Ձեր վստահելի աղբյուրը

ԱԺ նախագահ Գալուստ Սահակյանն այսօր խորհրդարանում լրագրողների հետ զրույցում անդրադառնալով Հայաստանում սահմանադրական բարեփոխումների հանրաքվեի վերաբերյալ ՀՀ-ում ԱՄՆ դեսպանատան վերջին հայտարարությանը, նշեց, որ իրենք էլ ենք շահագրգիռ, որ եթե կան խախտումներ, ապա խախտում թույլ տված մարդիկ օրենքի շրջանակներում պատժվեն:

«Ես այդ հայտարարության մեջ որևէ նորույթ չեմ տեսնում»,- ասաց ԱԺ նախագահը:

Դիտարկմանը, թե այդ հայտարարությունը կոշտ էր, Գ.Սահակյանը պատասխանեց. «Նայած որ երկիրն ինչ մոտեցումներ ունի մյուս երկրի նկատմամբ: Այսինքն՝ այնպես չէ, որ ճշմարտությունները մի տեղ են կուտակված: Ամեն երկիր, պետություն իր քաղաքական շահն ունի տարբեր երկրներում: Այդ շահերի հետևանքով կարող են հայտարարություններ արվել, որոնք մեզ համար կարող են լինել ընդունելի կամ մերժելի»:

Մեկ այլ դիտարկմանը, թե ամեն դեպքում ԱՄՆ-ը համարվում է ամենաժողովրդավարական երկրներից մեկը, ԱԺ նախագահը նշեց. «Ես կարծում եմ, որ Զարուհու օրինակով ամենադեմոկրատականը մենք ենք: Եթե Միացյալ Նահանգներում այդպես կրքերը չհանգստացնող ելույթներ լինեն, կարծում եմ, որ պատիժներն ավելին են»:

Հարցին, թե փաստորեն սա հերթական ապտակն էր ՀՀ իշխանություններին, ԱԺ նախագահն ասաց, որ իշխանություններին որևէ մեկը  չի պատրաստվում ապտակել:

«Եվ երկրորդն էլ Հայաստանի իշխանություններին ապտակը կարող է վերաբերվել հայոց պետությանը: Այնպես որ զերծ մնացեք անտրամաբանական հայտարարություններից»,- ասաց նա:

ԱՄՆ դեսպանությունն իշխանություններին կոչ է անում հանրության մոտ վստահությունը բարձրացնել, ինչո՞ւ այս անգամ իշխանությունները չկարողացան հանրաքվեով բարձրացնել հանրության վստահությունը հարցին ի պատասխան՝ Գալուստ Սահակյանն ասաց, որ  վստահությունը բարձրացնելը ոչ միայն ընտրություններից է կախված, այլ ընդհանրապես:

«Մինչև այսօր նախագահական, կիսանախագահական Սահմանադրության ամբողջ պրոցեսներում, ես կարծում եմ, կրքերը հասունանում են նրա համար, քանի որ հաղթողն ստանում էր ամեն ինչ, պարտվողը՝ ոչինչ: Բարեփոխված Սահմանադրության մեջ այդպես չէ. և հաղթողն է ստանում ինչ-որ մի բան, և նաև ընդդիմությունն է ստանում ինչ-որ մի բան: Առավել ևս և դիմությունը, և ընդդիմությունը, և հասարակությունն անմիջապես հնարավորություն են ստանում մասնակցել կառավարման պրոցեսին»,- ընդգծեց Գ.Սահակյանը:

Դիտարկմանը, թե ԱՄՆ դեսպանատունը կարող է գրանտների հատկացումը մերժել, Գալուստ Սահակյանը պատասխանեց. «Ես չեմ կարծում, որ Հայաստանին որևէ մեկն այնքան գրանտներ է տալիս և դա այն արժևորումն է, որ Հայաստանում շատ մեծ օգուտներ է տալիս, եթե չտան, շատ մեծ վնասներ կլինի: Այդ գրանտները տրվելու են, դրանք ոչ թե տալիս են մեկ ուղղվածության օգնության, դրանց մեջ նաև քաղաքական ընդերք կա, իսկ քաղաքական ընդերքը երբեք չի պակասում»:

Լրագրողները նշեցին նաև, որ Աջափնյակում հանրաքվեի կեղծման առումով Գալուստ Սահակյանի և նրա որդիների անուններն են շրջանառվում, չե՞ն վախենում, որ ԱՄՆ «սև ցուցակում» կհայտնվեն: ԱԺ նախագահն էլ նշեց, որ իր և իր որդիների անունները չեն կարող շոշափվել: «Ես գիտեմ՝ հանիրավի, որովհետև Հայաստանում ինչ-որ տրադիցիա է ձևավորվել՝ ինչքան մեծ է դերակատարում, այնքան մեծ են հոշոտողները: Այնպես որ Աջափնյակում ամեն ինչ կարգին է, նույնիսկ եթե ես Աջափնյակի բնակիչ եմ, չեմ կարծում, որ հենց դրա համար պետք է պատասխան տամ»,- ասաց նա:

Անդրադառնալով հարցին, թե իշխանությունները մտավախություն չունե՞ն, որ ԱՄՆ-ն Հայաստանի համար «սև ցուցակ» կկազմի և վիզաներ չի տրամադրի, Գալուստ Սահակյանն ասաց, որ «մեր ցուցակներն այն ժամանակ Ամերիկան արդեն կազմել էր, էսօր չի ուզում հետ նահանջի»:

«Սև ցուցակները պիտի այն ժամանակվա մեծ աշխարհի բոլոր պետությունների համար կազմեն, որոնք իրենց աչքերը հառած տեսնում էին, թե մի ողջ ժողովրդի ոնց են ոչնչացնում: Էնպես որ մեր արգումենտներն ավելի բարձր են: Պարզապես մենք մեր քաղաքական տրամաբանությամբ, պետության գաղափարախոսությամբ թշնամիներ չենք որոնում, փորձում ենք բարեկամական կապեր ստեղծել բոլոր երկրների հետ: Բայց դա չի նշանակում, որ մենք անզեն զինյալներ ենք, մենք էլ ենք տիրապետում մեր գործիքներին, մեր մոտեցումներին: Այնպես որ, փոխանակ այդ հարցերը տաք, հպարտության ճանապարհը գտեք, մտեք դրա մեջ և կտեսնեք, որ ամեն ինչ այնպես չէ, ինչպես դուք եք կարծում»,- ընդգծեց Գալուստ Սահակյանը:

Հարցին, թե  Հայաստանի իշխանությունները մտահոգվա՞ծ են  ԱՄՆ դեսպանատան տարածած հայտարարությամբ,  ԱԺ նախագահն ասաց. «Քաղաքական և նաև աշխարհաքաղաքական վիճակի տրամաբանությանը տեղյակ ենք, յուրաքանչյուր հայտարարություն մենք զգում ենք, թե որտեղից է գալիս և ինչի համար է: Այսինքն՝ եթե դեսպանությունները հայտարարում են, դա Հռոմի պապը չէ, որպեսզի սրբության տեղ դնենք: Մենք էլ մեր քաղաքականությունն ունենք: Ինչո՞ւ, օրինակ, չեք ասում, որ այդ նույն դեսպանատունը նաև լավ բաներ էր ասել հանրաքվեի մասին»: