Պետական բյուջեի 22 տոկոսը տնօրինում է Սոցիալական ապահովության պետական ծառայությունը
Այս տարվա հուլիսի 1-ի դրությամբ ՀՀ աշխատանքի և սոցիալական հարցերի նախարարության Սոցիալական ապահովության պետական ծառայության տարածքային ստորաբաժանումներում հաշվառված են եղել 465 հազար 550 կենսաթոշակառու, որից տարիքային՝ 307 հազար 449, հաշմանդամության՝ 129 հազար 204, կերակրողին կորցնելու դեպքում ՝ 10 հազար 661, արտոնյալ պայմաններում՝ 2644, երկարամյա ծառայության՝ 823, մասնակի՝ 14 հազար 769: Տվյալները լրագրողների հետ հանդիպմանը ներկայացրեց Ծառայության պետ Արմեն Աբրահամյանը:
Այս տարվա հուլիսի 1-ի դրությամբ ծերության նպաստ ստացողների թվաքանակը կազմում է 3768, հաշմանադության նպաստ ստացողների թվաքանակը՝ 49 հազար 302, կերակրողին կորցնելու դեպքում նպաստ ստացողների թվաքանակը՝ 12 հազար 14, խնամքի նպաստ ստացողների թվաքանակը՝ 12 հազար 176: Այս տարվա առաջին կիսամյակում մայրության նպաստ է նշանակվել 10 հազար 375 անձի, իսկ երեխայի ծննդյան միանվագ նպաստ՝ 19 հազար 17 անձի:
Առաջին կիսամյակում Ծառայության միջոցով հանրությանը վճարվել է 151,105,511.1 հազար դրամ, որից աշխատանքային կենսաթոշակներ՝ շուրջ 110,776,845.5 հազար դրամ, ուժային մարմինների կողմից նշանակված զինվորական կենսաթոշակներ՝ 11,754,742.2 հազար դրամ, պարգևավճարներ՝ 5,805,198.8 հազար դրամ, ծերության, հաշմանդամության և կերակրողին կորցնելու դեպքում նպաստներ՝ շուրջ 6,806,126.8 հազար դրամ, մինչև 2 տարեկան երեխայի խնամքի նպաստ՝ 1,243,263.2 հազար դրամ, չաշխատող անձի մայրության նպաստ՝ 1,311,698.3 հազար դրամ, երեխայի ծննդյան միանվագ նպաստ (ներառյալ ընտանեկան դրամագլուխը)՝ շուրջ 4,648,850.0 հազար դրամ:
«Պետական բյուջեից սոցիալական ոլորտ 36 տոկոս է գնում, որից 22 տոկոսը տնօրինում է մեր ծառայությունը: Սա բարձր տոկոս է: Նման երկրի համար շատ մեծ բեռ է, միաժամանակ մեր պետությունն այդ բեռը վեցրել է ու չի կարող հրաժարվել: Այլ խնդիր է, թե ապագայում ինչ միջոցներ պետք է կիրառենք, նոր համակարգեր ներդնենք, մասնավորապես նաև կուտակային համակարգը, որ հետագայում խնդիր չառաջանա»,- ասաց Ա.Աբրահամյանը:
Ըստ նրա, Հայաստանում բնակչության մոտ 18 տոկոսը թոշակառու է, Եվրոպայում միջինը կազմում է 11,5 տոկոս է:
«Նորմալ է համարվում այն թոշակը, որ երեք աշխատող մեկ թոշակառու պահեն, մեզ մոտ 1,2-1,3 ն է»,- ասաց Ա.Աբրահամյանը:
Այս տարվա առաջին կիսամյակում Ծառայության տարածքային բաժիններում ներկայացվել են շուրջ 148 հազար 250 դիմում, որից՝ կենսաթոշակների և ծերության, հաշմանդամության և կերակրողին կորցնելու դեպքում նպաստների վերաբերյալ (նշանակում, վերահաշվարկ և այլն) շուրջ 106 հազար դիմում, երեխայի ծննդյան միանվագ նպաստի վերաբերյալ՝ 19 հազար 250 դիմում, մայրության նպաստի վերաբերյալ՝ 14 հազար դիմում, խնամքի նպաստի վերաբերյալ՝ 9400 դիմում:
Հաշվետու ժամանակաշրջանում Ծառայության կողմից իրականացված աշխատանքների արդյունքում հայտնաբերվել է շուրջ 58,500.0 հազար դրամ ոչ իրավաչափ վճարում, ՀՀ պետական բյուջե է վերականգնվել շուրջ 10,300.0 հազար դրամ:
Նա նշեց, որ Ծառայությունը 5 տարվա ընթացքում տեղեկատվական համակարգերի ներդրման, օրենսդրական դաշտի, նոր ձևավորված մշակույթի միջոցով խնայել են 49 միլիարդ դրամ, որը վերադարձրել են բյուջե, որտեղից էլ՝ սոցիալական ոլորտ, ինչի հաշվին բարձրացվել են թոշակները:
Ա. Աբրահամյանը նաև տեղեկացրեց, որ այս տարվա առաջին կիսամյակում Ծառայության կողմից դատարաններ են ներկայացվել կենսաթոշակների մասով 99 հայցադիմում 44,933.6 հազար դրամ ընդհանուր հայցագնով, իսկ նպաստների մասով՝ 12 հայցադիմում 2,307.6 հազար դրամ ընդհանուր հայցագնով:
Ըստ ներկայացված տվյալների, որ այս տարվա առաջին վեց ամսում Ծառայության 52 աշխատակից ազատվել է աշխատանքից, կարգապահական տույժ է կիրառվել 18 աշխատակցի նկատմամբ, որից խիստ նկատողություն՝ 1, նկատողություն՝16, նախազգուշացում՝ 1:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ