Ձեր վստահելի աղբյուրը

Հայկական ազգային երաժշտական գործիքների ցանկը հարստացել է ևս մեկով՝ բաս-քանոն: Նման գործիք ամբողջ աշխարհում մինչև վերջերս չկար: Առաջին անգամ ստեղծվել է Հայաստանում: Բաս-քանոն ստեղծելու գաղափարի հեղինակը կոմպոզիտոր Արա Գևորգյանն է, պատրաստել է Ալբերտ Զաքարյանը:

Panorama.am-ի հետ զրույցում Արա Գևորգյանը պատմեց, թե ինչու է նման գործիք ստեղծելու մտահղացմամբ հանդես եկել. «Ես ձայնագրեցի մի ստեղծագործություն՝ 50 քանոնով: Երբ լսեցի ստեղծագործությունը, զգացի, որ մի բան պակասում է՝ թավ հնչողությունը, որ չկա մեր ազգային նվագարանների մեջ: Ինձ դուր չեկավ այդ ձայնագրությունը, բասի պարտիան համակարգչի օգնությամբ մեկ օկտավա իջեցրեցի ներքև: Ամեն ինչ գեղեցկացավ: Միտք առաջացավ՝ ինչու չստեղծենք կոնտրաբասի լարերով բաս-քանոն»:

Նման գործիք ստեղծելու առաջարկով դիմել է երաժշտական գործիքներ պատրաստող վարպետ Ալբերտ Զաքարյանին. «Նա ասաց, որ մինչև լարերը չտեսնի, որոշում չի կարող կայացնել: Պարզվեց, որ պետք է օգտագործվի կոնտրաբասի 16 լար: Վարպետի առաջարկով գնացի Տուափսե ու այնտեղից բերեցի թխկենու փայտ, որը համարվում է երաժշտական լավ հնչողություն ունեցող փայտ: Կոնտրաբասը, թավջութակը, դաշնամուրը, քանոնը ուսումնասիրելուց, մի շարք հաշվարկներ անելուց հետո վարպետն անցավ գործի ու պատրաստեց բաս-քանոն գործիքը»:

Գործիքի ինքնարժեքը 2000 ԱՄՆ դոլար է: Ա. Գևորգյանն ասաց, որ արդեն ունեն երեք գործիք՝ բաս-քանոն Ալվարդ, բաս- քանոն Նվարդ, բաս-քանոն Գոհար: «Այդպես ենք անվանել, որովհետև այդ երեք գործիքները ստեղծվել են հովանավորների միջոցով ու իրենք էլ այդ անուններն են առաջարկել: Մենք փնտրում ենք հովանավորներ, քանի որ ուզում ենք այդ գործիքից նվիրել մեր ազգային նվագախմբերին, սակայն պարզ է, որ չեն կարող իրենք գնել: Ովքեր ցանկանան այս գործիքից պատվիրել ու նվիրել մեր ազգային նվագախմբերին, դրանք կարող են անվանել իրենց ծնողի, զավակի անունով»:

Կոմպոզիտորը նշեց, որ ամբողջ գումարը տրվելու է միայն պատրաստող վարպետին. «Ես ոչ մի ցենտ, ոչ մի ակնկալիք չունեմ: Իմ օգուտն այն կլինի, որ կունենանք նոր գործիք, լավ վարձատրվող վարպետ, խնդրելու եմ, որ վարպետը պահի աշակերտ, նվիրվելու են մեր ազգային նվագարաններին»:

Գործիքը կարող է նվագել ցանկացած քանոնահար: Աշխարհում առաջին երաժշտական այս գործիքի շնորհանդեսը կայանալու է դեկտեմբերի 18-ին Առնո Բաբաջանյան համերգասրահում: