Տուլայի ՃՏՊ-ից տուժած 10 քաղաքացի «Ս. Գրիգոր Լուսավորիչ» ԲԿ է դիմել

Հասարակություն 10:27 06/11/2015

Հատուկ չվերթով նախօրեին Երևան տեղափոխված Ռուսաստանի Տուլայի տարածաշրջանի Ուզլովսկի քաղաքի մոտ տեղի ունեցած Մոսկվա-Երևան երթուղու ուղևորատար ավտոբուսի վթարից տուժած 32 քաղաքացիներց ութն օդանավից անմիջապես տեղափոխվել են ՀՀ ԱՆ «Սուրբ Գրիգոր Լուսավորիչ» բժշկական կենտրոն: Առողջապահության նախարարության տեղեկացմամբ, նրանցից 3-ի մոտ առկա է ողնաշարի վնասվածք, և տեղափոխումը կազմակերպվել է ռեանիմոբիլներով` մասնագետների հսկողությամբ: Տուլայի բժշկական հաստատություններում բուժումը կշարունակեն 12 վիրավորները։ Նրանք հիվանդանոցներում կմնան այնքան ժամանակ, մինչև առողջական վիճակով պայմանավորված հնարավոր կլինի նրանց տեղափոխվել Հայաստան:

Այսօր ժամը 08.20-ի սահմաններում ՀՀ ՏԿԱԻ նախարարության Ճգնաժամային կառավարման ազգային կենտրոնից կապ է հաստատվել «Սուրբ Գրիգոր Լուսավորիչ» բժշկական կենտրոնի հերթապահի, այնուհետև բաժնի վարիչի հետ, ովքեր տեղեկացրել են, որ ԲԿ է դիմել 10 քաղաքացի (Գևորգ Իսպիրյան (ծնվ. 1980 թ.), Նարինե Երեմիշյան (ծնվ. 1961 թ.), Կարեն Սաֆարյան (ծնվ. 1985 թ.), Ռադիկ Անտոնյան (ծնվ. 1972 թ.), Արկադի Համբարձումյան (ծնվ. 1992 թ.), Սարգիս Մկրտչյան (ծնվ. 1966 թ.) Կամո Մկրտչյան (ծնվ.1964 թ.), Սիրեկան Թադևոսյան (ծնվ. 1960 թ.), Ժորա Ռուշանյան (ծնվ.1998 թ.) և Քնարիկ Ռուշանյան (ծնվ.1971 թ.)): Ժամը 08.18-ի դրությամբ ԲԿ-ում են գտնվում Ս. Մկրտչյանը, Ն. Երեմիշյանը, Կ. Սաֆարյանը, Ռ. Անտոնյանը և Կ. Մկրտչյանը:

Մոսկվա-Երևան երթուղու ուղևորատար ավտոբուսի վթարի հետևանքով զոհված քաղաքացիների աճյունների տեղափոխումը օդանավակայանից կազմակերպել էր ՀՀ առողջապահության նախարարության դատաբժշկական կենտրոնը, որտեղից այսօր ժամը 10:00-ից դիերը հանձնվում են հարազատներին։

Հիշեցնենք, որ նախօրեին ժամը 21.55-ին «Զվարթնոց» միջազգային օդանավակայանում վայրէջք էր կատարել Տուլայի ՃՏՊ-ի արդյունքում տուժածներին և զոհերի դիերը տեղափոխող ինքնաթիռը:

Հիշեցնենք, որ հոկտեմբերի 3-ին ՌԴ Տուլայի շրջանում տեղի ունեցած ճանապարհատրանսպորտային պատահարի հետևանքով զոհվել է 8 քաղաքացի, տուժել՝ 40-ը: Զոհերից 5-ը մահացել են տեղում, 1-ը՝ հոսպիտալացման ճանապարհին, 2-ը՝ Ուզլովայա ԲԿ վերակենդանացման բաժանմունքում: Ավտոբուսը, որը վթարի էր ենթարկվել, հայերին Ռուսաստանից տեղափոխելիս է եղել Երևան: Այն պատկանել է «Քինգ Դելյուքս» ՍՊԸ-ին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: