Ձեր վստահելի աղբյուրը

Ամերիաբանկը, հաշվի առնելով հանրության մեծ հետաքրքրությունը հատուկ ամռան ամիսների համար մշակված «Անկանխիկ ազատություն» քարտային արշավի նկատմամբ, երկարաձգել է արշավի գործողության ժամկետը մինչև տարեվերջ: Լրագրողների հետ հանդիպման ժամանակ հայտարարեց բանկի մանրածախ գործառնությունների գծով տնօրեն Արման Բարսեղյանը:

Նա նշեց, որ այս արշավի նպատակն է խթանել քարտերի վաճառքը, աճեցնել քարտային գործառնությունների ծավալը:

Արշավի շրջանակներում քարտապաններին առաջարկվում է վարկային գիծ՝ առանց եկամուտները հաստատող փաստաթղթերի ներկայացման և մինչև տարեվերջ առանց սպասարկման վճարի: Ընդ որում, վերջին 6 ամիսների ընթացքում ունենալով միջին ամսական անկանխիկ շրջանառություն առնվազն 80 հազար դրամի չափով, քարտապաններին հնարավորություն է ընձեռվում արագ և պարզեցված ընթացակարգով ստանալ հատուկ պայմաններով վարկային գիծ: Այն տրամադրվում է 150,000-1,500,000 դրամ սահմանաչափով և քարտապանի անկանխիկ գործառնությունների մինչև տասնապատիկի չափով:

Արման Բարսեղյանը նաև հայտնեց, որ, կարևորելով ՓՄՁ- ների դերը Հայաստանի տնտեսության զարգացման գործում և նրանց մեծ հետաքրքրությունն Ամերիաբանկի «Բումերանգ» արշավի նկատմամբ, բանկը երկարաձգել է նաև այս արշավի վերջնաժամկետը մինչև տարեվերջ և բարելավել է արշավի պայմանները, միաժամանակ հանդես է եկել նաև ֆիզիկական անձանց համար նմանատիպ առաջարկով:

Ներկայացնելով այս արշավի առանձնահատկությունները, բանկի մանրածախ գործառնությունների գծով տնօրենն ասաց, որ բանկը հիանալի հնարավորություն է տալիս այն վարկառու ՓՄՁ-ներին, ովքեր իրենց վարկերն այլ բանկերից տեղափոխում են Ամերիաբանկ:

«Այլ բանկերում վարկեր ունեցող հաճախորդերն իրենց վարկերը, եթե տեղափոխեն մեր բանկ, ապա մենք ամբողջությամբ ֆինանսավորում ենք տեղափոխման հետ կապված ծախսերը՝ գնահատում, նոտարական վավերացում, կադաստրում ձևակերպումներ: Ի լրում այդ ծախսերի փոխհատուցման, բանկը տեղափոխվող գումարի 1 տոկոսը վերադարձնում է վարկառուին, և վերջինս հնարավորություն է ստանում այն տնօրինել իր հայեցողությամբ»,- ներկայացրեց Ա. Բարսեղյանը:

Նա նաև հավելեց, որ արշավի շրջանակներում սեպտեմբերի 8-ից 1 տոկոսով նվազեցրել է նաև վարկերի տրամադրման տոկոսադրույքը բանկում գործող տոկոսադրույքից:

Ներկայացված առաջարկից կարող են օգտվել բոլոր այն վարկառուները, ովքեր ունեն գույքով ապահոված բիզնես վարկ կամ վարկային գիծ՝ 10 միլիոնից 100 միլիոն դրամի չափով, եթե առկա է այդ վարկերի պատշաճ սպասարկման առնվազն 3 ամսվա պատմություն: Արշավի շրջանակում վարկերը տրամադրվում են նվազագույնը երեք տարի մարման ժամկետով:

Արման Բարսեղյանը տեղեկացրեց, որ սեպտեմբերի 24-ից մինչև տարեվերջ Ամերիաբանկը նոր առաջարկով է հանդես գալիս այն ֆիզկական անձանց համար, ովքեր այլ բանկերում ունեն վարկեր բնակելի և առևտրային նշանակության անշարժ գույքի ձեռքբերման, վերանորոգման և կառուցապատման նպատակով, և վարկի նվազագույն գումարը կազմում է 10 միլիոն դրամ: Այս դեպքում ևս, ըստ նրա, այլ բանկերում սպասարկվող ֆիզիկական անձիք տեղափոխելով այդ վարկերն Ամերիաբանկ, հնարավորություն ունեն ստանալ «բունոս»՝ վարկի գումարի միանվագ 1 տոկոսի չափով (ներառյալ հարկերը):

«Կարծում ենք՝ մինչև տարեվերջ լավ հնարավորություն է և բիզնես հաճախորդների, և ֆիզիկական անձանց համար, բարելավել իրենց վարկերի պայմանները, որովհետև վստահ ենք, որ մեր առաջարկները, հատկապես տոկոսադրույքի առումով, ավելի գրավիչ են ու նաև հնարավորություն են ունենում ստանալ 1 տոկոս բոնուս»,- ասաց Ա. Բարսեղյանը: