Ձեր վստահելի աղբյուրը

«Նախընտրական քարոզչության ընթացքում ես հայտարարել եմ, որ նախարարությունների թիվը պետք է կրճատվի և ժողովրդից ստացել եմ մանդատ՝ այդ պրոցեն իրականացնելու համար»,- այսօր Վանաձորում լրագրողների հետ զրույցում նշեց ՀՀ վարչապետի պաշտոնակատար Նիկոլ Փաշինյանը՝ անդրադառնալով նախօրեին Սփյուռքի և Մշակույթի նախարարությունների լուծարելու դեմ բողոքի ակցիաներին:

«Ինձ անհանգստացրեցին Մշակույթի նախարարության ներկայացուցիչների արտահայտությունները, երբ նրանք ահազանգում էին՝ ասում են, որ մի կրճատեք, որովհետև մշակույթը միշտ եղել է հայ ժողովրդի այցեքարտը: Դա շատ վատ ազդակ է: Այսինքն՝ մշակույթի նախարարությունն իրեն հայ մշակույթի հետ նույնացնո՞ւմ է: Ուզում եք՝ էքսպերիմենտ անենք, 3 ամիս գործադուլ անենք, տեսնենք մշակույթի կյանքում ինչ-որ բան տեղի կունենա՞:

Երբ խոսում են մշակութային քաղաքականության մասին. այսօր մեր կառավարությունը բացառիկ քայլեր է արել մշակութային քաղաքականության հարցում: Մենք մեկ տարվա ընթացքում 400 մլն դրամով մշակույթի ֆինանսավորումն ավելացրել ենք և 350 հազարով մշակութային օջախների այցելությունների թիվն ավելացրել ենք: Ինչո՞ւ մինչև հիմա դա չի արված»,-հարց ուղղեց վարչապօետի պաշտոբակատարը՝ հավելելով, որ Մշակույթի և Սփյուռք նախարարությունները չենլուծարվում, պարազապես վերակազմակերպվում են:

Փաշինյանի խոսքով, պետական կառավարման համակարգում աշխատողների աշխատավարձերը վճարում են հարկատուները, և նրանք կարող են հույս ունենալ, որ իրենց վճարած միջոցներն արդյունավետ են օգտագործվում։

«Ամեն ընտրությունից հետո ով ում համար, այսպես ասած, 4-5 ձայն է բերել, տարել են մի տեղ, մի հատ պաշտոնի են դրել, և պետական կառավարման համակարգը ուռճացել, դարձել է եսիմ ինչ», – ասաց վարչապետի պաշտոնակատարը։

Գազի գնի մասին

Անդրադառնալով գազի գնի թեմային՝ վարչապետի պաշտոնակատարը հույս հայտնեց, որ Հայաստանին մատակարարվող գազի գնի սակագնի շուրջ Ռուսաստանի հետ բանակցությունները հաջող կընթանան:

Դիտարկմանը, թե  վերջին օրերին մատակարարվող գազի սակագնի թանկացման վերաբերյալ արտահոսք եղավ ՝ նա ասաց, որ նման տեղեկատվություն չունի: «Ես այդպիսի տեղեկատվություն չունեմ, որ գազի գինը պետք է թանկանա, մենք պայմանավորվել ենք, որ հարցը պետք է քննարկենք, հույս ունմ, որ բանակցությունները հաջող կընթանան»,- նշեց վարչապետի պաշտոնակատարը:

Հարցին, քննարկումների ընթացքում հայկական կողմից գազի սակագինը նվազեցնելու պնդումներ լինելո՞ւ են, Փաշինյանը պատասխանեց.  «Ես հիմա չեմ ցանկանում որևէ կանխորոշող բան ասել, հույս ունեմ, որ բանակցությունները հաջող կընթանան»:

ՀԱՊԿ գլխավոր քարտուղարի մասին

Ինչ վերաբերում է ՀԱՊԿ քարտուղարի թեմային, Նիկոլ Փաշինյանը նշեց, որ Հավաքական անվտանգության պայմանագրի կազմակերպության բովանդակությունը ավելի կարևոր է, քան գլխավոր քարտուղարի հարցը:

«Մենք չենք մերժել, մենք ասել ենք, որ այս փուլում նպատակահարմար չենք համարում, քննարկումները շարունակվում են»:

Նրա խոսքով՝  Հայաստանը մշտապես ասել է, որ հարցը պետք է որոշվի կոնսենսուսով ու պետք է փորձել հասնել կոնսենսուսի:

«Ընդհանուր առմամբ, ես ասել եմ նաև նախկինում՝ այնպես չէ, որ  ՀԱՊԿ-ի գլխավոր քարտուղարի պաշտոնը ընդմիշտ վերապահված է Հայաստանի Հանրապետությանը՝ դա ռոտացիոն սկզբունք է, և մեր ժամկետը ինչ-որ պահի պետք է ավարտվի: Մեզ համար խնդիրը գլխավոր քարտուղարի պաշտոնը և կարգավիճակը չէ, մեզ համար խնդիրը ՀԱՊԿ բովանդակությունն է, և ինչպես նախկինում ասել եմ փոխադարձ պարտավորությունների հստակեցումն է և ճշգրտումն է ու այս հարցի շուրջ կոնսենսուսի հասնելը»,– ասաց նա:

Փաշինյանի խոսքով, եղել են ժամանակներ, երբ ՀԱՊԿ-ում ռոտացիոն սկզբունքը չի գործել՝ նույն մարդը երկար տարիներով եղել է գլխավոր քարտուղար:

«Գլխավոր քարտուղարի հարցը չէ խնդիրը, որովհետև գլխավոր քարտուղարի ժամկետը կավարտվի, օրինակ՝ ռոտացիան կփոխվի, հետո էլի կհասնի Հայաստանին ՝ այդ շրջապտույտը անընդհատ կպտտվի:
Խնդիրը ավելի խորն է և բովանդակային և, ես, անկեղծ ասած, գոհ եմ այս ընթացքում տեղի ունեցած այդ քննարկումներից և տեղի ունեցող և տեղի ունենալիք, որովհետև շատ բաց, անկեղծ քննարկումներ են տեղի ունեցել, ինչը ՀԱՊԿ-ում երբեք տեղի չի ունեցել: Եվ մենք պետք նաև մեր անվտանգային միջավայրը հասկանալով՝  հարցին պատասխանենք՝ ՀԱՊԿ-ին պե՞տք է լուրջ վերաբերվել , թե չպետք է լուրջ վերաբերենք։ Սա կարևոր արձանագրում է, իհարկե, այս թեմաները քննարկելու ենք»,- նշեց նա։

Ապրիլյան պատերազմի մասին

Խոսելով ապրիլյան պատերազմից՝ Փաշինյանը նկատեց, որ իրեն հուզող շատ հարցեր կան: «Ապրիլյան պատերազմի վերաբերյալ նաև այս վերջին քննարկումները ցույց տվեցին, որ շատ հարցեր կան, որոնք ինձ էլ են շատ հետաքրքրել ու անհանգստացրել, և այսօր էլ ես դրանցով զբաղվում եմ: Դա շատ կարևոր է նաև հետագայի համար, բայց ինչ  ասել եմ՝ դա իրողություն է», ասաց Նիկոլ Փաշինյանը: