Ձեր վստահելի աղբյուրը

Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր ՀՖՖ գրասենյակում հանդիպեց մի շարք առաջատար լրատվամիջոցների ղեկավարների, խմբագիրների, ֆուտբոլային լրահոսերի պատասխանատուների և վերլուծաբանների հետ:

Զրույցի թեման ֆուտբոլային մի շարք խնդիրներ էին, որոնք վերաբերում էին Հայաստանի ազգային հավաքականի ելույթներին, թիմում ստեղծված բարոյահոգեբանական մթնոլորտին ու հարակից հարցերի:

ՀՖՖ նախագահը հայտարարեց, որ մեր հավաքականը խայտառակ վատ է հանդես եկել: Ալբանիայի ընտրանու հետ երևանյան հանդիպումից հետո, իր իսկ խոսքերով, 3 օր փակված է եղել տանը և նույնիսկ ընտանիքի անդամներին չի տեսել: Անգամ մտածել է հրաժարական տալու մասին: Այդուհանդերձ, նա ավելացրեց, որ ոչ մի պահանջ կամ վերջնագիր իրեն չի կարող կոտրել:

«Ոչ մի պահանջ կամ վերջնագիր չի կարող կոտրել ինձ: Այն, ինչ այժմ ուզում է անել ՖԻՖԱ կոչվող խմբակը, ընդամենը քաղաքական դիվիդենտ շահելու միտում ունի: Ես նրանց հետ երբևիցե չեմ հանդիպի: Թող պատվիրատուները գան և հանդիպում խնդրեն: Նրանց հետ կհանդիպեմ: Գիտեմ նաև, թե ովքեր են պատվիրատուները:

Ասում են՝ հավաքական չեն հրավիրվում արժանի ֆուտբոլիստները: Դենիս Թումասյանին 10 տարի հրավիրել ենք ազգային թիմ, չի եկել: Ինչո՞ւ պետք է հիմա հրավիրենք: Դարպասապահ Յուրչենկոյի հետ ՀՖՖ փոխնախագահը հանդիպել է 2 անգամ, բայց նա հրաժարվել է: Ես նույնպես պատրաստ եմ հանդիպել նրա հետ: Պարզապես Յուրչենկոն չի ուզում Ռուսաստանում լեգեոներ համարվել: ԵՏՄ-ում աշխատանքի թույտվության օրենքի շրջանակներում նա չպետք է լեգեոներ համարվեր… Խնդրի կարգավորումը Հայաստանի սպորտի նախարարության իրավասության հարցն է:

Տոմսերի հարցը, իհարկե, կարելի է քննարկել: Բայց ես կնշեմ մի շարք փաստեր, որոնք ընդհանուր պատկերացում կտան իրավիճակի մասին: Պորտուգալիայի հավաքականի հետ հանդիպման 2 տոմս էին ինձանից խնդրել: Մի քանի օր առաջ բոլոր տոմսերն սպառվել էին: Իմ տղան 50000 դրամով է դրանք գնել: Եվ նրանք, ովքեր ասում են, թե թանկ են տոմսերը, Ռոնալդուի ու Պորտուգալիայի հավաքականի, այլ ոչ թե Հայաստանի հավաքականի երկրպագուներն են»,- նշեց Ռուբեն Հայրապետյանը:

Պարզվեց՝ Հայաստանի ազգային թիմի յուրաքանչյուր հանդիպման 1000 տոմս է տրվել ՖԱՖ-ին, մեկ տոմսը՝ 2000 դրամ արժեքով: ՀՖՖ նախագահը շեշտեց, որ ինքն առաջարկել է դրանք անվճար տրամադրել, իսկ այն բանից հետո, երբ ՖԱՖ-ը չի ընդունել, ինքն առաջարկել է մեկ տոմսի դիմաց ընդամենը 1000 դրամ վճարել: ՖԻՖԱ-ի ներկայացուցիչները հայտարարել են, որ 1 տոմսը կգնեն 2000 դրամով, այլ կերպ ասած՝ իրենք են սահմանել գինը:

«Ինչ վերաբերում է սոցիալապես անապահով խավին, մենք ամեն խաղի համար մինչև 4000 տոմս ենք բաժանել, իսկ ՖԱՖ-ին՝ 1000 տոմս՝ 2000-ական դրամով: ՖԱՖ-ն այդքան անդամ չունի: Այդ դեպքում որտե՞ղ են մնացած տոմսերը: Ես հո լավ գիտեմ՝ ինչ է եղել»,- հայտարարեց Ռուբեն Հայրապետյանը:

ՀՖՖ նախագահը վստահ է, որ հավաքականում բարոյահոգեբանական լուրջ խնդիր կա:

«Ֆրանսիայի հավաքականի հետ հանդիպումից առաջ Ռոբերտ Արզումանյանն ու Յուրա Մովսիսյանը հրաժարվեցին խաղալ: Ալբանացիների հետ խաղից առաջ ես գլխավոր մարզչին խորհուրդ տվեցի նրանց չընդգրկել կազմում: Բայց նրանք խաղացին: Ես մարզչին խորհուրդ կարող եմ տալ, բայց երբեք չեմ պարտադրել:

Պորտուգալիայի հավաքականի հետ խաղում, երբ հաղթում էինք 1:0 հաշվով, Կառլեն Մկրտչյանը վայր ընկավ, բռնեց ոտքը ու փախավ: Իրականում ոչ մի վնասվածք էլ նա չէր ստացել»:

Ռուբեն Հայրապետյանն անդրադարձավ նաև այն խնդրին, որ իրեն մեղադրում են ֆուտբոլն անձնական բիզնեսի վերածելու մեջ: Նա լրագրողներին առաջարկեց ստեղծել ուսումնասիրող հատուկ խումբ կամ ներգրավել որևէ աուդիտորական կազմակերպության և համապատասխան վերլուծություն կատարել՝ տեսնելու համար՝ արդյոք դա համապատասխանո՞ւմ է իրականությանը: Նա նշեց միայն, որ «Փյունիկ» ակումբն է իր ընտանիքի սեփականությունը, որը ֆուտբոլիստներ է մատակարարում հավաքականին, և եթե որևէ մեկն ստանձնի այդ թիմի ղեկը, ինքը պատրաստ է ակումբը նվիրել նրան:

«Հավաքականում միասնություն չկա: Ֆուտբոլիստներից ոմանք միլիոնանոց պայմանագրեր են ստացել ու մեծամտացել: Ասվածը չի վերաբերվում Հենրիխ Մխիթարյանին, Գաել Անդոնյանին, Արթուր Սարկիսովին: Ցավում եմ Արասի համար: Նա շատ է ուզում խաղալ, սակայն խնդիրներ ունի ակումբում:

Հավաքականը նոր մարզիչ է ունենալու: Ես հակված եմ տեղացի մասնագետի թեկնածույան օգտին, սակայն հիմա չեմ կարող ասել, թե վերջնական որոշումն ինչպիսին կլինի:

Միշտ համարել եմ, որ ֆեդերացիան գլխավորելուց հետո իմ ամենամեծ ձեռքբերումը դավաճանությունը վերացնելն էր: Եվ, ցավոք, հենց իմ օրոք էլ այն վերադարձավ: Ալբանացիների հետ խաղում է դա գրանցվել: Բազմաթիվ անգամ եմ դիտել այդ խաղը: Եվ համոզվել եմ, որ դա դավաճանություն էր: Խաղային շատ բաղադրիչներ են վկայում այդ մասին: Հետ փոխանցումները՝ հատկապես… Փաստեր, սակայն, չունեմ... Եթե ես չկարողանամ լուծել այդ հարցը, ցանկացած մարզիչ, անկախ իր կարգից, ոչինչ չի կարող անել»,- ասաց նա: