Ձեր վստահելի աղբյուրը

Արմավիրի մարզի Մրգաշատի մի բնակիչ Սահմանադրական փոփոխությունների նախագիծը ձեռքին մոտեցավ ՀՀԿ-ական պատգամավոր, «Այո»-ի կողմնակից Վարդան Այվազյանին ու հարցրեց. «Եթե ես այո ասեմ փոփոխություններին, ապա կա՞ որևէ մեկը էս պետության մեջ, որ խոսք է տալիս, այո-ի դեպքում եթե ոչ իմ երեխեն, գոնե իմ երեխու երեխեն էս պետության մեջ ապրի նորմալ: Անկախացումից արդեն տարիներ են անցել, ոչինչ չենք տեսել»:

Այվազյանն ասաց, որ նման բան կարող է ասել ինքը. «Ես եմ ասում, որ այն, ինչ ընտրում ես, ավելի լավն է, քան այն, ինչ կա: Էսօր դու բողոքում ես քո եղածից, ասում եմ, փոխի, եթե դու ոչ ես ասում, մնում է նույնը: Դրանից հետո դու ես որոշում՝ «հա» ես ասում, թե «չէ»»:

Մրգաշատի մի բնակիչ էլ ասաց, որ ուսուցիչ է, հարցի համար կարող է մարզպետը կանչի ու աշխատանքից ազատի, բայց «այո»-ի կողմնակիցներին ուղղված մտահոգությունը պետք է բարձրաձայնի. «Մեր հանրապետություն Հանրապետական կուսակցությունը ժողովրդի համար չարիք է դառել: Պահակ, դպրոցի տնօրեն կամ որևէ այլ բան աշխատելու համար պետք է կամ ծանոթ ունենա, կամ հանրապետական կողմնորոշում»:

Ուսուցիչը հետաքրքրվեց, ի՞նչ երաշխիք, որ 100 տոկոսով համամասնական ընտրակարգին անցնելիս ձեր կուսակցական ցուցակը նայելիս չեն լինի թաղային հեղինակություններ, մականունավոր մարդիկ: Ասաց, որ ինքը չարորակ ոռւոցք ունի, դպրոցում դասավանդելու համար 60 հազար դրամ աշախատավարձ է ստանում այն պարագայում, երբ «հարգարժան Վարդան Այվազյանն ասում է, որ 500 հազար դրամը քիչ փող է: 60 հազարով ես որտե՞ղ դիմեմ՝ բուժվեմ»:
Այվազյանն ասաց, որ իր կարծիքով, Հուսուցչի աշխատավարձը շատ-շատ քիչ է. «Ես ասում եմ, որ մեր բոլոր պաշտոնյանների, ուսուցիչների աշխատավարձը շատ բարձր պետք է լինի, որ նրանք անկախ լինեն, որ չվախենան, հասկանո՞ւմ ես: Հարցը սրան է վերաբերում»:

Ինչ վերաբերում է «մականուններով տղեք»-ի խորհրդարանում հայտնվելուն, ապա Այվազյանն ասաց. «Նրանք հեղինակություններ են, դուրներդ գալիս է, թե ոչ, նրանք կան: Կուզես ուզի, կուզես՝ մի ուզի: Ձեր թաղից մականունավորներն են, չէ անցում: Հիմա մենք ասում ենք, մեծամասնական ընտրակարգը հանում ենք: Հնով մնալու է: Երկրորդը՝ դուք եք ընտրողը: Դուք պիտի տեր կանգնեք: Էս գիրքն ասում է, վարչապետ ընտրելու համար միավորվեք: Ասում է, էն ժամանակ, որ դատախազին մի հոգի էր նշանակում, ընդդիմություն, հիմա դու էլ պիտի նշանակես, որ դաախազը բռնի, թե չէ ես եմ դրել դատախազին, ինքը ինձ չի բռնելու, նույնը դատավորին է ասում»: