Ձեր վստահելի աղբյուրը

Էկոնոմիկայի նախարարությունը մտադիր է շուտով «ՀՀ տարածքում ժամանակի հաշվարկման կարգի մասին» օրենքում փոփոխություն կատարելու  և ժամային գոտին Հայաստանում 4-րդից  3-րդը դարձնելու առաջարկով հանդես գալ: Այդ մասին Panorama.am-ին փոխանցում են էկոնոմիկայի նախարարության հավաստի աղբյուրները: Երրորդ ժամագոտին եվրոպականին մոտ է ու, ինչպես մեր աղբյուրներն են փոխանցում, «մեր պապական» ժամագոտին է:

Օրինակ, կեսօրը, երբ ուղղահայաց մարմնի ստվերը ամենակարճն է, պետք է լինի ժամը 12:00-ին, մինչդեռ Հայաստանում կեսօրը ժամը 13:00-ին է: Ժամային գոտու փոփոխությամբ, դա կհարթվի: Ժամային գոտու փոփոխությունը Էկոնոմիկայի նախարարությունում շատ են կարևորում` նշելով, որ դա ըստ էության անցում է բնական գոտու, որը բխում է Հայաստանի աշխարհագրական դիրքից:

Նշենք, որ 1997-ին ընդունված վերոնշյալ օրենքի 1-ին հոդվածով սահմանվում է հետևյալը. «Հայաստանի Հանրապետության տարածքում ժամանակի հաշվարկման կարգը սահմանել ժամագոտիների միջազգային համակարգի չորրորդ ժամագոտուն համապատասխան»։

Ժամային 4-րդ գոտուց 3-րդ գոտի անցումը չի վերացնի սակայն, Հայաստանում տարեկան երկու անգամ ժամացույցի սլաքները մեկ ժամով հետ ու առաջ տալու սովորությունը:

Նույն օրենքի երկրորդ հոդվածում նշված է. «Յուրաքանչյուր տարվա մարտ ամսվա վերջին կիրակի օրը, ժամը 02.00-ին ժամացույցի սլաքը տանել առաջ մեկ ժամով, իսկ հոկտեմբեր ամսվա վերջին կիրակի օրը, ժամը 03.00-ին՝ մեկ ժամով բերել հետ»։

Ժամերի փոփոխությունը մասնագետները հիմնականում բացատրում են էներգիայի խնայողության անհրաժեշտությամբ: Panorama.am-ի հարցին, թե Էկոնոմիկայի նախարարությունը վերլուծություն կատարե՞լ է` պարզելու թե էներգիայի որքան տոկոս խնայողություն է կատարվում ժամերի փոփոխությունից, Էկոնոմիկայի փոխնախարար Գառնիկ Բադալյանն ասաց. «Իհարկե նման վերլուծություն չենք արել, դա բավական լուրջ հետազոտություն է»:

Բադալյանի խոսքով, Հայաստանը ստիպված չէ ժամերը փոխել. «Կարող ենք փոխել կամ չփոխել»: Շատերի կարծիքով, ժամերի փոփոխությունը մարդու կենսառիթմն է խախտում, ինչն էլ, որոշ դեպքերում կարող է ընկճել մարդուն:

Փոխնախարարը, սակայն, այլ կարծիքի է: Ըստ նրա, տարօրինակ են բժիշկների կամ հոգեբանների հայտարարությունները, թե ժամերի փոփոխությունն ազդում է մարդկանց առողջության վրա:

«Ինչ-որ տարօրինակ մեկնաբանություններ են հնչում, թե մարդու առողջության վրա է ազդում ժամերը փոխելը: Ես դրան չեմ հավատում: Եթե այդպես է, ապա մենք արևմուտք կամ արևելք չպետք է գնանք, որովհետև այնտեղ ժամերը տարբեր են», -հավելեց նա:

Ներկայումս աշխարհում կա 110 երկիր, որոնց թվում է նաև Հայաստանը, որտեղ ժամացույցի սլաքները տարեկան երկու անգամ հետ ու առաջ են տալիս: Հարևան Վրաստանն օրինակ, հրաժարվել է այդ սովորությունից: Նման սովորություն չկա նաև Ուզբեկստանում, Թուրքմենստանում նաև` Տաջիկստանում: