Ձեր վստահելի աղբյուրը

Վերջին 15 օրերի ընթացքում գրեթե ամեն օր օդի միջին ջերմաստիճանը կլիմայական նորմայից 8-10 աստիճանով բարձր է եղել: Այսօր լրագրողների հետ հանդիպմանն ասաց ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը՝ նշելով, որ ներկա պահին էլ բարձր ջերմաստիճանը պահպանվում է:

«Այս տարվա փետրվարը եղանակակլիմայական պայմանների առումով բացառիկ էր այն տեսանկյունից, որ ամսվա 15-ից նկատվեց ջերմաստիճանի կտրուկ բարձրացում: Օդի ջերմաստիճանը փետրվարի 15-ից մինչև օրս կայուն բարձր մնաց: Ջերմաստիճանի լուրջ անկումներ չգրանցվեցին: Փետրվարի երկրորդ կեսից բարձր ջերմային ֆոնը պահպանվում է մինչև օրս: Նման բան լինում է շատ հազվադեպ, վերջին անգամ նման երևույթ գրանցվել է 1966 թվականին: Համարվում է դարի ամենատաք փետրվարներից»,-ասաց Սուրենյանը:

Նա տեղեկացրեց, որ փետրվարի 29-ին Բագրատաշենում 21 աստիճան է եղել, Արարատյան դաշտում` 19-20: Վերջին 10 օրերին Արարատյան դաշտում ջերմաստիճանը գիշերը դարձել է դրական: 10 օրվա ընթացքում բացասական ջերմաստիճան չի գրանցվել, ինչը նունպես բացառիկ է:

«Ներկա պահին հանրապետության տարածք է մոտեցել օդի տաք ալիք: Այս անգամ տաք օդի հոսանքը հանրապետության տարածքին մոտեցել է Իրաքից: Մենք գտնվում ենք տաք հոսանքների ազդեցության տակ, և ըստ կանխատեսման առաջիկա 7-8 օրերին լինելու ենք տաք հոսանքների ազդեցության գոտում»,-ասաց մասնագետն՝ ընդգծելով, որ առաջիկա օրերին սպասվում է օդի ջերմաստիճանի բարձրացում՝ մինչև մարտի 4-ը ներառյալ:

«Արդյունքում ամենաբարձր ջերմաստիճանը կգրանցվի մարտի 3-ին և 4-ին` Արարատյան դաշտում հասնելով մինչև 22-23, իսկ Տավուշի, Սյունիքի հովտային հատվածներում` մինչև 24-25, որը նույնպես անոմալ տաք եղանակ կհամարվի: Օդի ջերմաստիճանը նորմայից բարձր կլինի 8-12 աստիճանով: Վաղվանից սկսած Արարատյան դաշտում կտրուկ բարձրանալու է գիշերային ջերմաստիճանը: Մարտի 3-ից հետո նվազագույն ջերմաստիճանը կտատանվի +8-ից  +10 աստիճանի սահմաններում»,-հայտնեց Սուրենյանը:

Նրա խոսքով՝ այս ջերմային ֆոնը բնորոշ է ապրիլի առաջին տասնօրյակին. «Ապրիլի առաջին տասնօրյակում Արարատյան դաշտում և հանրապետության ցածրադիր հատվածներում ջերմաստիճանը բարձրանում է 20-21 աստիճան: Ձյան պաշարները հանրապետության տարածքում բավարար են գնահատվում: Բավականին առատ ձյուն է կուտակված լեռնային շրջաններում: Ձյան առավելագույն բարձրությունը հասնում է 1,5 մետր: Տեղումների քանակը փետրվարին եղել է նորմային մոտ»:

Ինչ վերաբերում է մարտ ամսվան՝ Սուրենյանն ասաց. «Մարտը տաք կլինի, միջին ամսական ջերմաստիճանը նորմայից բարձր կլինի 1-2 աստիճանով: Կանխատեսվում է, որ տեղումնառատ կլինի: Տեղումները կլինեն նորմայից ավելի, իսկ առաջիկա 10 օրերին հանրապետության տարածքում ջերմաստիճանի կտրուկ անկում, ձյան առատ տեղումներ, ցրտահարություններ, չեն դիտվի»: