Ձեր վստահելի աղբյուրը

«Նրանք, ովքեր Հայաստան են գալիս բարի ցանկություններով կստանան համարժեք պատասխան, իսկ նրանք, ովքեր գալիս են վատ նպատակներով, վերածվում են պատմական հարթակից վերացող պետությունների»,- Եվրանեսթ խորհրդարանական վեհաժողովի իրավական, մարդու իրավունքների և ժողովրդավարության հարցերի հանձնաժողովի նիստում հայտնեց «Հայաստան» խմբակցության պատգամավոր Արթուր Ղազինյանը:

Նա նկատեց, որ աշխարհում  և տարածաշրջանում ավանդական քաղաքական գործընթացները իրենց տեղը զիջում են ամբոխահաճությանը:

Հայտնելով, որ ժամանակին ղեկավարել է Միջազգային հետազոտությունների կենտրոնը և լավ է տեղյակ ԵՄ արժեքային համակարգից՝ բանախոսը իր զարմանքը հայտնեց, որ Եվրոպան այսօր թույլ է տալիս արյունահեղության բերող երկակի ստանդարտներ:

Արթուր Ղազինյանը կոչ արեց հետևել եվրոպական արժեքներին և հիշեցրեց, որ Ադրբեջանը և Թուրքիան Արցախի ժողովրդի դեմ հանցագործություն են կատարել՝ օգտագործելով ահաբեկիչներին, բայց մինչ օրս չեն պատժվել, ոչ մի եվրոպական պատժամիջոց նրանց դեմ չի կիրառվել:

«Այսօր Հայաստանն էլ է վարակված ամբոխահաճությամբ, բայց այն դա չի նշանակում, որ չենք կարող այդ հարցը լուծել»,-հայտարարեց հայ պատգամավորը:

Դիմելով Ադրբեջանի ներկայացուցիչներին՝ Արթուր Ղազինյանը շեշտեց, որ երիտասարդ հայ զինվորները 44 օրվա ընթացքում, չխնայեցին իրենց կյանքը,  պաշտպանել են իրենց երկիրը, իսկ Արցախի Հանրապետությունը եղել է, կա և կմնա հայկական և այդ նպատակի կյանքի կոչելն աշխարհով մեկ սփռված յուրաքանչյուր հայի սուրբ պարտականությունն է: