Ձեր վստահելի աղբյուրը

Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության մրցույթում հաղթող է ճանաչվել Արմեն  Հարությունյանը, Արայիկ Ղազարյանը և Լիանա Հակոբյանը: 

«Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովի աշխատակազմը, ղեկավարվելով Հայաստանի Հանրապետության Նախագահի 2014թ. օգոստոսի 2-ի ՆՀ-199-Ն հրամանագրով հաստատված Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրությունն իրականացնող մրցութային հանձնաժողովի գործունեության և թեկնածուների ընտրության կարգի  դրույթներով, ինչպես նաև հիմք ընդունելով Հանձնաժողովի 2015 թվականի մարտի 2-ի նիստի արդյունքները` հայտարարում է, որ Հայաստանի Հանրապետության
Նախագահին ներկայացվող Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության մրցույթում հաղթող ճանաչված անձինք են. Արմեն Շուրայի
Հարությունյանը, Արայիկ Գառնիկի Ղազարյանը և Լիանա Օնիկի Հակոբյանը»,- ասված է արդարադատության նախարարության տարածած հայտարարության մեջ:

Հիշեցնենք, որ փետրվարի 26-27-ին Մարդու իրավունքների Եվրոպական դատարանում դատավորի պաշտոնի համար 2-րդ մրցույթն էր անցկացվում: 2014թ. կայացած մրցույթի արդյունքները ԵԽԽՎ-ում ՄԻԵԴ դատավորի ընտրության փորձագետների խորհրդատվական խումբը չէր հաստատել` բացատրելով, թե ընտրված 3 թեկնածուներից մեկի որակական չափանիշները չեն համապատասխանում ՄԻԵԴ դատավորի չափանիշներին: Այս հիմքով ՀՀ նախագահը չեղյալ էր հայտարարել կայացած մրցույթը: Նշենք նաև, որ նախորդ մրցույթում հաղթղ էին ճանաչվել Արմեն Հարությունյանը, Արա Ղազարյանը և Նելիկ Հարությունյանը: Ըստ խորհրդատվական խմբի, նրա մասնագիտական որակավորումներն և փորձը հաշվի առնելով՝  Եվրոպական կոնվենցիայի 21-րդ հոդվածի 1-ին մասի իմաստով չի կարող համարվել բավարար ճանաչում ունեցող իրազեկ իրավագետ, ինչը պահանջվում է Մարդու իրավունքների եվրոպական դատարանի դատավորից: Ի դեպ, նա մասնակցում էր նաև երկրորդ մրցույթին:

Նշենք, որ ըստ կարգի, առաջին երեք ամենաբարձր միավոր հավաքած թեկնածուների ցուցակը պետք է հարցազրույցի փուլի ավարտից հետո մեկ օրվա ընթացքում հրապարակվի, այնուհետև ներկայացվի ՀՀ նախագահ Սերժ Սարգսյանին հաստատելու կամ մերժելու ցուցակը: Նախագահի կողմից հաստատվելուց հետո ցուցակն ուղարկվելու է Մարդու իրավունքների եվրոպական դատարան, որտեղ էլ պետք է ընտրեն մեկ թեկնածու, ով կներկայացվի Հայաստանը ՄԻԵԴ-ում: Նախագահի կողմից ցուցակը չհաստատվելու դեպքում կրկին հայտարարվելու է մրցույթ:Ցուցակում պետք է անպայման լինեն և արական, և իգական սեռի ներկայացուցիչներ:

Նախորդող հրապարակում՝
Մեկնարկել է ՄԻԵԴ-ում հայ դատավորի մրցույթի հարցազրույցի փուլը