Ձեր վստահելի աղբյուրը

Հունաստանի ԱԳՆ-ն ուրբաթ դեմարշ է արել Թուրքիային՝ Հունաստանի Համապոնտական ֆեդերացիայի նախագահ Յորհոս Վարիմիադիսին Ստամբուլի օդանավակայանում ձերբակալելու  պատճառով: Ըստ ՏԱՍՍ-ի, այդ մասին ուրբաթ օրը հայտնել է Հունաստանի ԱԳՆ մամուլի ծառայությունը:

«Արտաքին գործերի նախարար Նիկոս Դենդիասի անունից Անկարայում Հունաստանի դեսպանատունը հրատապ բողոք է հղել Թուրքիայի ԱԳՆ-ին՝ Հունաստանի Համապոնտական ֆեդերացիայի նախագահ Յորհոս Վարիմիադիսի անօրինական կալանավորման և արտաքսման կապակցությամբ: Նա այսօր մեկնել էր Կոստանդնուպոլիս՝ որպես Պոնտական հելլենիզմի ներկայացուցիչ մասնակցելու Տրապիզոնի Պանագիա Սումելայի վանքում կայանալիք պատրիարքական պատարագին»,-ասված է հաղորդագրության մեջ:

Ինչպես գրում է «Կատիմերինի» թերթը, Հունաստանի Համապոնտական ֆեդերացիայի նախագահը մտադիր էր մի քանի հոգանոց պատվիրակության հետ միասին ներկա գտնվել պատմական ուղղափառ եկեղեցու՝ Պանագիա Սումելա վանքի տոնակատարություններին: Սակայն թուրքական իշխանությունները նրան բերման են ենթարկել Ստամբուլի օդանավակայանում և արգելել են շարունակել ճանապարհորդությունը: Վարիտիմիադիսը վերադառնում է Աթենք, քանի որ թուրքական իշխանությունները փաստորեն նրան արտաքսել են: Հաղորդվում է, որ պատվիրակության մյուս անդամներն ազատ են արձակվել և թույլատրվել է շարունակել ճանապարհը: Օգոստոսի 15-ին Հունական ուղղափառ եկեղեցին նշում է Մարիամ Աստվածածնի Վերափոխման հիմնական կրոնական տոներից մեկը:

Ինքը՝ Վարիտիմիադիսը «Իեֆիմերիդա» թերթին ասել է, որ ձերբակալությունից հետո իրեն տարել են գրասենյակից գրասենյակ և պահել խցում 6-7 ժամ:

«Նրանք վերցրեցին իմ մատնահետքերը,  ինձ ոչինչ չասացին: Բայց ինչպես ինձ փոխանցեցին Հունաստանի հյուպատոսությունից, ճնշումներ գործադրելուց հետո թուրքերը նրանց ասել են, որ ես վտանգավոր և անցանկալի մարդ եմ»,-ասել է ֆեդերացիայի նախագահը:

Պանագիա Սումելան Կոստանդնուպոլսի ուղղափառ եկեղեցու վանք է, որը կառուցվել է մ.թ 4-5-րդ դարերում: 4 -րդ դարի վերջից վանքում պահվում է Սուրբ Աստվածածնի հրաշափառ պատկերակը՝ Պանագիա Սումելան, որը, ըստ ավանդության, նկարել է Luուկաս առաքյալը: 2016 թ. թուրքական իշխանությունները սկսեցին վանքի վերականգնումը, իսկ 2020 թ. վերականգնման ավարտից հետո առաջին եկեղեցական ծառայությունը կատարվեց այնտեղ:

Հունաստանում ամեն տարի մայիսի 19-ին միջոցառումներ են անցկացվում՝ ի հիշատակ 1914-1923 թվականներին Օսմանյան կայսրությունում տեղի ունեցած ցեղասպանության զոհերի: Պոնտոսի կամ Սև ծովի հույները Պոնտոսի պատմական շրջանի էթնիկ խումբ են (Pontus Euxine անունից - հին հունարեն Սև ծով): Առաջին համաշխարհային պատերազմի և 1919-1922 թվականների հունա-թուրքական պատերազմի ընթացքում Պոնտոսի հույները հարյուր հազարաներով ենթարկվեցին տեղահանության և կանխամտածված ոչնչացման, ինչը հետագայում մի շարք երկրների կողմից ճանաչվեց որպես ցեղասպանություն: