Եթե գումարը տրվել է իր օգտին ձայն տալու համար, սա ընտրակաշառք է. Դատախազի տեղակալը սահմանել է ընտրակաշառքը

17:56 27/04/2012 » Իրավունք

Եթե գումարը տրվել է իր օգտին ձայն տալու համար, սա ընտրակաշառք է. Դատախազի տեղակալը սահմանել է ընտրակաշառքը

Օրերս մամուլում հրապարակված տեղեկությունը, թե թիվ 7 ընտրատարածքում պատգամավորության թեկնածու առաջադրված Սամվել Ալեքսանյանը (Լֆիկ Սամո) թիվ 190 դպրոցում անցկացրել է նախընտրական հանդիպում և ընտրողներին բաժանել ծրարով դրամներ, ընտրություններին ընդառաջ Գլխավոր դատախազությունում ստեղծված աշխատանքային խմբի քննարկման առարկա է դարձել: Այսօր լրագրողների հետ հանդիպմանը աշխատանքային խմբի անդամ, դատախազ Կորյուն Փիլոյանը տեղեկացրեց, որ նյութեր են նախապատրաստվում: «Դեռևս հստակեցումներ չունենք այդ հարցում, լրացուցիչ կտեղեկացնենք», -սահմանափակվեց ասելով Կորյուն Փիլոյանը:

Ընտրակաշառքը տարբերակելու մասին առավել մանրամասն խոսեց Գլխավոր դատախազի տեղակալ Արամ Թամրազյանը և նշեց հետևյալը. «Եթե գումարը տրվել է, ասվել է իրեն օգտին ձայն տալու համար, սա ընտրակաշառք է: Եթե այդպիսի դիտավորություն չի ունեցել անձը, կնշանակի, որ կարող ենք արարքում դիտել այլ իրավախախտում, նկատի ունենալով, որ նախընտրական քարոզչության շրջանում չի թույլատրվում բարեգործության նման դրսևորումների իրականացումը, եթե խոսքը վերաբերում է կոնկրետ անձի, թեկնածուի, կուսակցության, կուսակցության դաշինքի»:

Հիշեցնենք, որ այս հրապարակումը որպես հիմք ընդունելով թիվ 7 ընտրատարածքում առաջադրված մյուս թեկնածու Նիկոլ Փաշինյանը դիմել էր թիվ 7 ԸԸՀ` պահանջելով ուժը կորցրած ճանաչել Սամվել Ալեքսանյանի թեկնածությունը: Նշենք, որ ըստ հրապարակումների, Սամվել Ալեքսանյանը բացի գումարներ բաժանելուց, տվել է վերջին զանգի արարողությունը իրեն պատկանող «Փարվանա» ռեստորանում անվճար կազմակերպելու խոստում:

Նշենք, որ հայաստանյան օրենսդրությունը կաշառք տվողի և ընտրակաշառք վերցնողի համար տարբեր պատիժներ է սահմանել: Օրինակ, Քրեական օրենսգրքի 311-րդ հոդվածով` «կաշառք ստանալը», խիստ պատիժ է նախատեսված կաշառք վերցնողի համար, սակայն նույն օրենսգրքի 154 հոդվածով «ընտրողի կամքի ազատ իրականացմանը խոչընդոտելը» ծանր հանցանք է գործում ոչ թե վերցնողը, այլ տվողը:

Այսօր գլխավոր դատախազությունում հայտարարվեց, որ այս պարագայում Գլխավոր դատախազը, օգտագործելով իր լիազորությունները, պաշտոնապես հրապարակել է դատախազության կամքը, որ ցանկացած այն դեպքում, երբ ընտրակաշառք վերցնողը հայտարարություն կամ հաղորդում կտա այդ մասին, ապա անձն անպայման կազատվի քրեական պատասխանատվությունից: Այսինքն, ընտրակաշառք վերցնող կարող է իմանալ, որ հաղորդում տալու պարագայում ինքն անպայման կազատվի քրեական պատասխանատվությունից: 

Ալեքսանյանը «Փարվանա»-ում անվճար վերջին զանգ անցկացնելու խոստում է տվել. Փաշինյանը դիմել է ԸԸՀ
 

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց