Ձեր վստահելի աղբյուրը

Իննամյա Հայկը 19-րդ վիրահատության շեմին շատ հանգիստ է, ուրախ, կենսախինդ ու դրական։ Բժիշկներն ասում են՝ ամենայն հավանականությամբ սա վերջինն է լինելու։ Կարելի է ասել՝ Հայկի քայլելուն երեք ամիս է պակաս։

Գերմանիայում հուլիսի 1-ին նշանակված վիրահատության ժամանակ հանելու են երեխայի  ոտքերում նախորդ վիրահատության ժամանակ տեղադրված մետաղական կոնստրուկցիաները։

Հայկի փոխարեն անհանգիստ ու փնտրտուքների մեջ է նրա մայրը՝ Պայծառ Ներսեսյանը։ Որդուն ոտքի կանգնեցնելու ճանապարհին նա օգնողների, աջակցողների պակաս չի ունեցել։ Վիրահատությունների մեծ մասի ծախսերն իրենց վրա են վերցրել ծանոթ ու անծանոթ մարդիկ։ Այսօր էլ Պայծառն ու Հայկը բարի մարդկանց կարիքն ու անհրաժեշտությունն ունեն։

«Վիրահատությունը հուլիսի 1-ին է նշանակված, անհրաժեշտ է 15 հազար եվրո գումար։ Այսօրվա՝ ապրիլի 20-ի դրությամբ մենք արդեն ունենք գումարի կեսը՝ 7.500 եվրո»,- ասում է Պայծառը։

Նա հասկանում է՝ աշխարհում դժվար ու ծանր օրեր են, բայց իրենք Հայկի ծննդյան պահից ի վեր այս  վիրահատության ու դրա արդյունքների մասին են երազել։ Հաղթանակը շա՜տ մոտ է, մի քանի քայլ, ու այն իրենց ձեռքում կլինի։

«Այս ծանր ու բարդ ճանապարհը կարողացել ենք անցնել բարի մարդկանց, նաև Հայկի ուժեղ ու հանգիստ բնավորության շնորհիվ։ Ես այնքան ուրախ եմ, որ Հայկը լացկան չի, վիրահատություններից հետո էլ շատ զուսպ է, ցավերի դեպքում էլ լռում է կողքին պառկած մյուս բալիկներին չխանգարելու համար»,- պատմում է մայրը։

Այս օրերին Հայկն էլ մյուս դպրոցականների պես առցանց է դասերն անում։ Հաճախում է թիվ 154 հիմնական դպրոց, սովորում է երրորդ դասարանում։

«Իմ տղան գերազանցիկ է»,- հպարտանում է մայրը։

Նա պատմում է, որ ամիսներ առաջ դասարան եկած հոգեբանը զրուցել է աշակերտների հետ, ապա  հիացմունքով իրեն հայտնել՝  Հայկն այն քչերից է, որ հոգեբանական որևէ խնդիր չունի։ Եվ սա չնայած բազում առողջական բազում խնդիրները հաղթահարելու համար արված մոտ երկու տասնյակ վիրահատությունների։

«Ասաց՝ բրավո Ձեզ։ Սա մեծ գնահատական է ինձ համար»,- անկեղծանում է Պայծառը։

Դպրոց գնալու ճանապարհը հեշտացրել է Հայկի հովանավորներից մեկը՝ շենք մտնող նոր սանդուղքներ է կառուցել։ Հայկը հիմա շատ է կարոտում իր ընկերներին։

Մայրը Հայկի առողջական վիճակի բարելավման, հասած հաջողությունների համար շնորհակալ է բոլորին՝ հայաստանցի ու արտասահմանցի բժիշկներին, իսկ ավելի շատ՝ բարի մարդկանց: Նրանք ամենուր եղել են օգնության կարիք ունեցող մոր և որդու կողքին՝ Հայաստանում, Մոսկվայում, Գերմանիայում:

Տղայի պատմությունը շատերին է ծանոթ։ Հայկը ծնվել է 5.5 ամսականում, 600 գրամ քաշով՝ անհաս, զարգացած չէր կոնքազդրը, երկկողմանի հոդախախտ ուներ, նաև մանկական ուղեղային կաթված: Քայլելու մասին երազելն արդեն համարձակություն էր: Խնդիրները չեն ընկճում մորը: Ամեն փոքր հաղթանակի ու իրեն մարդկանց ձեռք մեկնելու հետ Պայծառն ավելի է ուժեղանում, իսկ Հայկը՝ ամրանում: Եվ տեղացի, և արտասահմանցի մասնագետները գոհ ու ոգևորված են Հայկի ցուցաբերած արդյունքներով:

Նրանց մեծ երազանքի իրականացմանը, հաղթանակի հասնելուն օգնելու համար կարող եք զանգահարել Պայծառ Ներսեսյանին` +(374) 93586621 հեռախոսահամարով։

Հայկի մոր՝ Պայծառ Ներսեսյանի անունով ՎՏԲ բանկում հաշվեհամար է բացել։ Աջակցել ցանկացողները կարող են փոխանցում կատարել հետևյալ հաշվեհամարին. հայկական դրամով` 16046032978404
դոլարով` 16046032978405
եվրոյով՝ 16046032978406
ռուբլիով՝ 16046032978407 հաշվեհամարներին։
ArCa քարտի համարն է՝ 6769 3071 0003 1522։