Ձեր վստահելի աղբյուրը

Կրթության և գիտության նախարարության և Հայ Առաքելական Սուրբ Եկեղեցու համատեղ ծրագրով Հայաստանում պետք է կազմակերպվեր Հայոց եկեղեցու պատմություն առարկայի վերապատրաստման դասընթացներ ջավախքահայության և վիրահայության 75 ուսուցիչների համար: Սույն ծրագրի շուրջ արդեն պայմանավորվածություն էր ձեռք բերվել Վիրահայոց թեմի հոգևոր առաջնորդի միջնորդությամբ կրթության և գիտության նախարարության և Վրաստանի հանրապետության Լուսավորության նախարարության միջև, ինչի համաձայն վերոհիշյալ թվով ուսուցիչները վերապատրաստման դասընթացներն անցնելու հետո պետք է գալիք ուստարվա սեպտեմբեր ամսից Վրաստանի հայոց դպրոցներում ֆակուլտատիվ սկզբունքներով անցկացնեին Հայոց եկեղեցու պատմություն առարկան:

Ուսուցիչները պետք է հունիս 15-ի առավոտյան մեկնեին Երևան,սակայն հունիսի 12-ի գիշերվա ժամը 24:00-ից հետո ծրագրին մասնակից բոլոր ուսուցիչներին և իրենց դպրոցների տնօրեններին զանգահարել են /ինչպես իրենք են ներկայացել` կոնտրազվետկայի/ «ազգային անվատանգության» ներկայացուցիչները և պահանջել, որ բոլորը հաջորդ օրը առավոտյան ժ. 10:00-ին ներկայանան իրենց մոտ:

Գիշերվա անակնկալ զանգերից վախեցած ու անհանգստացած ուսուցիչները հաջորդ օրը ներկայացել են համապատասխան բաժիններ` հարցաքննության, որի ժամանակ նրանց տրվել են հարցեր, թե ուր են գնում, ինչու, ով է իրենց թույլատրել և առաջարկել մասնակցել սույն ծրագրին: Լսելով պատասխան, որ իրենց տնօրենների գիտությամբ և հոգևոր հովիվների միջնորդությամբ են մեկնում մասնակցելու դասընթացներին, ուսուցիչները ստացել են պատասխան, որ իրենք իրավունք չեն ունեցել նախ այն պայմանով, որ դեռևս չի ավարտվել ուստարին, և չկա համապատասխան գրություն, որն իրենց կարտոներ բացակայել դասերից ու մասնակցելու դասընթացներին: Նույնիսկ հնչել է զգուշացում, որ մյուս անգամ այսպիսի անթույլատրելի քայլեր անելու դեպքում ուսուցիչները կարող են պատժվել` աշխատանքից հեռացվելու և այլ սպառնալիքների ձևով:

«Սակայն հարց է առաջանում, թե օրենքի որ կետով է Ազգային անվտանգությունը սույն պարագայում միջամտում կրթական համակարգի գորընթացներին, և այն էլ գիշերվա ժամը 24.00-ին անելով մեկից ավելի զանգեր: Ընդունենք, որ նույնիսկ չկար համապատասխան պայմանավորվածություն սույն ծրագրի առթիվ /որն այդպես չէ, այլապես ուսուցիչները չէին հրավիրվի/, սակայն միթե այդ մասին ուսուցիչներին չպիտի տեղեկացնեին իրենց տնօրենները կամ տեղական համապատասխան կրթական մարմինները, և ոչ թե վերոհիշյալ անձինք նման խիստ ու անպատշաճ միջոցով»,- ահազանգ են հնչեցնում ջավախաքհայերը:

«Մենք ջավախքահայերս խստիվ դատապարտում ենք Վրաստանի «Ազգային անվտանգության» այս հակասահամանադրական արարքը և խնդրում ՀՀ-ի նախագահին հունիսի 25-ին նախագահների կայանլիք հանդիպմանը որպես արդեն կայացած փաստ բարձրացնել նաև այս հարցը:

Այսպիսով, ստացվում է, որ երբ Վրաստանի բարձրաստիճան պաշտոնյաները ասում են, թե Ջավախքում չեն ոտնահարվում հայերի իրավունքները, մեղմ ասած ստում են»,- նշված է ջավախքահայերի տարածած հաղորդագրության մեջ: