Ձեր վստահելի աղբյուրը

Հայաստանում կուտակային կենսաթոշակային համակարգում ընդգրկված մասնակիցների թիվը փետրվարի վերջր դրությամբ հասնում է 140 հազարի, որից  65-70 հազարը պետական կառույցի աշխատողներ են, իսկ 70 հազարը` մասնավոր հատվածի աշխատողներ:  Այս մասին այսօր լրագրողների հետո հանդիպման ժամանակ հայտարարեց ՀՀ կենտրոնական բանկի արժեթղթերի շուկայի կարգավորման բաժնի պետ Կարեն Հակոբյանը:

Նրա խոսքերով` 1974 թվականից հետո ծնված վարձու աշխատողների թիվը Հայաստանում կազմում է շուրջ 300 հազար, այսպիսով` ստացվում է, որ այս պահին ընդհանուր համակարգի շուրջ 50 տոկոսը ներգրավված է: «216  հազար մարդ էլ ունի ոչ զրոյական հաշիվներ: Նրանք հիմնականում այն անձինք են, որոնք ամենասկզբում հատկացումներ են կատարել, բայց հետագայում դուրս են եկել համակարգից: Այսինքն` մոտ 60 հազար մարդ դուրս է եկել համակարգից, բայց նրանց հաշիվներում գումար կա և կառավարվում է»,- հայտնեց Կարեն Հակոբյանը:

Ըստ նրա՝ համակարգին ամսական միանում է 3-4 հազար մարդ, նրանք հիմնականում առաջին անգամ աշխատաշուկա մուտք գործողներն են:

ԿԲ ներկայացուցչի փոխանցմամբ՝ Հայաստանում կենսաթոշակային ֆոնդերում ընդհանուր ակտիվները կազմում են 35.5 միլիարդ դրամ, որի 16.5 միլիարդը հատկացվել է մասնակցիների կողմից, նույնքան համաֆինասավորվել է պետության կողմից, իսկ 2.5 միլիարդի չափով ապահովվել է եկամուտ:

Կարեն Հակոբյանը հայտնեց, որ ֆոնդերի տարեկան եկամտաբերությունը կազմում է շուրջ 7 տոկոս: Ըստ նրա ՝ ակտիվների 66 տոկոսը ներդրված են ՀՀ դրամով, շուրջ 25 տոկոսը` ԱՄՆ դոլարով և 9 տոկոսը` եվրոյով: «Գումարները հիմնականում ներդրվել են հետևյալ ուղղություններով` բանկային ավանդներ, բաժնետոմսեր, պետական պարտատոմսեր, կորպորացիաների կողմից թողարկված պարտատոմսեր (հիփոթեքային և միջազգային կազմակերպությունների կողմից թողարկված դրամային պարտատոմսեր), ինչպես նաև մի շարք աշխարհահռչակ ընկերությունների բաժնետոմսեր, օրինակ՝ Apple, Google, Nestle, Toyota, Nisan, Sony, CocaCola և այլն»,-ընդգծեց Կարեն Հակոբյանը:

Նշվեց նաև, որ 2016թ-ի փետրվարի դրությամբ պորտֆելի կառուցվածքում շուրջ 28 տոկոսը բաժին է ընկնում բանկային ավանդներին, 38 տոկոսը` պետական արժեթղթերին, 28 տոկոսը` բաժնային արժեթղթերին, 6 տոկոսը` կորպորատիվ պարտատոմսերին:

Կարեն Հակոբյանի խոսքերով՝ եթե համեմատեն նախորդ տարվա հետ, ապա էապես ավելացել են բաժնային արժեթղթերում և պարտատոմսերում ներդրումները: «Սկզբնական փուլում, երբ համակարգը նոր էր ձևավորվում, ավանդներում ներդրումների տեսակարար կշիռը շատ ավելի մեծ էր, որը ժամանակի ընթացքում ուղղվեց արդեն ռեալ սեկտոր, պարտատոմսերում ներդրումներ կատարվեցին, ինչ արդյունքում տոկոսային տեսակարար կշիռը ավելացավ»,-ասաց նա: