Մեկնարկել է «Իմ Ֆինանսների միամսյակ» ծրագիրը
ՀՀ կենտրոնական բանկը հոկտեմբերը հայտարարել է անձնական ֆինանսներին նվիրված ամիս և այսօր ՀԲ-ում մեկնարկեց «Իմ Ֆինանսների միամսյակ» ծրագիրը: ԿԲ-ի նախաձեռնությամբ արդեն երկրորդ տարին իրականացվող ծրագրի նպատակը անձնական ֆինանսների կառավարման կարևորումն է, ինչպես նաև ֆինանսական կրթման մակարդակի բարձացումը:
Ինչպես ծրագրի բացմանն ասաց ՀՀ ԿԲ խորհրդի անդամ Արմենակ Դարբինյանը, նախորդ տարվա մեկնարկած միամսյակը նման էր փորձաշրջանի, որը հնարավորություն տվեց ավելի ընդգրկուն ու մեծածավալ դարձնել միջոցառումների շարքը: Նրա խոսքերով` այս տարի ֆինանսական խոշոր կառույցների կողմից տրվող աջակցությունն ու պատրաստակամությունը նախորդ տարվա համեմատ ավելի մեծ է, նրանց թիվը շուրջ 17 է:
«Այդ փաստը վկայում է միջոցառման կայացման մասին: Մենք լիահույս ենք, որ միամսյակը կդառնա ամենամյա և այս ծրագիրը ևս իր մեծ ներդրումը կունենա անձնական ֆինանսների կառավարման արդյունավետության բարձրացման գործում»,- ընդգծեց Արմենակ Դարբինյանը:
Նա միաժամանկ նշեց, որ մշակել են և արդեն իսկ ընթացքի մեջ է գտնվում ֆինանսական կրթման ազգային ռազմավարությունը, որին հուսով են ՀՀ կառավարությունը հավանություն կտա: Ռազմավարության շրջանակներում իրականացվում են տարբեր ծրագրեր, որոնցից է նաև «Իմ ֆինանսների միամսյակը»:
Գերմանիայի Դաշնային Հանրապետության փոխդեսպան Նադիա Լիխտենբերգերն է ասաց, որ այս արշավի ընթացքում իրենց բեռնատար մեքենաները կայցելեն Հայաստանի բոլոր մարզկենտրոններ, որպեսզի բարձրացնեն իրազեկվածությունը հասարակության շրջանում:
«Այս ծրագիրը եզակի տարբերակ է` բնակչությանը ծանոթացնելու ֆինանսական համակարգի և ֆինանսական կառույցների միջև կապ հաստատելու տեսանկյունից: Գերմանայի կառավարությունը շատ է կարևորում հայ-գերմանական համագործակցության շրջանակներում հայաստանյան ֆինանսական հատվածի կարողությունների հզորացումը: Բնակչությանը այս մեխանիզմով իրազեկումը համապատասխանում է մեր զարգացման մակարդակին»,- նշեց փոխդեսպանը:
ՀՀ ԿԲ ՍՇՊ և ՖԿ ի կենտրոնի ղեկավար Արմենուհի Մկրտչյանը հայտնեց, որ նախորդ տարվա ընթացքում տեղի ունեցած բոլոր միջոցառումները բավական պահանջարկված էին: Այս տարի նոր ծրագրեր էլ կլինեն, որպեսզի զանազանություն լինի և թիրախային նոր խմբեր ներգրավեն:
«Այս տարի ևս միջոցառումը կնպաստի անձնական միջոցների կառավարման վերաիմաստավորման գործոնին և կընդգծի ֆինանսաների կառավարման կարևորությունը: Այս միամսյակը գեղեցիկ առիթ է որպեսզի վերանայենք մեր մոտեցումները ֆինանսների տնօրինման ուղղությամբ»,- ասաց նա` հավելելով, որ ամենապահանջված միջոցառումներից մեկը շրջիկ ավտոբուսների շրջագայությունն է:
Նշենք, որ «Իմ Ֆինանսների միամսյակ» ծրագիրը կանցկացվի Երևանում և Հայաստանի բոլոր մարզերում: Միամսյակի ընթացքում մայրաքաղաքում և Հայաստանի տասը մարզերում կանցկացվեն թեմատիկ մրցույթներ, մի շարք միջոցառումներ` սեմինարներ ու ֆինանսական բանավեճեր կրթական հաստատություններում, էքսկուրսիաներ, բացօթյա էքսպո-ցուցահանդեսներ և այլն:
Միջոցառումը նախաձեռնել են ՀՀ ԿԲ-ն, Ֆինանսական համակարգի հաշտարարը, Հայաստանի ավանդների հատուցումը երաշխավորող հիմնադրամը, Հայաստանի ավտոապահովագրողների բյուրոն, Հայաստանի բանկերի միությունը, Ապահովագրական շուկայի մասնակիցների ասոցիացիան, Հայաստանի հիփոթեքային շուկայի մասնակիցների ասոցիացիան, Վարկային կազմակերպությունների միությունը, ՆԱՍԴԱՔ ՕԷՄԷՔՍ Արմենիան, KfW–ն (Kreditanstalt für Wiederaufbau), Գերմանիայի խնայբանկերի միջազգային համագործակցության հիմնադրամը (SBFIC), ինչպես նաև` ՀՀ առևտրային բանկեր:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ