Ձեր վստահելի աղբյուրը

Իրատես» թերթը գրում է. «Կառավարությունը որոշել է հանրաքվեն անցկացնել պահուստային միջոցներով, որը գոյացել է քրեական գործերով բյուջե վերադարձած միջոցներից։ Հիշեցնենք՝ խոսքը 3 միլիարդ 447 միլիոն 366 հազար դրամի մասին է։ 2 տարվա իշխանությունն անընդհատ հայտարարում է, թե կոռուպցիայի դեմ պայքար է տարվում և նախկին «թալանչի» իշխանությունների գողացածը կոպեկ առ կոպեկ, ավելի ճիշտ, «քյաբաբ առ քյաբաբ» վերադարձվելու է բյուջե։

Բայց այսքան ժամանակ այս «ամենաթափանցիկ» կառավարությունը հանրությանը հաշվետվություն ներկայացրե՞լ է, թե գողացված գումարներն ինչ նպատակներով են ծախսվում։ Հարց է նաև` այդ գումարները վերադարձվել են բյուջե քրեական գործերի շրջանակներու՞մ, թե՞ կոնկրետ անձինք պիտի գումար տային պահուստային ֆոնդին, տվել են: Օրինակ, ով իմացավ, թե Ալեքսանդր Սարգսյանն ինչու էր հենց այնպես պետությանը փոխհատուցել 18,5 մլն դոլար։ Ընդհանրապես այս գործընթացը բավական ուշագրավ նրբերանգներ ունի, եթե հիշենք նաև Աննա Հակոբյանի այն հայտարարությունը, թե ավելի լավ, որ պետբյուջեից գողացված միջոցները փոխանցվում են իր հիմնադրամներին։ «Գումարի ծագումն անձնապես ինձ համար կապ չունի, որովհետև մտածում եմ՝ կապ չունի՝ ինչ ձևով է հասել նրա ձեռքը, ով մեզ է փոխանցում , մենք միևնույն է ծառայեցնելու ենք այն ամենաճիշտ, ամենաօգտակար նպատակներին։ Այդ գումարը, եթե որևէ ձևով հասել է ինչ-որ մեկին, եթե մնա իր մոտ, ավելի օգտակար չի լինի, քան եթե հասնի մեզ»,- ասել էր նա:

Իսկ հնարավո՞ր է, որ բյուջե վերադառնալու փոխարեն միանգամից «գողացված» միջոցներն ուղղվում են Աննա Հակոբյանի հիմնադրամներին։ Ու արդյոք դա նշանակում է, որ նրանց նախկինում արված «մեղքերը» ջրվում են։ Ժողովրդի իշխանությունն ամեն դեպքում լավ կանի, որ հասարակությանը պարբերաբար ներկայացնի, թե որքան «գողացված» միջոցներ են վերադարձվել բյուջե և ամենակարևորը՝ դրանք ինչպես ու ինչ նպատակների համար են ծախսվել»: