Ձեր վստահելի աղբյուրը

«Այս ասուլիսը Կարեն Անդրեասյանի համար վերնագրենք՝ «Մի լավ լուր, և մի վատ լուր»»,-հայտարարեց ԱԺ անկախ պատգամավոր Թագուհի Թովմասյանը՝ իր փաստաբան Սերգեյ Ոսկանյանի հետ համատեղ ասուլիսում։

Օրենսդիր մարմնի ներկայացուցիչն ասուլիսը հրավիրել էր՝ խոսելու իր ՔՊ-ական գործընկերուհու Լենա Նազարյանի դեմ հայցի մանրամասների մասին։

«Լավ լուրն այն է, որ արդարությունը հաղթել է, մենք դատարանում հաղթել ենք։ Իհարկե, մի քիչ վախվորած վճիռ է, բայց այնուամենայնիվ վճիռը կայացվել է։ Երբ 2021 թվականին ԱԺ ամբիոնից ես  խոսում էի Աբովյանի դիահերձարանում գետնին շպրտված, պարկերի մեջ լցված դիերի մասին, ի պատասխան ՔՊ խմբակցության ներկայացուցիչ, ԱԺ փոխնախագահ Լենա Նազարյանը դիտավորյալ ինձ վիրավորեց։ Ես ամբիոնից խնդրեցի, որ նա ներողություն խնդրի, հրաժարվեց, ես գնացի դատական ճանապարհով»,-ասաց Թովմասյանը։

Նա հիշեցրեց, որ անցել են եռաստիճան դատական համակարգով՝ հաղթանակ են տարել բոլոր ատյաններում։

«Բայց այսօրվա դրությամբ պատգամավոր Լենա Նազարյանը չի կատարում դատարանի որոշումը, այսինքն, մենք գործ ունենք բեսպրեդելի հետ, երբ իշխանական պատգամավորը Հայաստանի դատարանի օրինական ուժի մեջ մտած վճիռը չի կատարում։ Որպես քաղաքական գնահատական ուզում եմ ասել, որ էլի կան պատգամավորներ, որոնք տարբեր գործերով դատարանի վճիռները չեն կատարել, Արսեն Թորոսյանը կիսակատարեց և խեղկատակություն արեց այդ մասով, Արթուր Հովհաննիսյանը, որ TV5-ին պարտվել է դատարանում, ԴԱՀԿ-ն ստիպողաբար նրանից վերցրել է սահմանված տուգանքի չափը, բայց ներողություն չի խնդրում։
Այսինքն, էս մարդիկ ընդհանրապես դատարանի որոշումները չեն կատարում ու հաշվի չեն առնում ՀՀ երրորդ իշխանության որոշումները, որը ոչ այլ ինչ է, քան անպատժելիություն։ Կարող ենք ասել, որ դատական համակարգի նկատմամբ ամենամեծ անարգանքը ցուցաբերում է իշխանության ներկայացուցիչը՝ տվյալ դեպքում Լենա Նազարյանը»,-ասաց Թովմասյանը։

Հիշեցնենք, որ դատարանը որոշել է   պարտավորեցնել Լենա Ռաֆայելի Նազարյանին հրապարակային ներողություն խնդրել Թագուհի Մանվելի Թովմասյանից՝ Հայաստանի Հանրապետությունում գործող առնվազն 1000 տպաքանակ ունեցող հայալեզու մամուլում հետևյալ բովանդակությամբ տեքստի հրապարակում կատարելու միջոցով. «Ես՝ Լենա Ռաֆայելի Նազարյանս, 03․06․2021թ․ ՀՀ ԱԺ արտահերթ նիստի ընթացքում իմ կողմից Թագուհի Մանվելի Թովմասյանի հասցեին հնչեցված «իդիոտկա» վիրավորական արտահայտության համար ներողություն եմ խնդրում Թագուհի Մանվելի Թովմասյանից»։