Ձեր վստահելի աղբյուրը

Ադրբեջանբցի լրագրող և իրավապաշտպան  Խաջիդա Իսմայիլովան  բանտից  ազատ արձակվելուց  հետո «BBC»-ի ադրբեջանական ծառայությանը տված հարցազրույցում հայտարարել է, թե Ադրբեջանի իշխանությունները սխալ են գործել իրեն ձերբակալելով և դա նրանց վրա թանկ է նստելու:

Խաջիդա Իսմայիլովան, ով զրպարտության, հարկերից խուսափելու և իշխանության չարաշահման մեղադրանքներով մեկ ու կես տարի կալանավորված էր, դատարանի վճռով մայիսի 25-ին ազատ է արձակվել: Նրա ազատազրկման  ժամկետը փոխարինվել է պայմանականով:

«BBC»-ի թղթակցի հարցին, թե ինչն է ամենամեծ տպավորությունը թողել Իսմայիլովայի վրա բանտից ազատ արձակվելուց հետո, ադրբեջանցի իրավապաշտպանը պատասխանել է.

«Ադրբեջանը, որը ես տեսա ազատ արձակվելուց հետո.  այն շատ չի տարբերվում այն Ադրբեջանից, որը կար իմ կալանավորվելուց առաջ: Ես բացակայել եմ ընդամենը մեկ ու կես տարի, դա մեծ ժամկետ չէ: Երբ ինձ ձերբակալեցին, Ադրբեջանում արդեն սկսվել էին լայնամասշտաբ բռնաճնշումները իրավապաշտպանների ու լրագրողների նկատմամբ: Իմ մի քանի կոլեգաներ արդեն կալանավորված էին, նրանց թվում՝ երիտասարդ ակտիվիստներ:

Մինչև իմ բանտից դուրս գալը նրանցից ոմանք ազատ են արձակվել, սակայն ինստիտուցիոնալ բռնաճնշումները շարունակվում են, և ավելի քան 80 քաղբանտարկյալներ շարունակում են մնալ բանտերում: Երկրում դեռևս պահպանվում է դիկտատուրան, երկրում շարունակում են մարդկանց ձերբակալել: Իմ ազատ արձակվելու օրը կալանավորվել են երկու երիտասար ակտիվիստներ, իսկ դրանից երկու օր առաջ՝  ևս երկու հոգի են ձերբակալվել, ում կտտանքների են ենթարկել: Այսինքն՝ մարդու իրավունքների պաշտպանության բնագավառում Ադրբեջանում շատ բան չի փոխվել»:

Խոսելով տնտեսական ճգնաժամի մասին՝ Իսմայիլովան նշել է, որ դրա հետևանքները տեսանելի են անգամ ադրբեջանական բանտերում:

«Կալանքի տակ իմ գտնվելու ժամանակ Ադրբեջանում սկսվեց տնտեսական ճգնաժամը, սակայն  չէի ասի, թե բանտում գտնվելու շնորհիվ ես չեմ զգացել դրա հետևանքները, քանի որ մանաթի վերջին արժեզրկումից հետո բանտարկյալներին իրենց հարազատների կողմից ուղարկվող ծանրոցների քանակը կտրուկ կրճատվեց:

Այսինքն՝ ճգնաժամը զգացվում է անգամ բանտում: Բոլորը հասկանում էին, թե ինչ է կատարվում երկրում, չնայած այնտեղ ինֆորմացիայի միակ աղբյուրը թույլատրելի հեռուստաալիքներն են, որոնց ներկայացնում են իրականության առավել տանելի ու մեղմացված պատկերը:»

Խոսելով իր դատապաշտպանի՝Ամալ Քլունիի հետ իր հետագա անելիքների մասին՝Խաջիդա Իսմայիլովան նշել է.

«Իմ ազատ արձակվելուց անմիջապես հետո Ամալ Քլունին  զանգահարեց ինձ։ Նա, իհարկե, շատ ուրախ էր այդ առթիվ: Հետո մենք մի քանի անգամ ևս խոսել ենք և շատ լուրջ ենք տրամադրված Մարդու իրավունքների Եվրոպական դատարան դիմելու հարցում, քանի որ ցանկանում եմ բողոքարկել դատարանի որոշումը՝ իմ մեղադրանքների մի մասը ուժի մեջ թողնելու մասին: Ուզում եմ ամբողջովին արդարացվել:

Պետք է հասնեմ նրան, որ Ադրբեջանի կառավարությունը պատասխանատվություն կրի ինձ մեկ ու կես տարի ազատազրկելու և այդ անօրինական մեղադրանքները ներկայացնելու համար:

Ամալ Քլունին անպայման ներկայացնելու է իմ շահերը ՄԻԵԴ-ում: Նա արդեն իսկ իմ շահերն է ներկայացնում Եվրոպական դատարանում մեկ այլ գործով, որը կապված է դատից առաջ իմ ձերբակալության հետ: Ամալ Քլունին ներկայացնելու է իմ շահերը մի շարք այլ փաստաբանների հետ միասին, ովքեր ներկայացնում են ինձ տեղական և եվրոպական դատարաններում:

Հարցին, թե ինչը ստիպեց Ադրբեջանի իշխանություններին ազատ արձակել իրեն, Խաջիդա Իսմայիլովան պատասխանել է.

«Իմ կարծիքով՝ դա բխում էր հենց նրանց շահերից, քանի որ ինձ ձերբակալելու նպատակը քննադատությունից ազատվելն էր, ինչը նրանց չհաջողվեց: Նրանց կոռումպացված գործունեության շուրջ հետաքննությունները ևս նվազելու փոխարեն ավելացան:

Եթե կառավարությունը թաքցնելու բան ունի, իսկ այդ ամենը չբացահայտվելու համար իշխանությունները պատրաստ են ձերբակալել անգամ լրագրողի, ապա դա անխուսափելիորեն մեծ  ուշադրոթյուն կգրավի, և այդպես էլ եղավ: Տարօրինակ է, որ Ադրբեջանի կառավարությունը այս ռիսկերը հաշվի չէր առել ինձ ձերբակալելիս:

Ամեն դեպքում ինձ բանտում պահելն ավելի թանկ էր նստում Ադրբեջանի իշխանությունների վրա, քան իմ ազատությունը:

Ես պատրաստվում եմ բողոքարկել նրանց որոշումն ու անել իմ ուժերից կախված ամեն ինչ, որպեսզի սա Ադրբեջանի իշխանությունների վրա շատ թանկ նստի: Ոչ թե նրա համար, որ վրեժ լուծեմ ինձ հետ կատարվածի համար, այլ որպեսզի ապագայում նման բան տեղի չունենա ուրիշների հետ»: