![](https://panorama.am/news_images/737/2210221_1/bi.thumb.jpg)
Ծառայությունից խուսափած քաղաքացիներն այլևս չեն կարող գումարի դիմաց ազատվել քրեական պատասխանատվությունից
Կառավարությունը 2020 թվականի հունվարի 1-ից չի երկարաձգվի «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքի գործողության ժամկետը։
Օրենքը հնարավորություն է տալիս 27 տարին լրացած, պարտադիր զինվորական ծառայությունից խուսափած քաղաքացիներին սահմանված ժամկետում մուծել օրենքով սահմանված դրույքաչափերին համապատասխան վճարը և վերադառնալով հայրենիք, ազատվել քրեական հետապնդումից:
Պաշտպանության նախարար Դավիթ Տոնոյանը նշեց, որ օրենքի գործողության ժամանակային ընթացքը ցույց է տվել, որ օրենքը դարձել է պարտադիր զինվորական ծառայությունից խուսափելու միջոց կամ այն խթանելու հանգամանք, որի արդյունքում 18 տարին լրացած շատ քաղաքացիներ, հույսը դնելով օրենքով կարգավորվող հարաբերությունների և դրանում սահմանված ժամկետների պարբերաբար երկարաձգումների վրա, նախընտրում են Հայաստանը լքելու միջոցով խուսափել զորակոչից։ Այնուհետև, ըստ նախարարի, 27 տարին լրանալուց հետո վճարել համապատասխան գումարը և ազատվել քրեական պատասխանատվությունից, ինչն իրավահավասարության ապահովման սահմանդրական սկզբունքի տեսանկյունից արդարացի չէ իրենց սահմանադրական պարտականությունը կատարած քաղաքացիների նկատմամբ:
«Չնայած վերջին տարիներին զինվորական ծառայության գրավչության ապահովման գործընթացում կատարված իրական քայլերից, զինվորական ծառայության զորակոչերից խուսափող անձանց թիվը չի նվազում, ինչը մեր կարծիքով, կապված է նաև տվյալ օրենքի առկայության հետ»,- նշեց Դավիթ Տոնոյանը։
Հաշվի առնելով վերոգրյալը՝ նախարարը հայտնեց, որ նպատակահարմար չէ խրախուսական համարվող Օրենքի գործողության ժամկետի հետագա երկարաձգումը այն նույն պայմաններով, որոնք այս պահին գործում են օրենքում:
Վարչապետ Նիկոլ Փաշինյանը նշեց, որ օրենքի երկարաձգում այլևս չի լինելու, բայց այդ օրենքը շարունակում է ուժի մեջ մնալ մինչև 2019 թվականի դեկտեմբերի 31-ը:
«Կարևոր է արձանագրել հետևյալը, որ մինչ դեկտեմբերի 31-ը օրենքը ուժի մեջ է և այն սիրելի հայրենակիցները, որոնք համարում են, որ լավ չի, որ այս օրենքի ուժը չեն երկարաձգելու, հնարավորություն ունեն հենց այսօր ինքնաթիռի տոմս առնել, գալ Հայաստան, այս բոլոր գործընթացներն անցնեն և Նոր տարին էլ Հայաստանում նշեն»,- նշեց վարչապետը։
Լրահոս
Տեսանյութեր
![ԱՆԻՖ-ի գործով Ավինյանը Քերոբյանի հայտարարությունը սուտ որակեց](https://panorama.am/video_images/17/50276_1/f66a0f86157c73_66a0f86157cb2.png)
![Կոնկրետ թիրախավորված է Գերասիմ Վարդանյանը. Փաստաբան](https://panorama.am/video_images/17/50265_1/f669fa592e5df9_669fa592e5e49.jpg)