Միայնակ մարդկանց
«Մի օր պատահում է՝ հայտնվում ես մի իրավիճակում, երբ կորցնում ես տունդ, հարազատներիդ, աշխատանքդ, փաստաթղթերդ, հիշողությունդ, առողջությունդ․․․
Ասոցիալ․ սա է հասարակական մտքի գնահատականը այս կարգի մարդկանց։
Հենց այս վիճակում է հայտնվել Սվետլանա Սմակը։
․․․«Հայ Ձմեռ պապի» կամավորներից մեկը «Քվանտ» վարժարանի հարակից բակերում ամիսներ առաջ մի նիհարակազմ անապաստան կնոջ է նկատել։ Աննման կապույտ աչքերով, ժպտադեմ, բարեհամբույր մեկին՝ արտասովոր վարքով․ անվերջ ավլել-մաքրել-սրբելիս է եղել շրջակա շենքերի սանդուղքներն ու բակերը, շարունակ հավաքել դրսի աղբը, բնակիչների՝ իրեն նվիրած գրոշներով էլ վերջում ժավել է գնել, լվացել ձեռքերը ու․․․ նորից սկսել մաքրել, մաքրել։ Հավերժական, անխոնջ սանիտար։ Փաստաթղթեր չունի, ազգականներ չունի, ապագա չունի՝ միակ տերն Աստված է։
Սմակ (Կրիվդա) Սվետլանա Իվանովնան է։
․․․ Շենքի բնակիչներից մեկի զանգով նրան տեղափոխել են հայ-դանիական «Կոֆոեդ» հիմնադրամի անապաստանների կացարան։ Վարդաշեն։
․․․ Սվետլանա Իվանովնան ցերեկները դուրս է գալիս կացարանից ու այդ կողմերում էլ է սկսում մաքրություն անել։ Հունիսի 15-ին վնասվածքի հետևանքով նա կոնք-ազդրային շրջանում տեղաշարժով կոտրվածք է ստանում։ Տեղափոխում են Էրեբունու հիվանդանոց, ռենտգեն և սոնոգրաֆիկ հետազոտություն իրականացնում, անալիզներ անում և 5 օրից դուրս գրում։ Արձանագրվում է բարդ կոտրվածքի փաստը։ «Կոֆոեդը» հետ է ընդունում նրան, և առ այսօր Սվետլաննա Իվանովնան ապրում է «Մեկուսարան» ցուցանակը կրող այս սենյակում, երկու տատիկների հարևանությամբ։
Մեր կամավորը պարբերաբար բարի տատիկին հյուր է գնում, խնամքի պարագաներ տանում, զրուցում։ Դեռ մայիսին դիմել է Ռուսաստանի հյուպատոսություն՝ կնոջ փաստաթղթերը վերականգնելու համար: Դիմումը ընդունվել է, պաշտոնական հարցում է ուղարկվել՝ Սվետլանա Իվանովնայի՝ Ռուսաստանի քաղաքացի լինելու փաստը հասատելու կամ մերժելու նպատակով:
Ըստ տիկնոջ պատմածի՝ ինքն ամուսին ու աղջիկ է ունեցել, որոնց կորցրել է։ Իր հիշողություններով վերականգնել ենք կենսագրությունը և դիմել «Սպասիր ինձ» հաղորդաշարին։ Հույսով սպասում ենք, որ հնարավոր է՝ հրաշք կատարվի, ընտանիքը գտնվի և արձագանքի։
․․․ Սվետլանա Իվանովնան ինքնուրույն քայլել չի կարողանում, մահճակալի եզրերից բռնելով՝ թեթևակի տեղաշարժվում է, վերջերս արդեն քայլակ էլ է օգտագործում։ Օրվա հիմնական մասն անցկացնում է անկողնուն թիկն տված և երազում է դրսի աշխարհի մասին։ Ու անվերջ ժպտում է իր կապտաջինջ աչքերով։
«Հայ Ձմեռ պապի» բարերարների աջակցությամբ շարժական ռենտգեն ապարատով կրկնական նկարահանում է կատարվել, արդյունքը ներկայարվել բժշկներին։ Վիճակը նույնն է, կոնք-ազդրային կոտրվածքը վերականգնելու միակ ճանապարհը բարդ վիրահատությունն է և պրոթեզը։ Սակայն մտավախություն կա, որ Աննա Իվանովնայի հյուծված օրգանիզմը չի դիմանա այդ ծանր վիրահատությանը։
․․․ Ի՞նչ անել։
Այցելել, զրուցել, փայփայել, ջերմությամբ շրջապատել։
Սնունդ տանել պետք չի՝ «Կոֆոեդը» հոգում է։ Բացի այդ, սխալ սնունդից սանիտարական խնդիրներ կարող են առաջանալ։
Ռուսերեն է հասկանում միայն, սիրով զրուցում է, երբեք ոչնչից չի բողոքում, շարունակ ժպտում է։
ՍԵՐ, ՋԵՐՄՈՒԹՅՈՒՆ, ՀԱՐԳԱՆՔ, ՈՒՇԱԴՐՈՒԹՅՈՒՆ․ սա է այն ամենը, ինչ մենք՝ սոցիալական մարդիկս, կարող ենք տալ ասոցիալ տատիկին։
․․․ «Մեկուսարան» ցուցանակը կրող սենյակում մեզ սպասում է Սվետլանա Իվանովնան՝ գորշ ներքնակին թիկն տված, իր աննման ժպիտը աշխարհին ու մարդկանց նվիրելով»,-ֆեյսբուքյան իր էջում գրել է «Հայ ձմեռ պապ» հիմնադրամի տնօրեն Արմինե Պետրոսյանը։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ