Ռ.Նազարյանն արդարացնում է, Ն.Զոհրաբյանը` մեղադրում
«Հայաստանի էլեկտրական ցանցերի ֆինանսական ճեղքվածքը պայմանավորված է նրանով, որ անցած տարի վերանորոգումից հետո բլոկերից մեկը 88 օր ուշ գործարկվեց, ինչը բերեց նրան, որ ստիպված էինք այդ էժան էլեկտրաէներգիան լրացնել Հրազդան ՋԷԿ-ի ավելի թանկ էլեկտրաէներգիայով: Այս և մի շարք այլ գործոնների հետևանքով մենք ունեցանք 16.3 մլրդ դրամի վնաս», -ԱԺ տնտեսական հարցերի մշտական հանձնաժողովի նախաձեռնությամբ հրավիրված «ՀՀ հանրային ծառայությունները կարգավորող հանձնաժողովի կողմից էներգետիկայի սակագնի փոփոխման որոշման և հիմնավորման վերաբերյալ» թեմայով խորհրդարանական լսումների ժամանակ հայտարարեց Հանրային ծառայությունները կարգավորող հանձնաժողովի նախագահ Ռոբերտ Նազարյանը:
Նա ներկայացրեց նաև այլ թվեր, որոնք վկայում են մի շարք ընկերություններում ֆինանսական ճեղքվածքների մասին, որոնց համար պատասխան պետք է տա, փաստորեն, սպառողը:
Դիմելով Ռ.Նազարյանին ՀՀԿ խմբակցության անդամ, ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը հետաքրքրվեց` ինչո՞ւ չեն վերցրել էժան էլեկտրաէներգիա Երևանի ՋԷԿ-ից և դիմել են ավելի թանկ էլեկտրաէներգիա սպասարկող ընկերությանը:
«Այո, մենք 88 օր 300 մլն կլիվոտա ժամ էլեկտրաէներգիայի բաց ունեցանք: Բայց Երևանի ՋԷԿ-ից չօգտվեցինք, որովհետև նա ռեզերվ չուներ: Իսկ ամենաթանկ էլեկտրաէներգիա ունեցող Հրազդանի ՋԷԿ-ն ունի այնքան ռեզերվներ, որ կարող է սպասարկել Հայաստանի ողջ տարածքը»,- բացատրեց Ռ.Նազարյանը:
ԲՀԿ խմբակցության քարտուղար Նաիրա Զոհրաբյանն էլ իր հարցը հնչեցնելուց առաջ նախ հայտարարեց, որ արդար կլիներ, եթե լսումներին ներկա լինեին նաև այն ընկերությունների ներկայացուցիչները, որոնց վատ մենեջմենթի հետևանքով օգոստոսի մեկից էլեկտրաէներգիայի սակագնի բարձրացման քննարկումների առաջ ենք կանգնել: Այնուհետ հետաքրքրվեց. «Հիշեցրեք` ի՞նչ գնով է վաճառվել ՀԷՑ-ը, ի՞նչ ներդրումներ էին խոստացել անել այս տարիների ընթացքում և ինչքանն է արվել և վերջի վերջո այդ ընկերությունները մազոխիստնե՞ր են, որ 0 տոկոս շահութաբերությամբ շարունակում են աշխատել»,- հարցրեց Ն.Զոհրաբյանը` հավելելով` որտե՞ղ է գրված, որ նրանց վատ մենեջմենթի արդյունքում ՀՀ քաղաքացի սպառողը հետևանքները պետք է մարի իր գրպանից:
Ռոբերտ Նազարյանը հիշեցրեց, որ 2002թ-ին ՀԷՑ-ը վաճառվել է 40 մլն դոլարով: Վաճառվելուց հետո մինչև 2006-07թթ-ը որևէ ներդրում ՀԷՑ-ում տեղի չի ունեցել, հետո տեղի է ունեցել սեփականատիրոջ փոփոխություն: Իսկ 2007թ-ից հետո ներդրումների ամբողջ քանակը կազմում է 80 մլրդ դրամ, դրանց հիմնական մասը նպատակաուղղված է եղել հուսալի և անվտանգ էլեկտրականություն ապահովելու համար, անջատումների տևողությունը հասցնելու այն քանակությանը, որն ամրագրված է լիցենզիայով, այն է` ընդհատումները երկու ժամից ավելի լինել չեն կարող Երևան քաղաքում և եթե այդ տևողությունից ավելի է թույլ տալիս ընկերությունը , ապա գործում են տույժեր:
Ինչ վերաբերում է վատ մենեջմենթին, ապա Ռ.Նազարյանը արձագանքեց. «Որևէ ձևով վատ մենեջմենթով չի պայմանավորված սակագնի բարձրացման անհրաժեշտությունը, ընդամենը մեր կանխատեսումներում ենք սխալվել, գրեթե բոլոր ընկերությունները իսկապես աշխատում են 0 շահութաբերությամբ կամ էլ շատ չնչին շահութաբերությամբ:
Ն.Զոհրաբյանը արձագանքեց. «Ես կրկնում եմ` անթույլատրելի է, որ ոչ ճիշտ կառավարման արդյունքում այս ճեղքվածքը փակի ՀՀ քաղաքացին: Ցանկացած գրագետ կառավարիչ պետք է հաշվարկի հնարավոր ռիսկերը»:
Բայց Ռ.Նազարյանը չհանձնվեց. «Ես ընդգծված ասացի, որ հաշվի չենք առել վատ մենեջմենթը, հաշվի ենք առել մեր մեթոդիկայում կանխատեսումների չարդարանալը»:
Հիշեցնենք, որ ՀՀ Հանրային ծառայությունները կարգավորող հանձնաժողովը, հիմք ընդունելով «Էներգետիկայի մասին» ՀՀ օրենքի 22-րդ հոդվածի 5-րդ և 6-րդ մասերը, իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը: Հանձնաժողովի նախնական գնահատմամբ` ընկերություններում առաջացող ֆինանսական ճեղքվածքը փակելու համար նախատեսվում է բոլոր սպառողական խմբերին մատակարարվող էլեկտրաէներգիայի գործող սակագների բարձրացում 3,8-4,3 դրամ/կՎտժ-ի (ներառյալ ԱԱՀ-ն) սահմաններում:
Նախորդող հրապարակում`
ՀԾԿՀ-ն` Էլեկտրաէներգիայի սակագնի բարձրացման մասին
Լրահոս
Տեսանյութեր
Եթե մտանք նոր սահման գծելու տրամաբանության մեջ, մենք մեր բոլոր սահմանները կկորցնենք. Փաշինյան