33-34 համար է հագնում»,-ասում է Անահիտը։
Ամանորին չպատրաստվելը նրան տխրեցնում է, բայց առավել շատ մտահոգված է, որ հունվարի 7-ին Անգելինայի ծննդյան տարեդարձն է, չի կարողանա տորթ առնել։
Ընտանիքին օգնել ցանկավողները կարող են զանգահարել Անահիտին 077 59 87 99 հեռախոսահամարով։
Հեռախոսահամարը, լուսանկարները խմբագրությանը տրամադրել է Անահիտ Սեդրակյանը, դրանք հրապարակվում են նրա համաձայնությամբ։
Սվետլանան է։
Տան գորգն Անահիտին տվել է ԲԿ-ի աշխատակիցներից մեկը։
Մինչ այդ բետոնապատ հատակն էր։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
