UNIDO-ն Հայաստանում կիրականացնի տեքստիլի և հագուստի արտադրության ոլորտի զարգացմանն ուղղված ծրագիր
Երևանում այսօր կայացավ ՄԱԿ-ի արդյունաբերական զարգացման կազմակերպության (UNIDO) «Հայաստանի արտահանման ուղղվածություն ունեցող արդյունաբերական ճյուղերի մրցունակության բարձրացում արդիակացման և շուկան մատչելի դարձնելու միջոցով» ծրագրի շնորհանդեսը: Այն ֆինանսավորվում է Ռուսաստանի Դաշնության` UNIDO-ի Արդյունաբերական զարգացման հիմնադրամի կատարած ներդրումներից:
Ծրագիրը նպատակ ունի պահպանել և մեծացնել տեքստիլի և հագուստի արտադրության տեղական ձեռնարկությունների մասնաբաժինը ներքին շուկայում և նպաստել տարածաշրջանային և միջազգային շուկաներում Հայաստանի արդյունավետ ինտեգրմանը:
Ինչպես նշեց ՀՀ էկոնոմիկայի նախարար Կարեն Ճշմարիտյանը, այս ծրագիրը ՀՀ կառավարության և ՄԱԿ-ի արդյունաբերական զարգացման կազմակերպության կողմից համատեղ իրականացվող ծրագրերից մեկն է, որն ուղղված է արդիականացման և իրացման շուկաների մուտքի ապահովման միջոցով Հայաստանի արտահանման ուղղվածություն ունեցող արդյունաբերական ճյուղերի մրցունակության բարձրացմանը:
Նախարարի խոսքերով` Հայաստանի կառավարությունն իր առջև նպատակ է դրել առաջատար դիրքեր ապահովել ժամանակակից համաշխարհային տնտեսությունում:
«Այստեղ բավարար ներուժ կա, սա համեմատական առավելություն է, որը մեր երկրում ձևավորվել է վաղուց, և մենք պարտավոր ենք այդ առավելությունը օգտագործել մեր երկրի տնտեսության հետագա զարգացման համար»,- ասաց Կ.Ճշմարիտյանը` հավելելով, որ ՀՀ կառավարությունը իր առջև խնդիր է դրել վերականգնել Հայաստանի դիրքերը իրացման շուկաներում և հույս ունեն, որ այս հարցում միջազգային կազմակերպությունների աջակցությունն իր գործուն դերն է ունենալու:
Էկոնոմիկայի նախարարը նշեց, որ ծրագրի իրականացմամբ հնարավոր կլինի թեթև արդյունաբերության ոլորտում ներդնել արտադրության և կառավարման նոր մշակույթ, որը հասկանալի և ընկալելի կլինի օտարերկրյա գործընկերների համար, ինչպես նաև կբավարարի տարբեր շուկաների որակական պահանջները:
Կ. Ճշմարիտյանը նաև կարևորեց հայկական բրենդի ստեղծումը` նշելով, որ Հայաստանի կառավարությունն ակնկալում է` ՄԱԿ-ի արդյունաբերական զարգացման կազմակերպությունն առավելագույնս կօգտագործի ծրագրի միջոցները, որպեսզի կոնկրետ արդյունքների հասնեն արտադրողականության բարձրացման, նոր աշխատատեղերի ստեղծման, նոր տեխնոլոգիների ներդրման, ինչպես նաև արտահանման ծավալների ավելացման առումով:
Նախարարը մեկ անգամ ևս շեշետեց, որ ՀՀ կառավարությունը կաջակցի այս ծրագրին, որպեսզի այն նոր թափ հաղորդի ոլորտի զարգացմանը:
«Հաջողության կարելի է հասնել միայն համատեղ ջանքերով, և մենք պատրաստ ենք համագործակցության»,- ընդգծեց Կարեն Ճշմարիտյանը:
ՄԱԱԶԿ ծրագրերի զարգացման և տեխնիկական համագործակցության տնօրինության բիզնեսի, ներդրումների և տեխնոլոգիաների ծառայություններից բաժանմունքի տնօրեն Մոյամեդ-Լամին Դհաոուին նշեց, որ ծրագրի արժեքը 1 մլն ԱՄՆ դոլարը է, իսկ տևողությունը` 2,5 տարի:
Նա ասաց, որ ծրագիրն օգնելու է ՓՄՁ-ներին զարգացնելու և արդիականացնելու իրենց տեխնիկական կարողությունները` որակյալ և բարձրարժեք դիզայնով հայկական արտադրանք շուկա հանելու նպատակով: Նշված նպատակին հասնելու համար նախատեսվում է արդիականացնել նորաձևության և մոդելավորման ոլորտի տեխնիկական ներուժը, ինչպես նաև արտադրողների, հայ և իտալացի դիզայներների միջև ստեղծել համագործակցություն, ձևավորել բիզնես ցանց և խթանել արտահանումը:
Նա նաև հայտնեց, որ արդեն 8-10 ընկերություն ցանկություն է հայտնել մասնակցել ծրագրին:
Նշենք, որ ծրագրի շնորհանդեսի ժամանակ ստորագրվեց ծրագրային փաստաթուղթ:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ