Ձեր վստահելի աղբյուրը

«Ադրբեջանի միջոցով ուղղակի ագրեսիա իրականացնելով Արցախի նկատմամբ՝ Թուրքիան այսօր ձգտում է  բանկցային ֆորմատի մաս կազմել, և երեկվա Էդողանի հայտարարությունը դրա չքողարկված ապացույցն է»,- մամուլի ասուլիսում հայտնեց թուրքագետ Ռուբեն Մելքոնյանն՝ անդրադառնալով Թուրքիայի խորհրդարանում Էրդողանի արած այն հայտարարությանը, թե Ռուսաստանը թող խոսի Հայաստանի հետ, իսկ ինքը կխոսի իր եղբայր Իլհամի հետ:

Թուրքագետի խոսքով, այս պատերազմն ավելի բյուրեղացրեց Թուրքիայի ահաբեկչական, ապակառուցողական մտածողության դրսևորումները:

Նրա խոսքով, տարբեր կոնֆլիկտներում ներգրավվելու թուրքական ոճը նույնն է՝ իրականացնել ռազմական ագրեսիա, ներխուժել տարատեսակ կոնֆլիկտների լուծման տիրույթ և եթե ոչ դիվանագիտական ճանապարհով ապա՝ ռազմական ագրեսիայից հետո փորձել տեղ գրավել բանակցությունների սեղանի շուրջ: Թուրքագետի խոսքով, Թուրքիայի վարքագիծը նույն է  եղել Սիրիայում, Լիբիայում և Արցախում:

Ռուբեն Մելքոնյանը Էրդողանի հայտարարության մեջ տեսավ Թուրքիայի բացահայտ արհամարանքը Մինսկի խմբի ձևաչափի նկատմամաբ, որը մարտահրավեր է  աշխարհում ձևավորված ձևաչափերի,  միջազգայնորեն սահմանված հարթակների նկատմամբ:

«Թուրքիայում տևական ժամանակ է սկսվել է աշխարհում ռազմաբազաների տեղակայման քաղաքականությունը, որը այդ պետության գերակայություններից»,- հայտնեց բանախոսը և փաստեց, որ տարբեր երկրներում կարելի է տեսնել Թուրքիայի դե ֆակտո և դե յուրե ռազմական ներկայությունների դեպքերը:

Նրա խոսքով, արցախյան կոնֆլիկտում թուրքական գերնպատակներից մեկը Հարավային Կովկասում՝ Ադրբեջանում իր բազայի կամ ռազմական ներկայության դե ֆակտո լեգիտիմացումն է: Ըստ Մելքոնյանի, փորձ է արվում ադրբեջանաթուրքական զորավարժություններից հետո Ադրբեջանում մնացած զինծառայողներին և զինտեխնիկային տալ լեգիտիմություն՝ ձևավորել թուրքական ռազմաբազա Ադրբեջանի տարածքում:

«Ենթադրելի է, որ  այդ բազաներից մեկը պետք է լինի Կասպից ծովի ավազանում, մյուսը՝ խորհրդանշական Նախիջևանում, որը ևս մեկ մարտահրավեր է  Թուրքիայի կողմից՝ ուղղված աշխարհի և տարածաշրջանային հավասարակշռությունների խախտմանը»,- նկատեց թուրքագետը:

Ռուբեն Մելքոնյանի կարծիքով արդեն տևական ժամանակ  ընթանոււմ է ռուս-թուրքական պրոքսի պատերազմներ այն տարածաշրջաններում, որոնք Ռուսաստանի համար կարևոր և զգայուն են:

Հիշատակելով Սիրայում տեղի ունեցած ռուս-թուրքական բախումները և այդտեղ վերջերս ՌԴ օդատիեզերական ուժերի հարվածները թուրքամետ ուժերին՝ բանախոսը նկատեց, որ դրանք այդ պատերազմենրի դրսևորումներից են:

«Միամտություն կլիներ կարծելը, թե Ռուսաստանի դաշնակից Հայատանում, իր համար զգայուն ու կարևոր տարածաշրջանում Թուրքիան չի գնալու սադրանքի և չի հրահրելու ռուս-թուրքական ճակատի  պրոքսի պատերազմ, սա գլոբալ մարտահրավեր է նաև Ռուսաստանի համար»,- շեշտեց թուրքագետը: