Ձեր վստահելի աղբյուրը

Այս տարվա սեպտեմբերի 1-ից ԱՊՊԱ ոլորտում վարորդներն ինքնուրույն՝ համաձայնեցված հայտարարագրի լրացման միջոցով կարող են գրանցել արդեն մինչև 100.000 դրամ (ներկայում գործող 50.000 դրամի փոխարեն) վնասներով ավտովթարները: Լրագրողների հետ հանդիպմանը տեղեկացրեց Հայաստանի ավտոապահովագրողների բյուրոյի գործադիր տնօրեն Վահան Ավետիսյանը:

«Այս տարվա մարտից ներդրվել էր վարորդների կողմից պատահարների ինքնուրույն գրանցման համակարգը և որոշակի փորձակումների արդյունքում եկանք եզրահանգման, որ վնասի շեմը կարող ենք բարձրացնել և անցում կատարել առավել մեծ վնասի շեմով պատահարների գրանցմանը: Համապատասխանաբար սեպտեմբերի 1-ից վարորդները եթե ունեն համաձայնություն պատահարում մեղավորության վերաբերյալ և տուժողի վնասի չափը չի գերազանցում կամ իր կողմից ակնկալվող չափը չի գերազանցում 100 հազար դրամը, ապա նման պատահարները վարորդները կարող են գրանցել ինքնուրույն»,- ասաց նա՝ հավելելով, որ սա ընդամենը հնարավորություն է և ոչ թե պարտավորություն:

Վ.Ավետիսյանի խոսքով, համաձայնեցված հայտարարագիրը բավականին պարզ փաստաթուղթ է, հնարավոր է կազմել և պատահարի վայրից մեքենան տեղաշարժել ընդամենը 5-7 րոպեի ընթացքում:

Նա հիշեցրեց որ համաձայնեցված հայտարարագրի միջոցով կարելի է գրանցել պատահարը, եթե պատահարին մասնակից են միայն երկու ավտոմեքենաներ, և վնաս է պատճառվել միայն այդ ավտոմեքենաներին կամ դրանցից մեկին, պատահարում ներգրավված երկու ավտոմեքենայի համար էլ առկա է գործող ԱՊՊԱ պայմանագիր,  վարորդներից մեկն ընդունել է իր ամբողջական մեղավորությունը:

Նման դեպքերում անհրաժեշտ է, որպեսզի վարորդները ձեռնարկեն հետևյալ հաջորդական գործողությունները`
1.առնվազն երեք անգամ լուսանկարեն բախված ավտոմեքենաների փոխադարձ դիրքերն ու վնասվածքները,
2. լրացնեն և ստորագրեն համաձայնեցված հայտարարագիրը,
3 ազատեն ճանապարհի երթևեկելի մասը,
4.տեղի ունեցած պատահարի մասին հեռախոսով տեղեկացնեն մեղավոր վարորդի ապահովագրական ընկերությանը՝ ներկայացնելով համաձայնեցված հայտարարագրում լրացված տեղեկությունները:

Ներկայացված վիճակագրության համաձայն, հուլիսի տվյալներով 430 ինքուրույն գրանցված  պատահար կա, որի արդյունք վճարվել է 17 միլիոն դրամ հատուցում:  3-7 օրում տուժող սեփականատերը կարողանում է հատուցում ստանալ ապահովագրական ընկերությունից:

«100 հազարի ներդրման պարագայում մենք ակնկալում ենք, որ պատահարների մոտավորապես  նպատակային շեմը կլինի 1200-1500»,- նշեց Վ.Ավետիսյանը:

Պատասխանելով հարցին, թե ինչո՞ւ որոշվեց 50 հազարից անցնել 100 հազարի, նա ասաց, որ ուսումնասիրել են միջազգային փորձը, եկել եզրակացության, որ 50 հազար դրամը ցածր ցուցանիշ է, շատ երկրներում հասնում է 1000-2000 դոլարի շեմը. «100 հազարը վթարի այն գումարն է, որը կրկին համարում ենք փոքր վնասի չափ և այսօր 100 հազար դրամը կազմում է ընդհանուր պատահարների 45-48 տոկոսը: Այսինքն այն ընդունելի շեմն է, որը կարել է թողնել, որպեսզի վարորդները գրանցեն ինքնուրույն, լրացուցիչ գործողություններ, գրանցումներ, մեխանիզմներ իրականացնելու անհրաժեշտություն չկա»:

Վ.Ավետիսյանը նաև տեղեկացրեց, որ 2016թ-ի սեպտեմբերի 1-ից համաձայնեցված հայտարարագրով վարորդների կողմից ինքնուրույն գրանցվող ավտովթարներից բացի մնացած բոլոր ավտովթարները կգրանցվեն միայն Ճանապարհային ոստիկանության կողմից: Այսինքն, ըստ նրա, ապահովագրական ընկերություններն այլևս պարտավորություն չունեն ժամանելու դեպքի վայր և դեպքի ժամանակ վարորդները պարտավոր են վթարի վայր հրավիրել Ճանապարհային ոստիկանությանը, հետևեն վերջինիս ցուցումներին, մինչև Ճանապարհային ոստիկանության ժամանումը չտեղաշարժեն ավտոմեքենաները և միջոցներ ձեռնարկեն ավտոմեքենաների հետքերն ու առարկաները պահպանելու ուղղությամբ,  պատահարը տեղի ունենալուց հետո առավելագույնը 40 րոպեի ընթացքում հեռախոսով տեղեկացնեն իրենց ապահովագրական ընկերություններին.

«Համապատասխանաբար սեպտեմբերի մեկից դեպքի վայրում ապահովագրական ընկերությանը սպասելու պարտավորություն վարորդները չունեն: Ճանապարհային ոստիկանության կողմից ավտովթարի գրանցումից հետո տուժող ավտոմեքենայի սեփականատերը հատուցում ստանալու համար գրավոր դիմում է ներկայացնում իրեն վնաս պատճառողի ապահովագրական ընկերությանը»։

Ըստ նրա, համաձայնեցված հայտարարագրի ներքո չընկնող գույքային վնասներով բոլոր ճանապարհատրանսպորտային պատահարները սահմանված կարգով կգրանցվեն ճանապարհային ոստիկանության կողմից և կհավաքագրվեն պատահարի վերաբերյալ ստանդարտացված ելակետային տվյալներ: Պատահարների վերաբերյալ հավաքագրված ելակետային տվյալները ճանապարհային ոստիկանությունը միասնական էլեկտրոնային հարթակի միջոցով անմիջականորեն կփոխանցի Բյուրոյին և ապահովագրական ընկերություններին»:

«Այս երկու փոփոխությունների արդյունքում ունենում ենք պատահարների գրանցման պարզեցված համակարգ՝ վարորդները կամ գրանցում են պատահարն ինքնուրույն կամ միայն Ճանապարհային ոստիկանության կողմից»,- ընդգծեց նա՝ հավելելով, որ այս փոփոխությունները միտված են երեք կարևոր հանգամանքի՝ մարդկանց հարմարավետության բարձրացմանը, պատահարների գրանցման և ապահովագրական հատուցումների գործընթացի կրճատմանը, խցանումների վերացմանը: