Ձեր վստահելի աղբյուրը

«Եռաբլուր» զինվորական պանթեոնում հիշատակի միջոցառում է՝ նվիրված ղարաբաղյան երրորդ պատերազմում զոհված Ազգային հերոս, գնդապետ Վահագն Ասատրյանին: Հոկտեմբերի 12-ը գնդապետի զոհվելու օրն է։

Հիշատակի միջոցառմանը ներկա են գտնվել բարձրաստիճան սպաներ, մարտական ընկերներն ու հարազատները: Արարողության մասնակիցները մեկ րոպե լռությամբ հարգել են Վահագն Ասատրյանի հիշատակը, ծաղիկներ խոնարհել նրա շիրիմին։ ԶՈւ հոգևոր առաջնորդ Տեր Մովսես վարդապետ Սարգսյանն անցկացրել է հոգեհանգստի կարգ։

«Այս օրը հիշատակի խորհուրդ ունի, և սա պատգամ է նաև բանակի ողջ անձնակազմին՝ իրենց առջև դրված խնդիրներն ավելի պարտաճանաչ կատարել, պատգամ է մեր մատաղ սերունդին՝  իրենց դաստիարկության մեջ փորձել նմանվել Վահագն Ասատրյանին»,- Եռաբլուրում լրագրողների հետ զրույցում ասաց ՀՀ պաշտպանության նախկին նախարար, ԱԺ «Հայաստան» խմբակցության ղեկավար Սեյրան Օհանյանը:

Նա ընդգծեց՝ Վահագն Ասատրյանն այն անձնավորությունն է, ով ապրելու է դարեդար. «Երբ խոսում ենք  ֆիզիկական մահի մասին, հայկական բանակը կորցրեց առաջին հերթին մարդու, ով իր ողջ կյանքը նվիրել է զինվորական ծառայությանը, միշտ եղել է զինվորի կողքին: Վահագն այն անձնավորություն էր, որ կարող էր նետվել յուրաքանչյուրի կյանքը փրկելու: Նվիրվածությունը նաև նրանում է, որ կարելի է զոհվել հայրենիքի համար:

Հրամանատար, ով տիրապետել է հրամանատարական բազմաթիվ ունակությունների, հմտությունների, մարտական վարպետության, հռետորաբանության, որն էլ պատճառ է հանդիսացել, որ նրան տարբեր զորամասերի հրամանատար են նշանակել, վերջում՝ հատուկ նշանակության զորամասի հրամանատար:

Նա այն հրամանատարն է, ով լրացրեց հրամանատարների այն աստղաբույլը, որոնք փրկել են մեր երկրի արժանապատվությունը, պահպանել մեր հողն ու ջուրը Հայաստանում և Արցախում»:

ՀՀ Զինված ուժերի Գլխավոր շտաբի պետ Արտակ Դավթյանի խոսքով, «Ազգային հերոս» կոչումը հենց այնպես ոչ մեկին չի տրվում:

«Վահագն Ասատրյանը միշտ զբաղեցրել է մի շարք հրամանատարական պաշտոններ, բոլոր տեղերում հանդես է բերել միայն բարձր կամային հատկանիշներ, մասնագիտական բարձր կարողություններ, դրա արդյունքում էր վստահվել այդ զորամասի հրամանատրությունը»,- ասաց Արտակ Դավթյանը:

Նա գնդապետ Ասատրյանին բնութագրեց այսպես՝ հիանալի ընկեր, հիանալի մարդ, ընտանիքի հիանալի հայր:

ՀՀ ԶՈւ 3-րդ բանակային կորպուսի հրամանատար Ալեքսանդր Ցականյանը նշեց, որ պետք է գիտակցել՝ Վահագն Ասատրյանը, իր նման բոլոր հերոսներն իրենց կյանքը տվել են մեր կյանքի համար. «Մենք չափազանց պատասխանատվությամբ պետք է վերաբերվենք այդ գաղափարին, պատասխանատվությամբ վերաբերվենք մեր սրբազան հողի պաշտպանությանը»:

Վահագն Ասատրյանը Զինված ուժերի շարքերում է եղել 1997 թվականից։ 5 ռազմական բուհերում ուսանած հրամանատարի  համոզմունքն  է եղել՝  փոփոխվող մարտահրավերներին դիմագրավելու միակ միջոցն անընդհատ կատարելագործվելն է:

«Եթե ուզում եք զինվորը ենթարկվի, զինվորը հարգի հրամանատարին, պետք է հրամանատարը լինի գրագետ, պետք է սպան լինի կարդացած։ Դու դրանով դառնալու ես առաջնորդ, դրանով ստեղծելու ես հարգանքդ, շրջապատդ, թիմդ, որով վաղը կարողանալու ես հաղթել հակառակորդիդ»,- ասել է Վահագն Ասատրյանը։

23 տարիների անբասիր ծառայության ընթացքում գնդապետ Վահագն Ասատրյանի ղեկավարած ստորաբաժանումները մշտապես եղել են լավագույնների շարքում։

Վահագն Ասատրյանին հետմահու շնորհվել է Ազգային հերոսի կոչում, Հայրենիքի պաշտպանության և անվտանգության ապահովման գործում մատուցած բացառիկ ծառայությունների, մարտական գործողությունների ընթացքում ցուցաբերած անձնուրացության և անմնացորդ նվիրումի գնդապետ Վահագն Ասատրյանը հետմահու պարգևատրել է Հայրենիքի շքանշանով: