Ձեր վստահելի աղբյուրը

«Էրդողանի հայտարարությունը սպառնալիքի տարրեր է պարունակում: Այս հայտարարությունը ևս մեկ անգամ ի ցույց է դնում Ադրբեջանի կողմից սանձազերծած ռազմական գործողությունների համատեքստում Թուրքիայի բացահայտ հրահրող ու սադրիչ կեցվածքը»,- «Panorama.am»-ի թղթակցի հետ զրույցում՝ անդրադառնալով Թուրքիայի նախագահի Խորվաթիայում արած հերթական հակահայկական հայտարարությանը, նշել է թուրքագետ Լևոն Հովսեփյանը:

Թուրքիայի նախագահ Ռեջեփ Թայիփ Էրդողանը Երևանին մեղադրել է ԼՂ հակամարտության սրման մեջ՝ հայտարարելով. «Զինադադարի ռեժիմի խախտումով Հայաստանը կրակի հետ է խաղում: Վերջին իրադարձությունները հակամարտության գոտում ցույց տվեցին, որ Ադրբեջանի բանակը գերակայություն ունի հայկական զինուժի նկատմամբ»:

«Պաշտոնական Անկարան բացահայտ աջակցություն է ցուցաբերում Ադրբեջանին, որով նա արդարացնում և սրբագործում է Ադրբեջանի սանձազերծած ագրեսիան Արցախի դեմ»,- նշեց թուրքագետը: 

Հովսեփյանի համոզմամբ, տարածաշրջանային քաղաքականության մակարդակում, ընդհանրապես ականատես ենք եղել Թուրքիայի, մեղմ ասած, ապակառուցողական, և սադրիչ, բացահայտ հրահրիչ քաղաքականությանը, որը արդեն իսկ տեղափոխվում է հայկական հարթություն:

«Ակնհայտ է, որ Անկարան բացի հայտարարությունները, նաև որոշակիորեն ներգրավվածություն ունի: Բայց սա հակասում է միջազգային այն գործընթացներին, բանակցություններում դրված այն տրամաբանությանը, որը կա ներկայումս: Փաստորեն Թուրքիան լինելով Մինսկի խմբի անդամ իրավունք չունի նման հայտարարություններ անելու, և պետք է բավական բարձր մակարդակով այս հարցադրումը դրվի: Հաջորդ հանգամանքը՝ Թուրքիան ՆԱՏՕ-ի անդամ է, և Հյուսիսատլանտյան դաշինքը պետք է որոշակի զսպիչ դեր ունենա իր անդամ հանդիսացող երկրի նկատմամբ, լարված իրավիճակում հակամարտածին սադրող գործողություններից ու հայտարարություններից զերծ մնալու համար»,- նշեց Լ.Հովսեփյանը:

Թուրքագետը հետաքրքրական համարեց այն, որ Էրդողանը ընդամենը 2 օր առաջ գտնվելով Բաքվում, որոշակիորեն ձեռնպահ մնաց հրապարակային մակարդակում Արցախի հիմնախնդրի հետ կապված հայտարարություններից, սակայն նախօրեին Խորվաթիայում հանդես եկավ նման սադրիչ հայտարարությամբ:

«Կարծում եմ, որ բավական լուրջ անհանգստություն է պատճառում Թուրքիային վերջին օրերին հայկական ուժերի կողմից պատժիչ գործողությունները Ադրբեջանին սանձահարելու հարցում»,- նշեց թուրքագետը և հավելեց, որ Անկարայի այս պահվածքը տարածաշրջանային քաղաքականության համատեքստում դերակատարության խնդիր ունենանլու հետ է կապված: 

Ըստ թուրքագետի, Էրդողանը իր նախորդ հայտարարություններից մեկում բավական ուշագրավ մի շեշտադրում էր կատարել:

«Խոսելով Թուրքիայի ռազմական տնտեսական ներուժի մեծացման մասին, Էրդողանը նշել էր, որ եթե նախորդ դարի 90-ական թվականներին լիներ այն Թուրքիան, որը կա այսօր, ապա Արցախի հիմնախնդիրը նման կերպ չէր զարգանա, ինչպես եղավ 90-ականների սկզբին: Իսկ ահա Դավութօղլուն, մեկ այլ հայտարարությամբ նշել էր՝ ԼՂ հակամարտության հետ կապված Ադրբեջանի պարտությունը Թուրքիայի ռազմավարական կորուստն էր»,- նշեց Հովսեփյանը և բացատրեց, որ սրանով Անկարան ցույց է տալիս, որ ներգրավված է այս հիմնախնդրում, և ամեն կերպ փորձում է վերախմբագրել Ադրբեջանի այն կորուստները կամ այն բացթողումները որոնք Արցախյան ճակատում եղել են:

«Սա բավական վտանգավոր միտում է և կարծում եմ Թուրքիայի նկատմամբ Միջազգային հանրությունը պետք է զսպման լուրջ մեխանիզմներ կիրառի»,- նշեց Լևոն Հովսեփյանը և հավելեց, որ այս հարցը պետք է բարձրացվի միջազգային տարբեր հարթակներում: