Ձեր վստահելի աղբյուրը

«Ինձ հետաքրքրում է՝ համավարակի օրերին մենք ունեցե՞լ ենք հստակ ռազմավարություն, թե ինչ ճանապարհով պետք է հաղթահարել վիճակը»,- խորհրդարանում նման հարց հնչեցրեց ԱԺ «Լուսավոր Հայաստան» խմբակցության պատգամավոր Սրբուհի Գրիգորյանը՝ դիմելով վարչապետ Նիկոլ Փաշինյանին։

Պատգամավորն առաջարկեց այսօր առանցքային ռազմավարություն կազմել և խնդրի լուծման կարճ ճանապարհ գտնել։

Պատասխանելով պատգամավորի հարցին՝ Ն․ Փաշինյանն ասաց, որ հենց սկզբից կառավարությունն ունեցել է ռազմավարություն, և հենց այդ ռազմավարությունը կապված է եղել յուրաքանչյուրի անհատական վարքագծի հետ։

«Իմ պատկերացումը եղել և շարունակում է մնալ այն, որ մենք պետք է լայնորեն իրազեկենք հանրությանը և քաջալերենք մեր հայրենակիցներին, որպեսզի նրանք պաշտպանության բոլոր միջոցները ձեռնարկեն։ Մեր ձախողումը եղել է այն, որ մենք ՀՀ միջին վիճակագրական քաղաքացուն չենք կարողացել կա՛մ պարտադրել, կա՛մ համոզել, որ նա պահի հակահամաճարակային կանոնները։ Սրա պատճառները բազմաթիվ են՝ և՛ պոզիտիվ, և՛ նեգատիվ»,- ներկայացրեց վարչապետը։

Նրա խոսքով, կորոնավիրուսի սկզբնական շրջանում ամբողջ աշխարհում խուճապային իրավիճակ էր, և այդ շրջանում ՀՀ կառավարությունը խնդիր էր դրել՝ թույլ չտալ խուճապ ՀՀ քաղաքացիների շրջանում.

«Եվ մենք կարողացանք մեր քաղաքացիների շրջանում խուճապի տարածումը կանգնեցնել, բայց մեր սխալն այն էր, որ չկարողացանք ճիշտ սահմանը գտնել՝ ինչքան հանգստացնել մարդկանց, ինչքան՝ խուճապ տարածել։ Որովհետև, քանի որ մենք շատ էմոցիոնալ ենք՝ մեր խուճապն էլ է ծայրահեղ, հանգստությունն էլ։ Օրինակ, մինչ այսօր ՀՀ-ում կան մարդիկ, ովքեր խոսում են վարակի՝ բլեֆ լինելու մասին»։

Վարչապետը նշեց՝ այսօր ինչ տեղի է ունենում ՀՀ-ում, բոլորը առողջապահական համակարգին են վերագրում, բայց սա առողջապահական համակարգի խնդիր չի, քանի որ առողջապահությունը մինչև հիմա իր առջև դրված խնդիրը լուծել է՝ հիվանդներին հնարավորինս որակյալ սպասարկելով։

«Եվ վարակվելուց հետո ես այցելեցի վիրուսի երկու ամենախոշոր կենտրոնները, տեսա՝ բացառիկ ընտանեկան մթնոլորտ է հաստատված, մարդիկ միայն շնորհակալության խոսքեր են ասում, և դրա մեջ ձև չկա։ Մեր պրոբլեմը առողջապահական համակարգից դուրս է, մեր պրոբլեմը, կներեք, մեր բիսեդկաներում է, մեր թաղերում ու տներում է։ Այսօր առավոտյան աշխատանքի էի գնում, մեքենայի պատուհանից նայում եմ՝ Պռոշյան փողոցի վրա երեք 40-50 տարեկան մարդիկ համարյա փոր փորի տված իրար հետ զրույցում են, դիմակները էս վիճակում (վարչապետն իջեցրեց դիմակը ծնոտի տակ՝ ցույց տալով այդ վիճակը, խմբ.)։ Այսինքն՝ դիմակը ոչ թե նրա համար է, որ իրենք պաշտպանվեն, այլ նրա համար, որ ոստիկանը երևա, իրենք բարձրացնեն իրենց դեմքին։ Սա մենք ենք, ես ինձ էլ եմ ասում ու ենթադրում եմ, որ այս վարքագծային կանոնն իմ մեջ էլ կա։ Բացառված է, որ ՀՀ քաղաքացու որևէ լավ կամ վատ հատկանիշ իմ մեջ չլինի»,- շեշտեց նա։

Վարչապետն ասաց, որ ինքը հպարտ է լինել վարակված 15 հազարից ավելի քաղաքացիներից մեկը։ Այնուամենայնիվ, վարչապետը հորդորեց՝ պետք չէ իմ սխալները կրկնել, սիրելի քաղաքացիներ։

Ս. Գրիգորյանն էլ արձագանքեց՝ պետք է ամեն ինչ անել, որ էլ ընդհանրապես չսխալվենք այս ոլորտում. «Մենք բազմաթիվ առաջարկներ ենք ուղարկել պարետին։ Օրինակ, առաջարկում էինք սուպերմարկետներ միայն ձեռնոցներ ու դիմակ ունենալու դեպքում մարդկանց մուտքը թույլ տալ, սակայն առաջարկից երեք ամիս անց միայն այն ընդունվեց»։

Ի պատասխան վարչապետն ասաց՝ շատ ճիշտ է։

«Բայց պարետատունը պետք է հենվի այն հնարավորությունների վրա, որոնք կան ՀՀ-ում։ Եթե այդ ժամանակ այստեղ դիմակ չկար, մենք սահմանեինք, որ առանց դիմակի մուտքը արգելվելու է, ի՞նչ էինք ունենալու։ Ինձ հավաստիացրել են, որ դեպք է եղել, երբ քաղաքացուն թույլ չեն տվել բանկ մուտք գործել առանց դիմակի, այլ մարդուցէխնդրել, որ իր օգտագործած դիմակը տա, որպեսզի մտնի բանկ։  Դուք ինչ ասում եք, լրիվ ճիշտ է, բայց եթե պարետատունը որոշեր դիմակների կրումը պարտադիր լիներ, ի՞նչ կլիներ»,- եզրափակեց խոսքը վարչապետը։