Ձեր վստահելի աղբյուրը

Երևանի ընդհանուր իրավասության դատարանում, դատավոր Վահե Միսակյանի նախագահությամբ, դիզվառելիքի գործով դատական նիստին ամբաստանյալներից Գևորգ Հարությունյանն ասաց, որ նախաքննության ընթացքում այս վարույթով հարցաքննվել է 3 անգամ ոպես վկա, 4-րդ անգամ որպես մեղադրյալ։

«Բայց հաստատ չեմ հիշում»,- նշեց նա։

Մեղադրողը հարց հնչեցրեց՝ որևէ մեկը ուղղորդե՞լ, ստիպե՞լ,  համոզե՞լ է ցուցմունք տալ, թե՞ ոչ. «Ասում եք՝ Սերգո Կարապետյանը զանգեց, ասաց՝ պետք է  գնաս, այս բովանդակությամբ ցուցմունք տաս։ Ի՞նչ բովանդակության մասին է խոսքը»։

Գ. Հարությունյանն ասաց. «Եթե ուզում եք, կկրկնեմ։ Զանգեց, ասաց՝ երկար չեմ կարող խոսել, ես նմանատիպ ցուցմունք եմ տվել, որ նախագահն է ասել, պայմանավորվածություն կա, որ պետք է գործը կարճվի, գումար վերականգնվի ու դու էլ ասա, որ սուտ դուրս չգամ, որ գործը չերկարի։

Ես էլ այդ ընթացքում հեռուստացույցով անընդհատ տեսնում էի, որ ինչ-որ մեկի դեմ գործ էին հարուցում, ասում էին՝ գումարը վերականգնեց, բաց թողեցին, ես էլ մտածեցի, որ այս գործն էլ ուզում են այդպես անել, պրծնի գան։ Ես էլ արդեն հոգնել էի քննչական մարմին գնալ-գալուց, ասացի՝ անեմ, պրծնի, գնա։ Ուրիշ մարդ ցուցմունքի հետ կապված, որ պետք է այսպես ցուցմունք տամ, չի եղել»։

Դատախազը հարցրեց, թե ինչո՞ւ է այսքան ժամանակ այդ տեղեկատվությունը պահել իր մեջ, հիմա էլ ասում է՝ «սպասում էի այս օրվան, որպեսզի դատարանում հայտարարեմ, որ Սերգո  Կարապետյանն էր ինձ զանգահարել, ասել՝ այդ բովանդակության տեղեկություն հայտնել»։

Հ.Հարությունյանը  նշեց, որ դրանից հետո իր հաջորդ ցուցմունքում ինքը հրաժարվել է իր այդ ցուցմունքից։

Դատախազն ասաց. «Սերգո Կարապետյանի ուղղորդմամբ եք տվել այն ցուցմունքը, որն ասում եք՝ արժանահավատ չէ կամ ճիշտ չէ։ Այդ ցուցմունքը տալուց հետո քրեական վարույթի ընթացքում ևս հարցաքննվել եք։ Ինչո՞ւ այդ ժամանակ չի ասել»։ 

Հիշեցնենք, որ քրեական գործով այս պահին մեղադրյալի կարգավիճակում է երեք անձ. ՀՀ երրորդ նախագահ Սերժ Սարգսյանից բացի մեղադրանքներ են առաջադրվել նաև ՀՀ գյուղատնտեսության նախարարության բուսաբուծության վարչության նախկին պետ Գևորգ Հարությունյանին, գործարար Բարսեղ Բեգլարյանին։

Ըստ Սերժ Սարգսյանին առաջադրված մեղադրանքի՝ «նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։

Ըստ Բարսեղ Բեգլարյանին առաջադրված  մեղադրանքի՝ «նա հանդիսանալով «Ֆլեշ» ՍՊ ընկերության սեփականատեր, 2013թ․ հունվարի 25-ից փետրվարի 7-ն ընկած ժամանակահատվածում դրդել է 2013թ․ Հայաստանի Հանրապետության գյուղատնտեսության նախարարի պաշտոնը զբաղեցնող Սերգո Կարապետյանին՝ ՀՀ հողօգտագործողներին 2013թ․ գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագրի իրականացման ընթացքում կատարել ՀՀ կառավարությանը վստահված, պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում»։

Ըստ Գևորգ Հարությունյանին առաջադրված մեղադրանքի՝ «նա 2012թ․ հունիսի 25-ից մինչև 2015թ․ հունվարի 12-ն ընկած ժամանակահատվածում զբաղեցնելով ՀՀ գյուղատնտեսության նախարարության բուսաբուծության վարչության պետի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագրծելով, 2013թ․ հւնվարի 25-ից մինչև նույն թվականի փետրվարի 7-ն ընկած ժամանակահատվածում, օժանդակել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակություն կատարելուն»։

Հիշեցնենք, որ կորոնավիրուսի հետևանքով մահացել են գործով անցնող գյուղատնտեսության նախկին նախարար Սերգո Կարապետյանը, նախկին փոխնախարար Սամվել Գալստյանը։ Դատարանի որոշմամբ, նրանց նկատմամբ քրեական հետապնդումը դադարեցվել է։