Ձեր վստահելի աղբյուրը

Հանրային ծառայությունները կարգավորող հանձնաժողովն այսօր կայացած նիստում Հանձնաժողովին «էներգետիկայի բնագավառում կարգավորման խորհրդատվական ծառայության մատուցման» առաջարկ ներկայացնելու մասին որոշում է ընդունել: Ինչպես Panorama.am-ի հետ զրույցում նշեց ՀԾԿՀ նախագահի տեղակալ Սամվել Արաբաջյանը, որոշմամբ նախատեսված խորհրդատվությունը կապ չունի Հայաստանի էլեկտրական ցանցերում անցկացվելիք աուդիտի հետ, այլ առհասարակ էներգետիկայի ոլորտում վերլուծություն իրականացնելու և Հանձնաժողովին առաջարկներ ներկայացնելու խնդիր է լուծում:

«Սա զուգահեռ գործընթաց է»,- մեզ հետ զրույցում նշեց Սամվել Արաբաջյանը:

Այսօր ընդունված որոշումն, ըստ էության մրցույթի հրավեր է, որի հաղթողից ՀԾԿՀ-ն ակնկալում է, որ կիրականացնի համապարփակ խորհրդատվություն: Մասնավորապես, խորհրդատվություն իրականացնողները կպատասխանեն ոչ միայն հունիսի 27-ին երկրի ղեկավարի հնչեցրած կոնկրետ հարցադրումներին
(ա) որքանով էր հիմնավորված սակագնի բարձրացումը,
բ) ինչ հետևանքներ կունենար այդ գործողությունը չձեռնարկելը),
այլև կվերլուծեն Հայաստանում առկա էներգետիկ շուկայի (արտադրության, հաղորդման և բաշխման) և սակագների կառուցվածքը, ինչպես նաև կբացահայտեն Հայաստանում ցածր ու մատչելի սակագների դրույքաչափերի ապահովման հնարավորությունները:

Նկատի ունենալով, որ Հայաստանի կառավարությունն արդեն իսկ նախաձեռնել է 2016-2036 թվականների էներգետիկ համակարգի ռազմավարական զարգացման ծրագրի շուրջ հանրային քննարկումները, ՀԾԿՀ-ում ակնկալում են, որ մինչ դրանց ավարտը խորհրդատվությունը հնարավորություն կտա որոշ հարցերի պատասխաններ գտնել և կիրառել ավելի կարճ ժամանակահատվածի համար։

Ինչպես տեղեկացրեց Սամվել Արաբաջյանը, խորհրդատվությունն իրականացվելու է երեք փուլով:

Առաջին փուլում մրցույթի հաղթողը կիրականացնի շուկայի կառուցվածքի վերլուծություն և վեր կհանի խնդիրները: Որոշման նախագծում այս փուլի համար նախատեսված է 6-7 շաբաթ: Այս ընթացքում, ըստ որոշման, պետք է իրականացվի՝ «Էներգետիկ համակարգի գործառնական վերլուծություն, ներառյալ` արտադրողից մինչ սպառող գնագոյացման արժեշղթայի ուսումնասիրություն, սակագնի կառուցվածքի հիմնական բաղկացուցիչ մասերի, ինչպես նաև շուկայի տատանումների ու մյուս գործոնների նկատմամբ դրանց զգայունության ընդհանուր նկարագրի ներկայացում: Ստեղծված իրավիճակի և Հանձնաժողովի որոշումների ամփոփում՝ հիմնված առկա տեղեկությունների և ինստիտուցիոնալ գործելակերպերի վրա: Ստեղծված իրավիճակի ներքո սակագների չբարձրացման հետևանքների գնահատում»:

Երկրորդ փուլում խորհրդատվության հեղինակները պետք է ներկայացնեն սակագների օպտիմալացման տարբերակների վերլուծություն: Որոշմամբ նախատեսված 7-8 շաբաթների ընթացքում մրցույթի հաղթողը, հաշվի առնելով, ՀԾԿՀ ինստիտուցիոնալ կառուցվածքն ու կարողությունները, պետք է ներկայացնի՝ «Սակագների նվազեցման որոշ տարբերակների խորքային դիտարկումը (օրինակ՝ համակարգում տեխնիկական և առևտրային կորուստների մանրամասն վերլուծությունը, սակագների տարբերակված դրույքաչափերի առավել լայն կիրառումը և այլն)՝ համեմատելով միջազգային և տարածաշրջանային համապատասխան գործելակերպերը և առաջարկելով կարճ ժամանակահատվածում առավել մեծ ազդեցություն ունեցող առաջնահերթ գործողությունների ցանկ»:

Աշխատանքների երրորդ փուլում, մրցույթի հաղթողը տրամադրելու է խորհրդատվություն երկարաժամկետ ռազմավարական զարգացման համար:

«Հաշվի առնելով 2016-2036 թվականների էներգետիկ համակարգի ռազմավարական զարգացման ծրագրի շուրջ հանրային քննարկումների զարգացումը և այդ խորհրդատվության արդյունքները կապակցելու անհրաժեշտությունը՝ հետագա քննարկման շրջանակներում կարող է արդյունքների ամբողջացման շուրջ լրացուցիչ աշխատանքներ իրականացնելու անհրաժեշտություն առաջանալ, ինչը կքննարկվի 2–րդ փուլից հետո»,- նշված է այսօր ընդունված որոշման մեջ:

Նախատեսվում է, որ երրորդ փուլի աշխատանքները կտևեն 6-8 շաբաթ:

Ինչպես նշված է որոշման մեջ, պոտենցիալ խորհրդատուները մրցույթին մասնակցելու համար ՀԾԿՀ-ին պետք է ներկայացնեն՝
1) յուրաքանչյուր փուլի առաջադրանքի ներքո մեթոդոլոգիայի, աշխատանքների և գործողությունների հաջորդականության մանրամասն նկարագրություն,
2) յուրաքանչյուր փուլի աշխատանքների արդյունքների նկարագրություն.
3) գնային առաջարկ և խորհրդատվության մատուցման ժամկետները.
4) առանցքային փորձագետների և նրանց ներգրավվածության վերաբերյալ տեղեկատվություն.
5) աշխարհում և ԱՊՀ տարածաշրջանում նմանատիպ խորհրդատվական ծառայությունների մատուցման վերաբերյալ տեղեկատվություն.
6) Հայաստանում նմանատիպ խորհրդատվական ծառայությունների մատուցման վերաբերյալ տեղեկատվություն (եթե այդպիսին առկա է):

Մեզ հետ զրույցում Սամվել Արաբաջյանը տեղեկացրեց, որ արդեն այսօր մրցույթի հրավերը կուղարկվի ոլորտում առաջատար համարվող ընկերություններին և պոտենցիալ մասնակիցներին կտրամադրվի 10 օր ժամանակ: Հանձնաժողովը խիստ կարևորում է խորհրդատվության իրականացման ժամկետը և նախատեսում է, որ մրցույթում հաղթողն աշխատանքները սկսելու է մինչև օգոստոսի 10-ի շաբաթը:

Կապված հաղթողին որոշելու մեթոդաբանության հետ, ապա ՀԾԿՀ նախագահի տեղակալը հայտնեց, որ նախապատվությունը կտրվի գնային առավել մատչելի առաջարկին: Նրա խոսքով՝ այսկերպ Հանձնաժողովը միջազգային հեղինակավոր խորհրդատույից ակնկալում է առաջարկներ, որոնք կօգնեն Հանձնաժողովին՝ առավել արդյունավետ և օպտիմալ լուծել իր առջև դրված խնդիրները:

Ինչ վերաբերում է ՀԷՑ-ում նախատեսված միջազգային աուդիտին, Սամվել Արաբաջյանը տեղեկացրեց, որ դա իրենց լիազորությունների տիրույթում չէ, և ինքը տեղյակ չէ, թե ինչ փուլում է գործընթացը: