Ձեր վստահելի աղբյուրը

ԲՀԿ խմբակցության պատգամավորներ Նաիրա Զոհրաբյանը, Էլինար Վարդանյանը և Աբրահամ Մանուկյանը նախօրեին այցելել են «Նուբարաշեն» քրեակատարողական հիմնարկ: Panorama.am-ի հետ զրույցում տիկին Զոհրաբյանը տեղեկացրեց, որ խմբակցության պատգամավորները պարբերաբար լինում են Հայաստանի տարբեր քրեակատարողական հիմնարկներում, և այսօրվա այցելությունն էլ հատկապես կարևորվեց այն իմաստով, որ վերջին շրջանում շատ նամակներ էին ստացել թե ցմահ ազատազրկվածներից, թե ցմահ ազատազրկված այն կալանավորներից, ովքեր հանցագործությունը կատարել էին բանակում:

«Գիտեք, որ վերջերս մի խումբ ցմահ ազատազրկվածներ հացադուլ էին հայտարարել, մենք այսօր հանդիպեցինք նաև նրանց հետ և կփորձենք առաջիկայում խնդիրը քննարկել նաև արդարադատության նախարարի հետ»,- տեղեկացրեց պատգամավորը:

Վերջինիս խոսքով` խնդրահարույց է նախնական կալանքի պահման խցերի խնդիրը, որտեղ մոտ 15-16 կալանավորներ են պահվում: Ն. Զոհրաբյանի կարծիքով, սա պարտադրում է արագացնել կալանքը որպես խափանման միջոց ընտրելու խնդրի կարգավորումը և մասնավորապես պետք է օրենսդրորեն հստակեցվեն այն դեպքերը, երբ կալանքը պետք է ընտրվի որպես խափանման միջոց. «Լինենք անկեղծ` բազմաթիվ են դեպքերը, երբ կալանքը որպես խափանման միջոց ընտրելը բացարձակապես աննպատակահարմար է և նման դեպքերից մի քանի տասնյակ այսօր հանդիպել ենք «Նուբարաշենում»»:

Ինչ վերաբերում է պայմաններին, որտեղ պահվում են կալանավորները, Նաիրա Զոհրաբյանը նշեց, որ ցմահ ազատազրկվածների համար խցային պայմանները քիչ թե շատ տանելի են, ինչը սակայն չի կարելի ասել նախնական կալանքի պահման խցերի և մյուս խցերի մասին:

«Ընդհանրապես «Նուբարաշենի» շենքը ուղղակի աղետալի մաշված վիճակում է, շենքում չկա օդափոխության համակարգ և այլ տարրական հարմարություններ: Իսկապես պայմանները տանելի չէին և այստեղ խնդիր կա նաև սպասարկող և բուժանձնակազմի հետ. օրինակ, մարդիկ, ովքեր դատապարտված են երկարաժամկետ, նրանց հետ պետք է լրջագույնս աշխատանք տանի հոգեբանը, բայց այսօր մոտավորապես 1000 կալանավորի համար «Նուբարաշեն» քրեակատարողական հիմնարկը ունի միայն մեկ հոգեբան: Սա ուղղակի անընդունելի է և այստեղ ևս, կարծում եմ, պատկան մարմինները պետք է լուրջ ուշադրություն դարձնեն, որովհետև այդ մարդիկ պարբերաբար լուրջ սոցիալ-հոգեբանական աջակցության կարիք են զգում: Մենք չպետք է անենք այնպես, որ մարդու համար պատիժ կրելը դառնա լրացուցիչ պատժատեսակ պայմանների պատճառով»,- նշեց նա:

Նաև հավելեց, որ որքան արագ Արմավիրի քրեակատարողական հիմնարկը հանձնվի շահագործման, որը հուսով է կկառուցվի եվրոչափանիշների համապատասխան, այդքան շուտ հնարավոր կլինի որոշակիորեն թեթևացնել հայաստանյան տարբեր ՔԿՀ-ներ:

Ն. Զոհրաբյանը հավաստիացրեց, որ առաջիկայում կլինեն նաև ՀՀ այլ քրեակատարողական հիմնարկներում, որտեղից ևս դիմում- նամակներ են ստացել և այն խնդիրները, որոնք օրենսդրական կարգավորման կարիք ունեն և ըստ այդմ կարգավորման մեխանիզմ, կփորձեն քննարկել նաև պատկան մարմինների, մասնավորապես Արդարադատության նախարարության հետ: