Ձեր վստահելի աղբյուրը

Երևանի «Ոսկե ծիրան» 16-րդ միջազգային կինոփառատոնի լիամետրաժ ֆիլմերի մրցույթում ընդգրկված է չինացի ռեժիսոր Ծյան Սինի «Ձմռան վրա ձնեռ» ֆիլմը։ Լրագրողների հետ հանդիպմանը ռեժիսորը նախ շնորհակալություն հայտնեց իրեն փառատոնին հրավիրելու համար, ապա ներկայացրեց իր ֆիլմը։ Նա նշեց, որ ֆիլմը կնոջ ճակատագրի մասին  է Չինաստանի համար ծանր դրամատիկ մի շրջանում։

Ռեժիսորի ներկայացմամբ, ֆիլմը սև ու սպիտակ է, երկու հատված կա,որ գունավոր է, մի կադրում կնոջ շարֆը կարմիր է, դա խորհրդանշում է  նրա կապը ֆիլմի այլ հերսների հետ, որովհետև դա սկզբում պատկանում էր այդ կնոջը, հետո նվիրում է իր առաջին ամուսնուն, այնուհետև այն փոխանցվում է մեկ ուրիշին։ Կարմիր գույնը չինական մշակույթում խորհրդանշել է  երջանկություն, սեր, նաև վտանգ։ Կոնկերտ այս ֆիլմում հենց այդ իմաստն ունի։ Ֆիլմի վերջում շարֆը նվիրվում է ճապոնացի մի որբ երեխայի, դրանով  ռեժիսորը ցանացել է ցույց տալ, որ պատերազմը վնասել է նաև ճապոնացիներին, հարձակման հետևանքով նաև նրանք են կորուստներ ունեցել։

«Կարմիր գույնը, շարֆը խորհրդանշում է, որ սերը չի ճանաչում ոչ մի սահման, ռասա, այն բոլորի համար է»,- ասաց ռեժիսորը։

Չինացի կինոգործչի խոսքով, ֆիլմում ներկայացված կնոջ կերպարով ցույց է տալիս կնոջ սերը, առատաձեռնությունը, որոնք հատոկ են աշխարհի բոլոր կանանց, ոչ միայն այդ մեկ կնոջը։

Խոսելով չինական ժամանակակից կինոարտադրության մասին, Ծյան Սինը նշեց, որ վերջին 10 տարիներին Չինաստանում ֆիլմարտադրության շուկան զարգացում է  ապրում, հատկապես կոմերցիոն, որը ստանում են ֆինանսական աջակցություն, իսկ արտիստիկ, գեղարվեստական ֆիլմերը դժվար են ընդունվում, չեն ֆինանսավորվում կամ ունենում են ֆինանսական խնդիրներ, որովհետև արծարվող թեմաները շահույթ բերող չեն, նաև պրոֆեսիոնալիզմի պակաս կա։ Նրա խոսքով, այդ ոլորտում մեծ աշխատանք կա կատարելու։

Ինչ վերաբերում է «Ոսկե ծիրան» փառատոնին, Ծյան Սինն ասաց, որ իր կարիերայի սկզբնական շրջանում տեղյակ չէր փառատոնի մասին, սակայն երբ մասնակցել է այլ փառատոների, չինացի ռեժիսորներից լսել է երևանյան փառատոնի մասին։

«Մի շատ հայտնի չինացի ռեժիսոր, որը մասնակցել է փառատոնին, շատ տպավորված էր «Ոսկե ծիրանով»։  Երբ հրավեր ստացա, մեծ ակնկալիքներ ունեի, ցանկանում էի գալ Հայաստան, տեսնեի Հայաստանն ու մասնակցեի փառատոնին»,- նշեց նա։ 

Ֆիլմի մասին
Մոտ 1945-ին Ճապոնիայի կոմից բռնազավթված հյուսիսարևելյան Չինաստանում  մի ընտանիք ձգտում է իր տոհմը շարունակել: Ընտանիքի միակ կին անդամը համրացել է ճակատագրական աղետներից, ավելի պայծառ ապագայի սպասելով:

Հիշեցնենք, որ «Ոսկե ծիրան» կինոփառատոնը մեկնարկել է հուլիսի 7-ին։ Միջազգային կինոփառատոնն աշխարհի տարբեր երկրներից ստացել է մասնակցության ավելի քան 740 հայտ, ինչպես նաև աշխարհի հեղինակավոր կինոփառատոներից՝ Կաննից, Բեռլինից, Ռոտերդամից, ընտրվել են մի շարք կինոնկարներ: Փառատոնն ունի միջազգային լիամետրաժ (խաղարկային և վավերագրական) մրցութային ծրագիր, որը ներառում է 12 ֆիլմ ավելի քան 17 երկրներից և կարճամետրաժ ֆիլմերի տարածաշրջանային մրցույթ, որը  ներառում է 25 ֆիլմ՝ Հայաստանից, Թուրքիայից, Իրանից և Վրաստանից: