Ձեր վստահելի աղբյուրը

Եվրոպական խորհրդի հեռացող նախագահ Դոնալդ Տուսկը կդառնա Եվրոպական ժողովրդական կուսակցության (ԵԺԿ- EPP) նոր նախագահ: Այս մասին հայտնել է ԵԺԿ-ն՝ այսօր Զագրեբում կայանալիք իր համագումարին ընդառաջ:

Միջազգային մակարդակով ամենահայտնի լեհ քաղաքական գործիչը կփոխարինի ֆրանսիացի Ժոզեֆ Դոլին, որը ղեկավարում է ԵԺԿ-ն 2013 թվականից ի վեր: Այս մասին գրել է Total Croatia News-ը։

Չնայած Տուսկը չի հայտարարել իր թեկնածությունը, սակայն կուսակցությունն իր կայքում հայտնել է, որ ժողովրդավարական Լեհաստանի ամենաերկարակյաց վարչապետը պաշտոնի համար միակ թեկնածուն է:

Նշվում է, որ Տուսկը վերջերս ասել էր, որ չի առաջադրվի Լեհաստանի նախագահի պաշտոնում։
Եվրոպական աջակենտրոն կուսակցություններն ընտրում են նոր ղեկավարություն՝ մայիսին կայացած եվրոպական ընտրություններում հարաբերական հաղթանակ տոնելուց հետո։

Օրակարգում է նաև ԵՄ ընդլայնումը Արևմտյան Բալկաններում, մասնավորապես այն բանից հետո, երբ Ֆրանսիան վերջերս վետո դրեց Հյուսիսային Մակեդոնիայի և Ալբանիայի հետ անդամակցության բանակցությունների մեկնարկի վրա:

Ակնկալվում է, որ ԵԺԿ-ն կառաջարկի և կիրականացնի ավելի արդյունավետ քաղաքականություն կլիմայի փոփոխության դեմ պայքարի, երիտասարդ սերունդներին հզորացնելու և Եվրոպայում և հարևանության երկրներում ժողովրդավարությունն ու խաղաղությունը պաշտպանելու համար:
ԵԺԿ-ն հիմնադրվել է 1976 թ.-ին՝ Քրիստոնեա-դեմոկրատական, պահպանողական և այլ կենտրոնամետ կուսակցություններ միավորելով:

Զագրեբում ԵԺԿ 26-րդ համագումարում սպասվում է ավելի քան 2000 մասնակից, որն առաջին անգամ անցկացվում է Խորվաթիայում՝ ԵՄ ամենաերիտասարդ անդամ պետությունում, որը նախագահելու է ԵՄ-ում 2020-ի առաջին կեսին և պատրաստվում է մուտք գործել Շենգեն և եվրո գոտիներ:

Համագումարին մասնակցելու են մի շարք պետությունների և կառավարությունների ղեկավարներ, այդ թվում ՝ Գերմանիայի կանցլեր Անգելա Մերկելը, ԵԺԿ-ի եվրոպական բարձրագույն պաշտոնյաները, Տուսկը և հանձնաժողովի հեռացող և նոր նախագահները՝ Ժան Պոլ Յունկերն ու Ուրսուլա ֆոն դեր Լեյենը: Մասնակցելու է նաև ՀՀ երրորդ նախագահ Սերժ Սարգսյանը։

Բացի ԵԺԿ նախագահից, 700-ից ավելի պատվիրակները կընտրեն 10 փոխնախագահներ, գլխավոր քարտուղար և գանձապահ: