Ձեր վստահելի աղբյուրը

COVID-19-ի պատվաստանյութը դժվար թե շուտ ստացվի, ավելի լավ է բնակչությունն ապավինի սոցիալական մեկուսացման միջոցառումներին: Ինչպես փոխանցում է «Ինտերֆաքս»-ը, այդ մասին հայտարարել է ամերիկացի գիտնական, քաղցկեղի, ՄԻԱՎ-ի և մարդու գենետիկայի մասնագետ Ուիլյամ Հազելթայնը:

«Մի լսեք այն քաղաքական գործիչներին, ովքեր ասում են՝ մենք դա կունենանք այն ժամանակ, երբ ես վերընտրվեմ: Գուցե դա մեզ հաջողվի, բայց ես պարզապես ասում եմ, որ այն դյուրին գործ չէ»,- հինգշաբթի  օրը գիտնականին ցիտել է բրիտանական The Guardian պարբերականը:

«Ամեն անգամ, երբ մարդիկ փորձում էին պատվաստանյութ ստեղծել ընդդեմ SARS-ի (սուր շնչառական համախտանիշի) կամ MERS-ի (մերձավոր արևելյան շնչառական համախտանիշի), դրանք չեն պաշտպանել»,- ասել է գիտնականը:

Վերջինս բացատրել է, որ կորոնավիրուսների նախորդ տեսակների դեմ մշակված պատվաստանյութերը չեն կարող պաշտպանել քթի լորձաթաղանթը, որով փոխանցվում է հիվանդությունը:

Միևնույն ժամանակ, Հազելթայնը կարծում է, որ COVID-19 համաճարակի դեմ պայքարի լավագույն միջոցը վարակի փոխանցման ճանապարհի բացահայտումն է և մեկուսացման խիստ միջոցառումների կիրառումը: Նա նաև հաստատակամորեն խորհուրդ  է տալիս, որ բնակչությունը լվանա ձեռքերը, դիմակներ հագնի, մաքրի այն մակերեսները, որոնց հաճախ շփվում է և պահպանի սոցիալական հեռավորությունը:

Նա կարծում է, որ Միացյալ Նահանգները, Ռուսաստանը և Բրազիլիան, որոնք համապատասխանաբար հայտնաբերված դեպքերի քանակով զբաղեցնում են առաջին, երկրորդ և երրորդ տեղերը, բավարար միջոցներ չեն ձեռնարկել վարակակիրների հարկադիր մեկուսացման համար: Միևնույն ժամանակ, Հազելթայնը բարձր է գնահատել Չինաստանի և Հարավային Կորեայի ձեռնարկած նմանատիպ միջոցառումները:

Մայիսի սկզբին ԱՄՆ նախագահ Դոնալդ Թրամփը հայտարարել էր, որ ամերիկացի փորձագետները մեծ քայլեր են կատարում կորոնավիրուսի վարակի դեմ պատվաստանյութերի, դեղերի և բուժման մեթոդնեի մշակման գործում: «Կարծում եմ, որ մենք նույնիսկ առաջ ենք անցնում ժամանակացույցից»,- ասել  էր Թրամփը՝ հավելելով, որ պատվաստանյութերի փորձարկումները գտնվում են առաջին և երկրորդ փուլերում:

Ըստ նրա, երբ պատվաստանյութը ստեղծվի, ԱՄՆ զինված ուժերը կներգրավվեն դրանք ամբողջ երկրում բաշխելու համար: