Արթուր Ալեքսանյանի հիմնական մրցակցին Ռուսաստանի Օլիմպիական հավաքականում տեղ չգտնվեց
Օլիմպիական 31-րդ խաղերի մեկնարկից առաջ Ադլերում ընթացող հունահռոմեական ոճի ըմբշամարտի Ռուսաստանի ազգային հավաքականի եզրափակիչ ուսումնամարզական հավաքի ընթացքում Օլիմպիական վերջնական կազմը հայտարարելու համար փորձամրցումային ստուգողական գոտեմարտեր են անցկացվել:
Օլիմպիական 6 քաշային կարգերից 4-ում մարզչական շտաբը վաղուց կողմնորոշվել էր ու ընտրանու գլխավոր մարզիչ Գոգի Կոգուաշվիլին Ռիոյի օլիմպիադայում հանդես գալու իրավուքն արդեն վերապահել էր Իսլամբեկ Ալբիևին, Ռոման Վլասովին, Դավիթ Չակվետաձեին և Սերգեյ Սեմյոնովին: Իսկ ահա 59 կգ և 98 կգ քաշային կարգերում հավասարազոր մրցակիցների միջև լրացուցիչ ստուգողական գոտեմարտերի անցկացման անհրաժեշտություն զգացվեց:
Ինչպես տեղեկացնում է Հայաստանի ըմբշամարտի ֆեդերացիայի պաշտոնական կայքը, մեզ համար առանձնակի հետաքրոթյուն էր ներկայացնում 98 կգ քաշային կարգում Ռուսաստանի ներկայացուցչի ընտրության հարցը: Լրացուցիչ մենամարտում մրցեցին վերջին 2 տարիների Ռուսաստանի չեմպիոն, 2015 թ. աշխարհի առաջնության բրոնզե մեդալակիր, 2015 թ. Եվրոպայի մարզական 1-ին խաղերի չեմպիոն Իսլամ Մագոմեդովն ու մարտին Ռիգայում ընթացած 2016 թ. Եվրոպայի առաջնության եզրափակչում 4:0 հաշվով աշխարհի կրկնակի չեմպիոն ու Եվրոպայի եռակի չեմպիոն Արթուր Ալեքսանյանին հաղթած և աշխարհամասի չեմպիոն հռչակված, 2013 թ. աշխարհի չեմպիոն, բազմափորձ Նիկիտա Մելնիկովը, ով 2016 թ. Ռուսաստանի առաջնությունը վնասվածքի պատճառով բաց էր թողել: Նրանց ստուգողական մենամարտը 3:1 հաշվով շահեց Մագոմեդովն ու իրավունք ստացավ մասնակցելու Օլիմպիական խաղերին:
Իսկ ահա Ռիոյում Ալեքսանյանի գլխավոր մրցակիցներից մեկին՝ Մելնիկովին, Օլիմպիական հավաքականի կազմում տեղ չգտնվեց: 59 կգ քաշային կարգում օլիմպիական ուղեգրի համար հիմնական պայքարը ծավալվում էր 3 ըմբիշների ՝ 24-ամյա հայազգի ըմբիշ ՍտեփանՄարյանյանի, ով ընթացիկ մրցաշրջանում գերազանց է հանդես գալիս, Մինգիյան Սեմյոնովի և Իբրահիմ Լաբազանովի միջև: Վերջինս ստուգողական գոտեմարտում նախ 4:2 հաշվով հաղթեց Եվրոպայի գործող չեմպիոն Մինգիյան Սեմյոնովին, իսկ երկրորդ լրացուցիչ մենամարտի ժամանակ էլ կրկին կողմնակալ մրցավարության օգնությումբ առավելության հասավ իր վերջին շրջանի գլխավոր մրցակից, հայազգի ըմբիշ Ստեփան Մարյանյանի նկատմամբ և Ռիոյին մասնակցելու ուղեգրի արժանացավ, իսկ Մարյանյանն, ով իր փայուն մրցելույթների շնորհիվ միանգամայն արժանի էր մեկնելու Օլիմպիադա, դուրս մնաց Ռուսաստանի օլիմպիական հավաքականից:
Գուցե ժամանակն է, որ հաջորդ օլիմպիական շրջափուլում երիտասարդ հայազգի տաղանդաշատ այս ըմբիշը ճակատագիրը Հայաստանի հավաքականի հետ կապի և 59 կգ քաշային կարգում Ռոման Ամոյանի արժանի փոխարինողը դառնա:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ