Ձեր վստահելի աղբյուրը

Վերջին 5 տարիների ընթացքում ՏՏ ոլորտը գրանցել է աննախադեպ մեծ աճ, որը պայմանավորված է ոչ միայն միջազգային ՏՏ ընկերությունների Հայաստանում գրասենյակների հիմնմամբ, այլ նաև տեղական ընկերությունների և ստարտափերի ձևավորմամբ։ Ստեղծարար միտք ունեցող բազմաթիվ ծրագրավորողները նախընտրում են ստեղծել իրենց ստարտափը, որը նորարար կլինի ոչ միայն տեղական շուկայում, այլև կարող է մրցակցել միջազգային ոլորտում։

Տեղական ՏՏ համայնքի ձևավորմանը մեծապես նպաստում են ՏՏ միջազգային մրցույթներ, որոնք վերջին մի քանի տարիներին սկսել են ընտրության փուլեր անցկացնել նաև Հայաստանում։ Մայքրոսոֆթ ինովացիոն կենտրոն Հայաստանը, mLab ECA-ը, ՁԻՀ-ը, Ինովացիոն լուծումների և տեխնոլոգիաների կենտրոնը, համագործակցելով միջազգային մրցույթների կազմակերպիչների հետ, նոր հնարավորություններ են ստեղծում ստեղծարար լուծումներ առաջարկող թիմերի, ստարտափերի և ծրագրավորողների հետ։ 2014թ․ին Seedstars մրցույթը առաջին անգամ մուտք գործեց Հայաստանի ՏՏ համայնք և զարմացած էր ստացված արդյունքներից։ Տեղական փուլի հաղթող SoloLearn թիմը մասնակցեց Seedstars-ի միջազգային փուլին և ընդգրկվեց լավագույն տասնյակում։ Այս տարի Seedstars-ն արդեն ավելի մեծ վստահությամբ էր անցկացնում տեղական ընտրությունը, քանի որ, ինչպես նշեց Ալիզե դե Տոնակը. «Ես մեծ սպասելիքներ ունեմ հայկական ստարտափերից, քանի որ գիտեմ, որքան ուժեղ են հայերը»:

Seedstars-ով սկիզբ դրվեց միջազգային մրցույթներին, որին հետևեց SLUSH 2015:

Ներկայումս Beeline Հայաստանը Մայքրոսոֆթ ինովացիոն կենտրոնի, Ձեռնարկությունների ինկուբատոր հիմնադրամի և մի շարք տեղական ընկերությունների հետ համատեղ անցկացնում է Eurasia Mobile Challenge մրցույթը։

Ինչո՞վ է առանձնանում այս մրցույթը

Ինչպես բոլոր մրցույթները, այստեղ նույնպես փնտրվում են նորարար լուծումներ ցանկացած ոլորտի խնդրի, սակայն մինչև բուն մրցույթային փուլ հասնելը կազմակերպիչները հետաքրքրված և հայտ ներկայացրած թիմերին տրամադրելու են ինտենսիվ աջակցությունը իրենց պրոդուկտը մշակելու և գրավիչ ներկայացնելու համար։ Ծրագրում ներգրավվելու են տվյալ երկրի և ոլորտի լավագույն մենթորները, ովքեր մեկ ամիս շարունակ տրամադրելու են բիզնես և տեխնոլոգիական աջակցություն։ Ծրագրին մասնակից յուրաքանչյուր երկրից տարածաշրջանային փուլին մասնակցելու են 3 թիմ։ Ի՞նչ կշահի ստարտափը՝ մասնակցելով այս մրցույթին․ նախ և առաջ աջակցություն պրոդուկտը մշակելիս, ինչպես նաև մինչև 20,000 ԱՄՆ դոլար արժողությամբ մրցանակ, իսկ եթե դիտարկենք երկարաժամկետ կտրվածքով, ապա ներդրողներին և միջազգային շուկայում ներկայանալու, 2016թ․ին Բարսելոնայում կայանալիք Mobile World Congress-ին մասնակցելու հնարավորություն։

Հայտերը ընդունվում են առցանց և վերջնաժամկետն է հոկտեմբերի 15-ը։ Թիմերի հետ աշխատանքը կսկսվի հոկտեմբեր ամսին։