Ձեր վստահելի աղբյուրը

«Ես այսօր իմ հրաժարականի երկրորդ դիմումը կերկայացնեմ ԱԺ նախագահին, որից հետո նա արձանագրություն կկազմի, կհրապարակի, և արդեն այդ պահից սկսած ես կհամարվեմ ՄԻՊ պաշտոնից ազատված»,- այսօր հրավիրված մամուլի ասուլիսի ընթացքում ասաց ԱՀ ՄԻՊ Արտակ Բեգլարյանը՝ ներկայացնելով իր հրաժարականի պատճառները։

Նա տեղեկացրեց, որ ԱՀ նախագահից առաջարկ է ստացել գործադիր իշխանությունում այլ պաշտոն զբաղեցնելու։ Ըստ Արտակ Բեգլարյանի, այժմ կարիք կա, որ ինքը աշխատի գործադիր իշխանությունում, հատկապես, որ առաջարկված աշխատանքն, իր խոսքով, ամբողջովին համապատասխանում է իր կարողություններին։

«Առաջարկված նոր պաշտոնում ես ավելի օգտակար կարող եմ լինել առկա ճգնաժամի հաղթահարման գործում»,- ասաց նա։

Միևնույն ժամանակ, Արտակ Բեգլարյանը տեղեկացրեց, որ ԱՀ ՄԻՊ փաստահավաք խմբի ջանքերով այսօր ևս երկու զեկույց պատրաստ կլինի, որոնցում ներկայացված կլինեն պատերազմի ընթացքում հակառակորդի հանցագործությունները։

«Ընդհանուր առմամբ, ես փաստահավաք գործունեությունը համարում եմ ավարտին մոտեցող, թեև այլ ուղղություններով դեռևս փաստահավաք գործունեության կարիք կա։ Հավաքագրված տվյալների ամփոփման և զեկույցներով ներկայացման կարիք ևս կա։ Բայց Ես համոզված եմ, որ ՄԻՊ աշխատակազմը, հետագայում նաև հաջորդ ՄԻՊ-ը կշարունակեն այս աշխատանքները, իսկ ներսում առկա մարդու իրավունքներին վերաբերող խնդիրներով աշխատակազմը շարունակելու է աշխատել»,- նշեց նա։

Արտակ Բեգլարյանը վստահեցրեց՝ թեև լքում է ՄԻՊ պաշտոնը, բայց որպես անձ մարդու իրավունքների պաշտպանության դիրքերը չի լքում։ Նա նշեց, որ գործադիր իշխանությունում զբաղվելու է տարբեր խնդիրների լուծմամբ։

Թեև Արտակ Բեգլարյանը չհայտնեց՝ ինչ պաշտոն է զբաղեցնելու գործադիրում, այնուամենայնիվ նշեց, որ զբաղվելու է ճգնաժամի կարճաժամկետ կառավարման հարցերով։

«Խնդիր կա արագ քայլերով հաղթահարելու գոնե այն խնդիրները, որոնք հնարավոր է հաղթահարել  կարճաժամկետ հատվածում։ Իսկ միջնաժամկետ և երկարաժամկետ ծրագրերի համար պետք է պլանավորենք և իրականացնենք բարեփոխումներ։ Եվ ես առավելագույնս պատրաստ եմ այդ բարեփոխումների աշխատանքներին լծվելու»,- նկատեց նա։

Որպես դեռևս գործող ՄԻՊ՝ Արտակ Բեգլարյանը ներկայացրեց այն խնդիրները, որոնք պետք է առաջնային լուծում ստանան։

«Նախ պետական համակարգը պետք է անվտանգային միջավայրի ռիսկերի նվազեցմամբ զբաղվի։ Առաջին հերթին պետք է նվազեն օբյեկտիվ ռիսկերը, և այդ ուղղությամբ ՊԲ-ն աշխատանքներ կատարում է։ Իհարկե, այստեղ ռուս խաղաղապահների դերն էլ է մեծ։ Բայց ԱԱԾ-ն, Ոստիկանությունը ևս պետք է հնարավոր բոլոր քայլերն իրականացնեն, որ անվտանգության ռիսկերը նվազեցվեն, բացերը լրացվեն։ Այստեղ կարևոր է նաև հասարակության հետ բաց շփումը, քանի որ խնդիրների մի մասը սուբյեկտիվ է, և պայմանավորված է հոգեբանական և տեղեկատվական ռիսկերով»,- կարծիք հայտնեց նա։

Արտակ Բեգլարյանի խոսքով, երկրորդ խնդիրն էլ այն է, որ կան բազմաթիվ անօթևան անձինք. ռազմական գործողությունների հետևանքով տարածքների օկուպացման պատճառով մինչև 40 հազար հոգի անօթևան է մնացել։

«Այդ մարդկանց զգալի մասն արդեն Արցախում է, և նրանք ունեն շատ լուրջ կարիքներ՝ առաջնահերթորեն կացարանի և հոգեբանի խնդիր։ Դեռևս պետք է ժամանակավոր կացարանի հարցը լուծել, իսկ երկարաժամկետ ծրագրով այդ մարդիկ նաև բնակարաններով կապահովվեն»,- ասաց Արտակ Բեգլարյանը։