Կստեղծվի «Կենսաթոշակային համակարգի իրազեկման կենտրոն» հիմնադրամ
ՀՀ կառավարության այսօրվա նիստում ընդունվեց «Կենսաթոշակային համակարգի իրազեկման կենտրոն» հիմնադրամ հիմնադրելու մասին» Հայաստանի Հանրապետության կառավարության որոշման նախագիծը: Ինչպես նշեց ՀՀ աշխատանքի և սոցիալական հարցերի նախարար Արթուր Գրիգորյանը, դրա անհրաժեշտությունը պայմանավորված է կենսաթոշակային բարեփոխումների իրականացմամբ:
Նշվեց, որ այնցյալ տարի ՀՀ Ազգային ժողովն ընդունել է կենսաթոշակային բարեփոխումների իրականացումն ապահովող օրենքների փաթեթը, որի համաձայն` նախատեսվում է 2014 թվականի հունվարի 1-ից ներդնել կուտակային բաղադրիչը:
Կենսաթոշակային բարեփոխումների շրջանակներում փոփոխությունների է ենթարկվում նաև հարկային համակարգը. սկսած 2013 թվականից` գործատուները բացառապես էլեկտրոնային եղանակով ամսական պարբերականությամբ ներկայացնելու են անձնավորված հաշվետվություններ:
Սակայն, ըստ նախարարության տեղեկատվության` ուսումնասիրությունները ցույց են տալիս, որ թե գործատուների, թե բնակչության տեղեկացվածությունը իրականացվող բարեփոխումների վերաբերյալ բավականին ցածր է:
Այսպես` կստեղծվի «Կենսաթոշակային համակարգի իրազեկման կենտրոն» հիմնադրամ, որի նպատակը կենսաթոշակային բարեփոխումների արդյունավետ իրականացմանն աջակցելն է: Մասնավորապես` կենսաթոշակային բարեփոխումների շրջանակներում կտրամադրվի խորհրդատվական և մասնագիտական աջակցություն, նպաստել բազմաստիճան կենսաթոշակային համակարգի վերաբերյալ հանրային իրազեկվածության մակարդակի բարձրացմանը:
ՀՀ վարչապետ Տիգրան Սարգսյանը նշեց. «Հույս ունենանք, որ այս կենտրոնի ստեղծումով կենսաթոշակային բարեփոխումների մասին տեղեկատվությունն ավելի հասանելի կլինի մեր քաղաքացիների համար»:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ