Որոշել եմ ավարտել Հայաստանի ազգային հավաքականի կազմում մրցելույթներս. Հենրիխ Մխիթարյան
Հայաստանի ֆուտբոլի ազգային հավաքանի ավագ Հենրիխ Մխիթարյանը որոշում է կայացրել ավարտել Հայաստանի ազգային հավաքականի կազմում մրցելույթները:
«Սիրելի ընկերներ,
Հիշում եմ, երբ առաջին անգամ կրեցի ազգային հավաքականի մարզաշապիկը Պանամայի դեմ ընկերական խաղում և երբ խփեցի առաջին գոլս աշխարհի առաջնության որակավորման փուլի Էստոնիայի դեմ խաղում։ Անկախ դժվարությունից՝ ցանկացել եմ հաղթել կարիերայիս ամեն քայլափոխին։
Վերջին 15 տարիների ընթացքում մեծագույն պատվով եմ խաղացել իմ ազգային հավաքականում, իսկ վերջին 6 տարիների ընթացքում՝ առավել պատվով կրել նրա ավագի թևկապը:
95 միջազգային խաղերից, քրտնաջան աշխատանքից, նվիրումից և իմ երկիրը խաղադաշտում ներկայացնելու ընթացքում աննախադեպ վերելքներից և վայրէջքներից հետո որոշում եմ կայացրել ավարտել Հայաստանի ազգային հավաքականի կազմում մրցելույթներս:
Այս եզրահանգմանն եմ եկել նոյեմբերին Գերմանիայի դեմ կայացած իմ վերջին խաղից հետո։ Կարծում եմ, որ ճիշտ ժամանակն է և, որ տվել եմ իմ հավաքականին ամենը՝ ինչ կարող էի:
Հետևաբար առաջիկա տարիներին ամբողջությամբ կենտրոնացած կլինեմ ակումբային մրցելույթներիս վրա:
Իմ ֆուտբոլային սկիզբը կերտվել է Հայաստանում՝ իմ հայրենիքում, և ես հավերժ երախտապարտ կլինեմ բոլոր նրանց, ովքեր աջակցել են ինձ, ովքեր մարզել ու կրթել են ինձ, ում հետ ես խաղացել եմ և վերջապես յուրաքանչյուրին, ով նպաստել է իմ՝ որպես ֆուտբոլիստ և որպես մարդ, կայացմանը։
Հաջողություններ իմ ազգային հավաքականին!
Ընդմիշտ ձեր՝
Հենո»,- գրել է նա ֆեյսբուքյան էջում։
Հարակից հրապարակումներ`
- «Ձեզ ցանկանում եմ խաղաղություն ու սեր». Հենրիխ Մխիթարյանի շնորհավորանքը՝ Սուրբ Ծննդյան առթիվ
- Չի կարելի թերագնահատել Հայաստանի հավաքականում Հենրիխ Մխիթարյանի դերը. «Gazeta.ua»
- Ունակ ենք պայքարելու և անակնալ մատուցելու այդ հավաքականներին. Հենրիխ Մխիթարյան
- Հայաստանի ազգային հավաքականին միացել է նաև Հենրիխ Մխիթարյանը
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ