Ձեր վստահելի աղբյուրը

Այս տարվա առաջին կիսամյակում Հայաստանում գրանցվել է մարդկանց թրաֆիքինգի 9 դեպք, որից 7-ը` կանանց պոռնկության շահագործման, 1-ը` անչափահասին մուրացկանության մեջ ներգրավելու և 1-ը` աշխատանքային թրաֆիքինգի: Այդ մասին այսօր հայտարարվել է ոստիկանապետ Վլադիմիր Գասպարյանի ղեկավարությամբ տեղի ունեցած ոստիկանության կոլեգիայի նիստում, տեղեկացնում են ոստիկանության լրատվական ծառայությունից:

Նույն ժամանակահատվածում քննությունից և դատից խուսափող անձանց հետախուզման աշխատանքների շրջանակում, ոստիկանության մարմինների կողմից հայտնաբերվել է 904 հետախուզվող:

Անդրադառնալով 2014 թ. առաջին կիսամյակում իրականացված օպերատիվ-ծառայողական գործունեության արդյունքներին՝ ոստիկանության պետ Վլադիմիր Գասպարյանը կրկին հիշեցրել է իր սկզբունքային մոտեցումն այդ աշխատանքի կազմակերպմանը:

Ոստիկանության մարզային վարչությունների և տարածքային ստորաբաժանումների կիսամյա աշխատանքի արդյունքները ներկայացրին ոստիկանության պետի տեղակալներ Արթուր Օսիկյանը, Անուբաղ Համբարյանը, Սամվել Հովհաննիսյանը և շտաբի պետ Վարդան Եղիազարյանը:

Բարձրացված հարցերի քննարկման ընթացքում Վլադիմիր Գասպարյանը խիստ գնահատական է տվել մի շարք բաժինների աշխատանքին և պահանջել է յուրաքանչյուր թերացման համար կիրառել անձնական պատասխանատվության սկզբունքը:
Ոստիկանության պետն անդրադարձել է նաև աշխատանքային և կատարողական կարգապահությանը, որը մի շարք ստորաբաժանումներում դեռևս հեռու է պահանջված մակարդակից:

Վլադիմիր Գասպարյանը կարևորել է համակարգն արատավոր երևույթներից վերջնականապես ազատելու, ոստիկանության ծառայողի պրոֆեսիոնալիզմի բարձրացման, իրավապահի պարտքն անվերապահորեն կատարելու, սպայի արժանապատվությունը պահպանելու անհրաժեշտությունը:

Ամփոփելով կոլեգիայի նիստը՝ Վլադիմիր Գասպարյանը ցուցումներ ու հանձնարարականներ է տվել ոստիկանության գործունեության սկզբունքների և երկրորդ կիսամյակի կոնկրետ խնդիրների լուծման ուղղությամբ: