Այսօր ունենք մեծ նախարարություններ՝ լիքը պարապ մարդկանցով. Փաշինյան
Կառավարության այսօրվա նիստում ՀՀ պետական եկամուտների կոմիտեի 2020-2024 թվականների զարգացման և վարչարարության բարելավման ռազմավարական ծրագիրը հաստատելու մասին որոշման նախագծի քննարկումն անցավ բուռն մթնոլորտում։
ՊԵԿ նախագահ Դավիթ Անանյանը ներկայացնելով նախագիծն՝ ասաց, որ ռազմավարական ծրագրով նախանշվում են ՀՀ պետական եկամուտների կոմիտեի առաջիկա տարիների առաջնահերթությունները, որոնք ուղղված են լինելու հարկային և մաքսային վարչարարության բարելավմանը:
«Ռազմավարական ծրագիրն իրենից ներկայացնում է ՊԵԿ աշխատակազմի ցանկությունների, իղձերի և երազանքների մի ամբողջություն»,- ասաց Դավիթ Անանյանը՝ հավելելով, որ ռազմավարությունը ներառում է 5 նպատակ, 9 ենթանպատակ և 55 կոնկրետ միջոցառում։
Այսպիսով, ռազմավարական ծրագրով ներկայացվում են ՀՀ պետական եկամուտների կոմիտեի զարգացման 5 ռազմավարական նպատակներ և այդ նպատակների իրագործմանն ուղղված գործողություններ, որոնք ընդգրկում են ՀՀ պետական եկամուտների կոմիտեի առաջիկա 5 տարիների զարգացման ուղղությունները՝ հարկային և մաքսային մարմինների կառավարման համակարգերի կատարելագործման, հարկային և մաքսային վարչարարության կազմակերպման, ստվերի դեմ պայքարի, ենթակառուցվածքների արդիականացման, հանրության հետ երկխոսության մակարդակի բարելավման, հաշվետվողականության և թափանցիկության ապահովման, մարդկային ռեսուրսների կառավարման համակարգի կատարելագործման բնագավառներում:
Ռազմավարության վերաբերյալ իր վերապահումները ներկայացրեց ֆինանսների նախարար Ատոմ Ջանջուղազյանը, երկար քննարկումից հետո առաջարկեց ռազմավարությունն առկախել այնքան ժամանակ, քանի դեռ չունեն հարկային համակարգի բարեփոխումները. «Եթե մենք զուգահեռ ռազմավարություններ ընդունենք, և դրանք ներդաշնակեցված չլինեն, պարզ չի լինի, թե որ ուղղությամբ են ընթանում փոփոխությունները»։
Նրա խոսքով՝ այնպիսի տպավորություն է, որ այս ռազմավարությունն ուղղված չէ վարչարարության բարեփոխումներին, մինչդեռ ենթադրվում է, որ վարչարարության բարեփոխումները սերտորեն պետք է կապված լինեն հարկային համակարգի հետ։
Ջանջուղազյանը նաև խոսեց Գյումրիի ավտոմաքսատան տարածքում արտաքին տնտեսական գործունեության սպասարկման կենտրոն կառուցելու համար նախատեսված ծախսերի ավելացման մասին. «Ես առաջարկում եմ ձեռնպահ մնալ նախագիծն այս ձևով առաջ տանելուց, հատկապես, որ պարզ չէ, թե ի՞նչ կարիք են բավարարում և ինչո՞ւ են երկու անգամից ավելի շատ ծախս անում»։
Վարչապետ Նիկոլ Փաշինյանն էլ անդրադառնալով ԱՏԳ-ների կառուցմանը՝ նշեց. «Մենք ավտոմաքսատունը Գյումրի տեղափոխելու պարտավորություն ստանձնեցինք։ Այս պարտավորությունը ժամկետներով սահմանափակված չէին, բայց հաշվի առնելով ավտոմեքենաների բումը մենք մտածեցինք, եթե արագ գործենք, կնպաստենք, որ ֆինանսական հոսքեր կկենտրոնանան Գյումրիում։ Կարծում եմ՝ դա արդարացնում է իրեն։ Բայց երբ որոշվել է ավտոմաքսատան մոտ արտաքին տնեսական գործունեության սպասարկման կենտրոն, նախահաշվային հաշվարկները կրկնապատկվել են»։
ՊԵԿ նախագահ Դավիթ Անանյանն էլ նշեց, որ համամիտ չէ Ատոմ Ջանջուղազյանի հետ, վերջինս էլ արձագանքեց. «Դե եկեք անօրինական գործողություններով իրավական կոչեր անենք, եկեք բռնության մասին կես ժամ քննարկում ունենանք, բայց փոխարենը ինքներս մեզ թույլ տանք անօրինական գործողություններ իրականացնել»։
Նիկոլ Փաշինյանը կրկին անդրադառնալով ԱՏԳ-ներին, ասաց. «Անունը դնում ենք ԱՏԳ, բայց մեզ պետք է հետևյալը, որ արտահանողին և ներմուծողին Կենտրոնից չուղարկեն Մասիվ, Մասիվից 3-րդ Մաս,Արտաշատ հետո Թալին, Թալինից Մեղրի, Նոյեմբերյան և այլն։ Սա մեր այսօրվա իրական համակարգն է»։
Վարչապետը նշեց նաև, որ այսօր ունենք մեծ նախարարություններ՝ լիքը պարապ մարդկանցով, որոնց միակ ակնկալիքն այն է, թե երբ է ժամը լրանում, որ գնան տուն: «Եվ պետք չէ Հռոմի պապից ավելի կաթոլիկ լինել»,- զայրացած ասաց վարչապետը, իսկ հետո ծիծաղելով ավելացեց. «Տվյալ դեպքում Հռոմի պապը ես եմ»։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
