Ֆրանսիայի հրապարակում շտապ օգնության մեքենայի հերթապահություն իրականացնելու համար կսպասեն կազմակերպիչների դիմումին
Ֆրանսիայի հրապարակի վրաններից մեկում այսօր սրտի կանգով քաղաքացին տեղափոխվել է հիվանդանոց։ Նրա կյանքը փրկել չի հաջողվել։
Քաղաքապետարանի լրատվության վարչության պետի ժամանակավոր պաշտոնակատար Լևոն Սարդարյանը Panorama.am-ին հայտնեց, չկա որևէ իրավական կրագավորում, որը սահմանում է նստացույցի կամ բողոքի այլ ակցիաների ժամանակ շտապ օգնության մեքենայի հերթապահության պարտադիր լինելը։
Նրա խոսքով, ըստ գործող չափորոշիչի, ՇՕ բրիգադը պետք է դեպքի վայր հասնի մինչև 15 րոպեում, սակայն այս դեպքում բուժանձնակազմը տեղ է հասել ահազանգը ստանալուց 7 րոպե անց։
«Երևանի Ֆրանսիայի հրապարակում ինքնազգացողությունը կտրուկ վատացած քաղաքացու դեպքի կանչով ՇՕ մեքենան դեպքի վայր է հասել ահազանգը ստանալուց 7 րոպե անց և ուղիղ 6 րոպեում պացիենտը տեղափոխվել է թիվ 1 համալսարանական հիվանդանոց, ինչն արձանագրված է համապատասխան փաստաթղթերում։
Ցավոք, բժիշկներին չի հաջողվել փրկել քաղաքացու կյանքը: Խորապես վշտակցելով մահացածի հարազատներին ու մտերիմներին՝ խնդրում ենք այս դեպքը չդարձնել շահարկումների առարկա՝ այդ կերպ ստվերելով նաև բուժաշխատողների գործադրած բոլոր ջանքերը»,-նշեց նա։
Շտապ օգնություն ՓԲԸ տնօրեն Թագուհի Ստեփանյանից Panorama.am-ը հետաքրքրվեց, հնարավո՞ր է, հաշվի առնելով այսօր գրանցված մահվան դեպքը, հրապարակում շտապ օգնության մեքենա և բժիշկներ հերթապահություն իրականացնեն։
«Հնարավոր է, եթե կազմակերպիչները դիմեն քաղաքապետարան՝ ասեն, ակնկալում ենք այսքան մարդ։ Հերթապահություն մարդաշատ հավաքների ժամանակ լինում է։ Բայց պետք է դիմեն, ասեն ինչ գրաֆիկով»,-ասաց Ստեփանյանը։
Ճշտող հարցին՝ ընկերությունում սպասելո՞ւ են կազմակերպիչների դիմումին, «Շտապ օգնություն» ՓԲԸ տնօրենը պատասխանեց. «Անպայման։ Մենք իրավունք չունենք քաղաքացիներին սպասարկելու մեր ծառայությունը թողնենք, վերջապես մենք կանչեր էլ ենք կատարում։ Երեկ ԱԺ դիմաց հավաքի ժամանակ եղել ենք, կանչ ենք սպասարկել։ Բայց 24 ժամ կանգնել Ֆրանսիայի հրապարակում՝ ակնկալելով ինչ-որ մեկին սպասարկել, իրավասու չենք որոշելու, դա քաղաքապետարանը պետք է որոշի»։
Այս առումով պետք է հիշեցնել, որ ամիսներ շարունակ շտապ օգնության մի քանի մեքենաներ տարբեր քաղաքներում՝ Երևանում, Գյումրիում, Վանաձորում վերածված են եղել Կորոնավիրուսային հիվանդության դեմ պատվաստումների շարժական կետերի։ Այսինքն, տևական ժամանակ մի քանի մեքենաներ չեն սպասարկել կանչեր այն դեպքում, երբ օրական կորոնավիրուսի մի քանի հարյուր դեպք էր գրանցվում։
Նշենք, որ ՀՀԿ փոխնախագահ Արմեն Աշոտյանը Ֆրանսիայի հրապարակում շտապ օգնության ծառայության մեքենայի բացակայությունը որակում է իշխանությունների կողմից պայքարի դուրս եկած մարդկանց նկատմամբ անբարո, անմարդկային վերաբերմունք։
«Այս մահը իշխանությունների խղճին է։ Մասայական հավաքների ժամանակ բուժօգնություն ապահովելու համար պատասխանատուները պարտավոր են գոնե այսքանից հետո այսօրվա ընթացքում այստեղ մշտական հերթապահություն սահմանել շտապ օգնության մեքենաների տեսքով»,-ասել է Աշոտյանը։
Հարակից հրապարակումներ`
- Աշոտյան. Ինչո՞ւ չկա գեթ մեկ շտապօգնության մեքենա: Ինչո՞ւ
- Ֆրանսիայի հրապարակում տեղակայված վրաններից մեկից սրտի կանգով քաղաքացի է տեղափոխվել հիվանդանոց
Լրահոս
Տեսանյութեր
Մի կողմում հայ ժողովուրդն է, մյուս կողմում թշնամին և մեր իշխանությունը միասին. Դավիթ Անանյան