Ձեր վստահելի աղբյուրը

«Երեկ երեկոյան «Հայկական ժամանակ» թերթի հոդվածագիրը նշել էր, որ Գեղամ Նազարյանը ստում է և Կիրանցի բնակիչների հետ հանդիպման ժամանակ չի հնչել միտք, թե սահմանը կարող է անցնել գյուղի կենտրոնով»,-այսօր ԱԺ նիստի ժամանակ ասաց «Հայաստան» խմբակցության պատգամավոր Գեղամ Նազարյանը՝ անդրադառնալով երեկ Փաշինյանի և Կիրանցի բնակիչների հանդիպումից հետո իր հնչեցրած մտքերին։

Նա ասաց, որ խոսքը ոչ թե աշխարհագրական կենտրոնի մասին է, այլ  պատմական

«Գեղամ Նազարյանը երբեք չի ստում, գյուղի կենտրոնն այնտեղ է, որտեղ գտնվում է գյուղի եկեղեցին, դպրոցը, կալն ու գրասենյակը»,-ասաց նա։

Պատգամավորը հայտարարեց, որ չի կարելի հոգեբանական կտտանքների ենթարկել մարդկանց, որոնք տասնամյակներ ապրել են սահմանում և պահել այն։

«Գյուղի բնակիչների օրինական պահանջը մեկն է՝ իրենց օրինական պատկանող ոչ մի թիզ հող չհանձնել հարևան հանրապետությանը»,-ասաց Նազարյանը։

Նա հայտարարեց, որ կիրանցեցիները պահանջում են, որ ՀՀ-ի տարածքից ոչ մի ք/մ  չհանձնվի, որովհետև մտավախություն ունեն, որ նույնիսկ խորհրդային տարիներից կադաստրով իրենց պատկանող հողերը կարող են հանձնվել։

Անդրադառնալով իրեն ստի մեջ մեղադրելուն՝ ընդդիմադիր պատգամավորը հիշեցրեց. «Երբ հայտնի դարձավ, որ ՔՊ-ի նոր գրասենյակը պետք է լինի Սայաթ-Նովա-Չարենց խաչմերուկում։ Ես գրեցի. «Շատ ուրախ եմ, որովհետև, կարծես թե ՔՊ-ի գործերը լավացել են և իրենք նոր գրասենյակ ունեն»։ Դրան հաջորդեց տաղանդավոր քաղաքական գործիչ, այսօր՝ ԿԸՀ նախագահ Վահագն Հովակիմյանի հուզառատ գրառումն այն մասին, թե Գեղամ Նազարյանը ստում է և  նման ոչ մի բան չկա։ Մեկ օր հետո ինքն այնտեղ նիստի էր մասնակցում, հետո ներողություն էլ չխնդերց։ Այսքանը ստի մասին»։