Ձեր վստահելի աղբյուրը

«Ստեղծված պատերազմական վիճակում բարոյական չէ ստեղծել արհեստական օրակարգ և պահանջել երկրի գլխավոր գերագույն հրամանատարի հրաժարականը»,- այսօր լրագրողների հետ հանդիպմանը հայտարարեց ՀՀԿ փոխնախագահ Արմեն Աշոտյանը՝ Նաղդալյանի հրաժարականի՝ հասարակության պահանջին:

«Դժվար է պատկերացնել, որ այսօր այդ հարցը կա օրակարգում», -հավելեց ՀՀԿ-ականը:

Լրագրողի հարցին, թե կիսո՞ւմ է Աշոտյանը Հերմինե Նաղդալյանի մոտեցումները Ղարաբաղյան խնդրի կարգավորման առնչությամբ՝ կուսակցության փոխնախագահը պատասխանեց.

«Թողնում եմ տիկին Հերմինեին՝ իր հարցազրույցի հետ կապված մեկնաբանությունը, ինչն արել է: Եկեք ամեն ինչ դնենք մի կողմ և պարզ խոսենք՝ արդյոք այս թեմայի հետագա քննարկումը բարձրացնո՞ւմ է մեր զինվորի ոգին, արդյոք չի՞ բերում նրան, որ տղերքը, որոնք կանգնած են առաջնագծում, ծանոթանալով լրահոսին՝ որոշակի հոգեբանական խնդիրներ կարող են ունենալ:

Ղարաբաղյան խնդրի կարգավորումը ԱԺ մանդատը չէ, դա երկրի ղեկավարի մանդատն է՝ նախագահի մանդատն է, իսկ Սերժ Սարգսյանի տեսակետներին կարողացել եք հաղորդակից լինել: Այս հարցի իրական տերը ԼՂՀ ժողովուրդն է, Բակո Սահակյանը հստակ բարձրաձայնեց իրենց մոտեցումները»:

Հիշեցնենք՝ ԱԺ փոխնախագահ Հերմինե Նաղդալյանը խորհրդարանում լրագրողների հետ ճեպազրույցում ասել էր. «Մեր փոխզիջումը ոչ թե 5 գրավյալ տարածքներն են, այլ Մադրիդյան սկզբունքների ամբողջությունը, որտեղ մենք ներկայանում ենք որպես խաղաղ, ինքնիշխան պետության համար պայքարող ժողովուրդ:  Մենք չենք պայքարում ձեր հողերի համար: Մենք պայքարում ենք մեր պետության, մեր խաղաղ, ինքնիշխան պետության համար: Երբ կլինի հանրաքվե, երբ կընդունվի կարգավիճակի մասին որոշում և աշխարհը կընդունի Ղարաբաղի անկախությունը, մենք ձեր հողերը կամ այն հողերը, որոնց վրա մենք այդ իրավունքը չունենք, մենք այդ հողերը չենք ուզում: Դա մեր բուֆերային զոնան է»:

Անդրադառնալով այս օրերին տարբեր խմբերի կողմից պաշտոնյաների, այդ թվում՝ Նաղդալյանի հրաժարականների պահանջի մասին, Աշոտյանն ասաց, որ որոշ մարդիկ նման էներգիա ունեն, բայց արդյոք դա կառուցողակա՞ն է. «Այն, ինչ կատարվելու է, կատարվում է, ով չպետք է աշխատի՝ չի աշխատելու»:

Կոնկրետ Նաղդալյանի հրաժարականի մասին հարցին Աշոտյանը՝ նախ ոչ կոռեկտ համարեց հարցը, այնուհետև պատասխանեց. «Ես մի քիչ ավելի լուրջ եմ տրամադրված այս հանդիպմանը: Անլուրջ է այս հասարակական քննարկումների պոչը, ինքը չի այդ հարցի իրական տերը՝ մանդատի առումով: Ինքը բացատրությունները տվել է, մաստակ սարքել այս թեմայից, նշանակում է չհասկանալ ինչն է ճիշտը գլոբալ առումով»:

Այդուհանդերձ, խոսելով ղարաբաղյան հիմնախնդրից և դրա շուրջ տարբեր քննարկումներից, ՀՀԿ փոխնախագահն առաջարկեց  «փոխզիջում» բառը հանել բառապաշարից, քանզի դեռ բանակցային գործընթացի վերսկսման մեկնարկը դեռ չկա, իսկ դրանց վերսկսմամբ հնարավոր արդյունքների մասին խոսելն անարդյունավետ է:

«Մեր խնդիրն է արտաքին քաղաքականության օրակարգում թողնել միայն այն հարցը, որ միջազգային հանրությունը հասցեական դատապարտի Ալիևի արկածախնդրությունը», -հավելեց բանախոսը: