«Սառը պատերազմ». միջազգային մամուլը Սիրիայում թուրք-ռուսական բախման և դրա առաջին հետևանքների մասին
Նոյեմբերի 24-ին Սիրիայի տարածքում թուրքական F-16-ի կողմից խոցված ռուսական ռազմական Su-24 ինքնաթիռի թեման հեղեղել է միջազգային մամուլը:
Huffington Post-ը գրում է, որ ԱՄՆ նախագահ Բարաք Օբաման եւ Ֆրանսիայի նախագահ Ֆրանսուա Օլանդը կոչ են արել Ռուսաստանին «կենտրոնացնել հարվածները «Իսլամական պետություն» ահաբեկչական խմբավորման դեմ» եւ չհարձակվել Սիրիայի իշխանությունների դեմ պայքարող չափավոր ընդդիմադիր ուժերի վրա, քանի որ միայն այդ դեպքում հնարավոր կլինի խուսափել «վտանգավոր լարումից»:
Բրիտանական The Daily Beast-ի սյունակագիրը գրում է. «Երեկ Պուտինի համար Սիրիայում երեկ ամենավատ օրն էր»:
«Եթե վերաձեւակերպենք Մերձավոր Արեւելքից եկող բոլոր գլխագրերը, 1953-ից ի վեր առաջին անգամ ՆԱՏՕ անդամ-պետությունը հարձակում է գործել ռուսական ռազմական օբյեկտի վրա, եւ 1989-ից ի վեր առաջին անգամ ԱՄՆ կողմից ֆինանսավորվող մահմեդական ապստամբները աղբակույտի են վերածել ռուսական ռազմական ինքնաթիռը», - գրում է հեղինակը:
Ռուսական ռազմական հրամանատարության հաղորդմամբ, միջադեպից հետո ինքնաթիռի օդաչուների որոնողական աշխատանքների համար օդ բարձրացած երկու ռուսական Մի-8 ուղղաթիռներից մեկը թիրախավորվել է փոքր տրամաչափի զինատեսակներից եւ ստիպված է եղել արտակարգ վայրեջք կատարել: Մեկ ռուս զինվոր սպանվել է:
«Ուղղաթիռը ոչնչացվել է անօրինական զինված խմբավորումների կողմից արձակված կրակից», - հայտարարել է ռուս գեներալ-լեյտենանտ Սերգեյ Ռուդսկոյը:
Ամերիկյան CNN-ը վկայակոչում է Թուրքիայի իր աղբյուրները եւ պնդում, որ Թուրքիայի հակաօդային պաշտպանության ուժերը նախազգուշացրել են սահմանը ենթադրաբար հատած ինքնաթիռի օդաչուներին, սակայն Ռուսաստանի նախագահ Վլադիմիր Պուտինը հայտարարել է, որ ռուսական ինքնաթիռը չի հատել միջազգային սահմանը՝ գտնվելով մեկ կմ հեռավորության վրա, իսկ Թուրքիան իր գործողությամբ «մեջքից հարված» է հասցրել միջազգային ահաբեկչության դեմ պայքարող Ռուսաստանին:
Ամերիկյան բարձրաստիճան մի պաշտոնյա հայտնել է CNN-ին, որ իրենց հաշվարկներով ռուսական ռազմական ինքնաթիռը Թուրքիայի տարածքում կարող էր գտնվել 30 վայրկյան կամ ավելի քիչ, իսկ Անկարայի պնդմամբ՝ 10 անգամ նախազգուշացում է տրվել լքել Թուրքիայի տարածքը, սակայն պարզ չէ, արդյոք այդ նախազգուշացումները տրվել են այն ժամանակ, երբ ռուսական ինքնաթիռը գտնվել է Թուրքիայի տարածքում, թե ոչ:
Ռուսաստանի Պաշտպանության նախարարությունը Twitter-ի պաշտոնական միկրոբլոգում հերքել է, որ Թուրքիայի ԶՈՒ որեւէ փորձ է կատարել ռադիո կամ վիզուալ կապ հաստատել ռուսական ինքնաթիռի հետ:
#SYRIA #Rudskoy Objective monitoring data confirmed no attempts of Turkish plane to establish communication or visual contact with Rus crew
— Минобороны России (@mod_russia) November 24, 2015
ՌԴ ՊՆ հրապարակած տեսանյութը ներկայացրել է ինքնաթիռի թռիչքուղին, որը հեռու է գտնվել Թուրքիայի տարածքից:
Ռուսաստանը հերքում է Թուրքիայի մեղադրանքները եւ պնդում, որ ինքնաթիռը իր առաքելության իրականացման ժամանակ գտնվել է սահմանից առնվազն մեկ կմ հեռավորության վրա եւ չէր կարող հատել Թուրքիայի սահմանը:
ԱՄՆ-ում Թուրքիայի դեսպան Սերդար Կըլըչը գրել է Twitter-ի իր միկրոբլոգում. «Հասկացեք: Թուրքիան երկիր է, որի նախազգուշացումներին պետք է ականջալուր լինել եւ լուրջ ընդունել: Մի փորձարկեք Թուրքիայի համբերությունը: Փորձեք շահել մեր բարեկամությունը»:
Wikileaks-ը հրապարակել է ՄԱԿ-ում Թուրքիայի դեսպանը պաշտոնական նամակը ՄԱԿ ԱԽ նախագահողին, որտեղ դեսպանը պնդում է, որ ռուսական ինքնաթիռը Թուրքիայի տարածքում է գտնվել 17 վայրկյան:
Turkey's statement: Claims Russia violated airspace for just "17 seconds" with very slow 243 miles/hour jet. pic.twitter.com/knhdy0RWIA
— WikiLeaks (@wikileaks) November 24, 2015
Russia Today-ի հրապարակման համաձայն, Թուրքիայի ներկայացրած հիմնավորումները ակնհայտ փաստերի խեղաթյուրում են:
Թուրքիայի կոչով նոյեմբերի 24-ին երեկոյան Բրյուսելում կայացել է ՆԱՏՕ-ի խորհրդի նիստ, որից հետո կազմակերպության Գլխավոր քարտուղար Յենս Ստոլտենբերգը հայտարարել է. «Ես նախկինում էլ արտահայտել եմ իմ մտահոգությունները ՆԱՏՕ-ի սահմաններին մոտ ՌԴ իրականացվող ռազմական գործողությունների առնչությամբ: Այս [միջադեպը] առաջ է քաշում ապագայում նման միջադեպերից խուսափելու նպատակով պայմանավորվածություններ ձեռք բերելու եւ դրանք հարգելու կարեւորությունը»:
Ի պատասխան, ՌԴ փոխարտգործնախարար Սերգեյ Ռյաբկովը հայտարարել է, թե Ռուսաստանը «չի ակնկալում» ՆԱՏՕ-ից որեւէ անկողմնակալ հայտարարություն:
Ամերիկյան The Wall Street Journal-ի դիտարկմամբ, ՌԴ նախագահ Պուտինի այն հայտարարությունից հետո, թե ՆԱՏՕ անդամ-երկիր Թուրքիան ֆինանսավորում է ահաբեկչությունը, ռուսական հեռուստաընկերությունները ամբողջ օրվա ընթացքում Թուրքիայի ուղղությամբ մեղադրանքներ են հեղեղել:
Թերթը գրում է, որ ԱՄՆ եւ Ֆրանսիայի առաջնորդների պահանջները, ներառյալ Սիրիայի նախագահ Բաշար Ասադի ապագայի վերաբերյալ, ում Ռուսաստանը սատարում է, հավելյալ լարվածություն են մտցրել նոյեմբերի 26-ին նախատեսված Օլանդ-Պուտին հանդիպման օրակարգ:
Ռուսական РИА Новости-ի հաղորդմամբ, Եվրոպայում ՆԱՏՕ-ի ուժերի նախկին գլխավոր հրամանատար Ուեսլի Քլարկը հայտարարել է, որ Թուրքիան այս կամ այն կերպ միշտ աջակցել է «Իսլամական պետություն» խմբավորմանը, որը մի շարք երկրներում, ներառյալ Ռուսաստանը եւ ԱՄՆ, ներառվել է ահաբեկչական խմբավորումների ցանկի մեջ, երբեմն նաեւ օգտվել խմբավորման կողմից անօրինական կերպով արտահանվող նավթից:
Նախորդ շաբաթ Անթալիայում կայացած Պուտին-Օբամա խորհրդավոր երկխոսությունից հետո, երբ ԱՄՆ նախագահը հայտնել էր Ռուսաստանի հետ գործողությունները համակարգելու անհրաժեշտության մասին, Ֆրանսիայի նախագահ Օլանդի հետ հանդիպմանը Օբաման հայտարարել է. «Ռուսաստանը այժմ երկուսի կոալիցիա է՝ Ռուսաստան եւ Իրան, որոնք սատարում են Ասադին: Մենք ենք ավելի գլոբալ կոալիացիա կազմակերպել: Ռուսաստանը այդ շրջանակից դուրս է»:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ