Ձեր վստահելի աղբյուրը

Գնաճը գտնվում է մեր կողմից սահմանված կանխատեսումների շրջանակներում՝ 4%+/-1.5 տոկոսային կետ թույլատրելի միջակայքի վերին հատվածում: Այս մասին այսօր Ազգային ժողովում Կենտրոնական բանկի գործունեության մասին 2014 թվականի հաշվետվության քննարկման ժամանակ հայտարարեց ԿԲ նախագահի տեղակալ Ներսես Երիցյանը:

Նրա խոսքերով՝ հաշվետվության քննարկումներից ակնհայտ է դարձել, որ հատկապես ընդդիմադիր պատգամավորները հակասական մտքեր են հնչեցնում գնաճի վերաբերյալ:

«Մեկն ասում է գնաճը բարձր է, մեկն ասում է՝ ցածր է: Գնաճը գտնվում է մեր կողմից սահմանված ցուցանիշների շրջանակներում, որը ապահովում է ժողովրդի համար կայուն, տևական տնտեսական աճ»,- նշեց Ն.Երիցյանը:

Ըստ նրա՝ եթե նախորդ տարվա վերջին մի քանի ամիսներին Կենտրոնական բանկը կտրուկ գործողություններ չնախաձեռներ, կարճ ժամանակահատվածում չկայունացներ իրավիճակը, ապա վնասներից խուսափելն անհնար կդառնալ:

«Վնասները էական էին լինելու, մինչդեռ դա արել ենք այն պայմաններում, երբ մի քանի «գիտակ» տնտեսագետներ տարբեր կանխատեսումներ էին անում, տարբեր թվեր էին հրապարակում՝ առանց հարցի մեջ խորանալու, և դա բարդացնում էր իրավիճակը, որովհետև շոկի ժամանակ ժողովուրդը պանիկայի մեջ էր ընկել և սկսել էր ապրանք առնել: Փոխարժեքի շուկան գնում է դոլարիզացման, և հավատացնում եմ, դրա պատասխանը դրամավարկային քաղաքականության մեջ չէ, այլ տեղ է գտնվում պատասխանը, և մենք սխալ թիրախ ենք ընտրել»,- ընդգծեց Ն.Երիցյանը:

Հաջորդ հարցադրումը, ըստ նրա, վերաբերում է նրան, թե արդյոք արդարացված է փողի քանակի ավելացման ու բարձր գնաճի հաշվին տնտեսական աճ ունենալը: «Մեր փորձը ցույց է տվել, որ հնարավոր չէ կայուն տնտեսական աճ ապահովել բարձր գնաճի պայմաններում: Առավել ևս հնարավոր չէ գտնել որևէ երկիր, որը բարձր գնաճի պայմաններում ապահովել է մեկ շնչին հասնող ՀՆԱ-ի աճ, ինչպես նաև բարելավվել իր դիրքերը՝ աշխարհի մրցունակության քարտեզի վրա: Հատկապես բարձր գնաճի արագ նվազեցումը՝ կապված սոցիալական խնդիրների սրման հետ, սխալ է: Դա կհանգեցնի սոցիալական բևեռացման և աղքատության խորացման, իսկ հարուստների վրա չի ազդի: Հետևաբար, մենք պետք է մեր ջանքերն ուղղենք կայուն ցածր գնաճը նորմ դարձնելուն և մեր քաղաքացիների գնաճային սպասումները խարսխելու ուղղությամբ, քանի որ դա մեր երկրի երկարաժամկետ կայուն միակ աճի գրավականն է: Մենք պատասխանատու մոտեցում պետք է դրսևորենք, որովհետև բարձր գնաճը բոլորի համար է ծախս»,- նշեց Ն. Երիցյանը:

Նա վստահեցրեց, որ չեն ցանկանում բարձր գնաճ սահմանել, քանի որ աշխարհի որևէ խելամիտ զարգացած և զարգացող երկիր 2-5 տոկոսից ավելի գնաճ չի սահմանում. «Դա մեր կապրիզը չէ, դա գիտականորեն ապացուցված է, ուստի պետք չէ զգացմունքներով առաջնորդվել: Պնդել, որ բարձր գնաճը կարելի է կառավարել նույնն է, որ բժիշկը կառավարի արյան ճնշման բարձրացումը»: